ຫົງຫວັງດຶງເຊສເຊຢົງຫຼາຍກວ່າໂຮເບິສັນ

 

ລີເວີພູ ກຽມເດີນໜ້າດຶງ ໄຣອັນ ເຊສເຊຢົງ ແບັກຊ້າຍຂອງ ຟູແລມ ເສີມທັບຫຼາຍກວ່າ ແອນດຣູ ໂຣເບິສັນ ດາວເຕະ ຮາວ ຊີຕີ ໃນຊຳເມີນີ້ຫຼັງ “ຫົງແດງ” ກຳລັງເບິ່ງຫານັກເຕະໃໝ່ອັດເກມຮັບທາງຝັ່ງຊ້າຍທີ່ຕ້ອງໃຊ້ ເຈມ ມິວເນີ ມາແກ້ຂັດໃນລະດູການນີ້.

 

“ຫົງແດງ” ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າກຽມເດີນໜ້າດຶງ ໄຣອັນ ເຊສເຊຢົງ ແບັກດາວລຸ້ງຂອງ ຟູແລມ ສະໂມສອນດັງຂອງ ແຊມປຽນຊິບ ຫຼາຍກວ່າທີ່ຈະເປັນ ແອນດຣູ ໂຣເບິສັນ ກອງຫຼັງຂອງ ຮາວ ຊີຕີ ໃນຊ່ວງຊຳເມີນີ້ ຈາກການລາຍງານເມື່ອວັນພະຫັດທີ່ຜ່ານມາ.

 

ເຈີເກັນ ຄັອບ ຜູ້ຈັດການທີມ ລີເວີພູ ກຳລັງຊອກຫາແບັກຊ້າຍຕົວໃໝ່ຫຼັງ ເອົາເບໂຕ ໂມເຣໂນ ເຮັດຜົນງານຕົກຕ່ຳຈົນບໍ່ມີຕຳແໜ່ງໃນທີມ ແລະ ຕ້ອງເອົາ ເຈມ ມິວເນີ ໄປຫຼິ້ນແທນໃນລະດູການນີ້ ແລະ ພວກເຂົາຈະມີການຊື້ນັກເຕະມາເສີມທັບໃນຕຳແໜ່ງນີ້ຢ່າງແນ່ນອນໃນຊ່ວງຈົບລະດູການນີ້.

 

ຫຼ້າສຸດມີລາຍງານວ່າ ລີເວີພູ ເຝົ້າເບິ່ງສະຖານະການຂອງ ເຊສເຊຢົງ ຢ່າງໃກ້ຊິດ ແລະ ເຊື່ອວ່າພວກເຂົາຈະເດີນໜ້າດຶງນັກເຕະອາຍຸ 16 ປີມາຮ່ວມທີມຫຼາຍກວ່າທີ່ຈະເຊັນສັນຍາກັບ ໂຣເບິສັນ ຫຼັງຈາກແບັກດາວລຸ້ງພັດທະນາຝີຕີນຂຶ້ນມາຈົນເປັນຕົວຫຼັກໃຫ້ກັບ ຟູແລມ ໃນເວລານີ້.

 

ເຊສເຊຢົງ ສາມາດຫຼິ້ນໄດ້ທັງຕຳແໜ່ງແບັກ ແລະ ປີກ ແລະ ເຂົາກໍໂຊຟອມໜ້າປະທັບໃຈໂດຍການຍິງໄປແລ້ວ 5 ປະຕູ ແລະ ເຮັດ 2 ແອັດຊິດຈາກການລົງຫຼິ້ນ 24 ນັດໃນລະດູການນີ້ຈົນກາຍເປັນໜຶ່ງໃນດາວລຸ້ງເນື້ອຫອມທີ່ສຸດຂອງວົງການບານເຕະອັງກິດ.

 

ບົດຄວາມໃຫມ່ໆ