ຫົງສະດຸ້ງ!!ເສືອໃຕ້ເລັງດຶງຄັອບຄຸມທັບ

 

ແຟນ ຫົງແດງ ມີໜາວແນ່ນອນຫຼັງມີຂ່າວວ່າ ບາເຢິນ ມິວນິກ ເລັງດຶງໂຕ ເຈີເກັ້ນ ຄັອບ ມາຄຸມທັບຕໍ່ຈາກ ຄາໂລ ອັນເຊລັອດຕິ ນາຍໃຫຍ່ຄົນປັດຈຸບັນ ຫຼັງຈາກທີ່ນາຍໃຫຍ່ເລືອດເບຍເຄີຍຝາກຜົນງານອັນສຸດຍອດເອົາໄວ້ໃນ ບຸນເດສລີກ້າ.

 

“ເສືອໃຕ້” ບາເຢິນ ມິວນິກ ສະໂມສອນຍັກໃຫຍ່ຂອງ ບຸນເດສລີກ້າ ເຢຍລະມັນຕົກເປັນຂ່າວວ່າສົນໃຈທີ່ຈະດຶງ ເຈີເກັ້ນ ຄັອບ ຜູ້ຈັດການທີມຂອງ ຫົງແດງ ລີເວີພູ ສະໂມສອນຍັກໃຫຍ່ຂອງລີກຜູ້ດີມາເປັນເທຣນເນີ້ຄົນໃໝ່ຕໍ່ຈາກ ຄາໂລ ອັນເຊລັອດຕິ ຈາກການລາຍງານເມື່ອວັນອາທິດທີ່ຜ່ານມາ.

 

ຄັອບ ເຮັດດຜົນງານໄດ້ດີເດັ່ນກັບ ມາຍ 05 ກ່ອນມາຄຸມທີມ ໂບຣຸສເຊຍ ດອດມຸນ ແລະ ນຳ ເສືອເຫຼືອງ ເປັນແຊມລີກ 2 ສະໄໝລວມເຖິງຜ່ານເຂົ້າຮອບຊິງຊະນະເລີດລາຍການ ຢູຟ້າ ແຊມປຽນລີກ ກ່ອນທີ່ຈະມາຄຸມ ລີເວີພູ.

 

ນາຍໃຫຍ່ເລືອດເບຍເລີ່ມຕົ້ນໄດ້ດີກັບ ລີເວີພູ ໃນລະດູການນີ້ຈາກການນຳທີມເກັບໄຊຊະນະ 4 ຈາກ 6 ເກມໃນລີກ ແລະ ປັດຈຸບັນມີສັນຍາໃນຖິ່ນ ແອນຟິວ ຍາວຈົນຮອດປີ 2022 ແຕ່ກໍມີລາຍງານວ່າ ບາເຢິນ ເລັງດຶງ ຄັອບ ມາຄຸມທີມໃນອະນາຄົດເມື່ອ ອັນເຊລັອດຕິ ໝົດສັນຍາກັບ “ເສືອໃຕ້” ແລ້ວ.