ຫົງເປັນຂ່າວ!! ເມື່ອມະຫາເສດຖີຈະເທັກໂອເວີຕໍ່

 

ລີເວີພູ ຕົກເປັນຂ່າວກຽມຖືກເທັກໂອເວີໂດຍກຸ່ມນາຍທຶນຈາກຕາເວັນອອກກາງ ຫຼັງມີລາຍງານວ່າໂຄດມະຫາເສດຖີຈາກສະຫະລັດອາລັບເອມິເຫຼດ ພ້ອມຈ່າຍ 700 ລ້ານປອນຊື້ສະໂມສອນຈາກຖິ່ນ ແອນຟິວ ຄາດກັນວ່າຜູ້ຊື້ແມ່ນ ຊິກ ຄາລິຟາ ເຄືອວົງສາຄະນະຍາດຂອງ ຊິກ ມານຊູ ເຈົ້າຂອງ ແມນເຊສເຕີ ຊີຕີ ເຊິ່ງມີຊັບສິນທີ່ກິນຈົນຕາຍກໍບໍ່ໝົດ.

 

“ຫົງແດງ” ລີເວີພູ ສະໂມສອນຍັກໃຫຍ່ຈາກ ພຣີເມຍລີກ ຕົກເປັນຂ່າວໄດ້ກາຍເປັນໜຶ່ງທີມໃນຜູ້ດີທີມຫຼ້າສຸດທີ່ກຽມຖືກເທັກໂອເວີໂດຍກຸ່ມທຶນຈາກຕາເວັນອອກກາງ ຈາກການລາຍງານເມື່ອວັນອັງຄານທີ່ 19 ທີ່ຜ່ານມາ.

 

ກ່ອນໜ້ານີ້ ແມນເຊສເຕີ ຊີຕີ ມີເຈົ້າຂອງເປັນ ຊິກ ມານຊູ ເຊິ່ງເປັນສະມາຊິກລາຊະວົງອາບູດາບີ ຫຼ້າສຸດສະມາຊິກອີກຄົນໜຶ່ງຂອງລາຊະວົງເລັງທີ່ຈະເຂົ້າຄອບຄອງ ລີເວີພູ ແລະ ພ້ອມທີ່ຈະຈ່າຍເງິນມະຫາສານເຖິງ 700 ລ້ານປອນເພື່ອບັນລຸຂໍ້ຕົກລົງ.

 

ສະຕາສະປອດ ລາຍງານເມື່ອຊ່ວງຕົ້ນເດືອນເມສາວ່າໄດ້ເລີ່ມມີການເຈລະຈາເກີດຂຶ້ນແລ້ວ ແລະ ເຖິງວ່າບໍ່ເປີດເຜີຍລາຍຊື່ຂອງຜູ້ຍື່ນຂໍ້ສະເໜີແຕ່ກໍມີການຄາດກັນວ່າອາດຈະເປັນ ຊິກ ຄາລິຟາ ປະທານາທິບໍດີຈາກສະຫະລັດອາລັບເອມິເຫຼດ (ຢູເອອີ).

 

ມີການປະມານກັນວ່າ ອະພິມະຫາເສດຖີລາຍນີ້ໜ້າຈະມີຊັບສິນຫຼາຍກວ່າ 30,000 ລ້ານປອນ ແລະ ລວຍກວ່າ ຊິກ ມານຊູ ທີ່ເຂົ້າມາເຮັດໃຫ້ ແມນເຊສເຕີ ຊີຕີ ໄດ້ແຊມລີກ 2 ສະໄໝນັບຕັ້ງແຕ່ເຂົ້າມາສານຕໍ່ເມື່ອປີ 2008.

 

ຂະນະທີ່ໂຄສົກ ພຣີເມຍລີກ ໄດ້ອອກມາຢືນຢັນເລື່ອງນີ້ວ່າ “ບໍ່ມີກົດໃນ ພຣີເມຍລີກ ຂໍ້ໃດທີ່ສັ່ງຫ້າມເຈົ້າຂອງແຕ່ລະສະໂມສອນເປັນເຄືອຍາດພີ່ນ້ອງກັນ”.

 

ສຳລັບ ລີເວີພູ ມີມູນຄ່າປະມານ 650 ລ້ານປອນ ແລະ ປັດຈຸບັນຖືຄອງໂດຍ ເຟນເວ ສະປອດ ກຣຸບ ກຸ່ມທຸລະກິດກິລາອາເມລິກັນເຊິ່ງເຂົ້າມາເທັກໂອເວີເມື່ອເດືອນຕຸລາປີ 2010 ໃນລາຄາ 300 ລ້ານປອນ.

 

ເມື່ອປີກາຍ ນິຕິຍະສານຟອບ ໄດ້ຈັດອັນດັບໃຫ້ ລີເວີພູ ຢູ່ທີ 8 ຂອງສະໂມສອນທີ່ມີມູນຄ່າຫຼາຍທີ່ສຸດໃນໂລກ ແລະ ພວກເຂົາຈະໄດ້ຮັບເງິນສ່ວນແບ່ງຈາກຄ່າລິຂະສິດການຖ່າຍທອດສົດ ພຣີເມຍລີກ ຈຳນວນມະຫາສານເຖິງ 5,136 ລ້ານປອນທີ່ຈະເລີ່ມຂຶ້ນໃນລະດູການໜ້າ.