ຫົງສະດຸ້ງ!!ຊຸດຂາວກຽມລ່າໂຕຄູຕີ້ຮ່ວມທັບ

 

“ລາຊາຊຸດຂາວ” ເຣອັນ ມາດຣິດ ລັອກເປົ້າລ່າໂຕ ເຟລິບເປ ຄູຕິນໂຢ ຈອມທັບຂອງ ລີເວີພູ ມາຮ່ວມທັບຖ້າວ່າຂາຍ ຮາເມສ ໂຣດຣິເກດ ອອກຈາກທີມ.

 

ເຟລິບເປ ຄູຕິນໂຢ ກອງກາງຈອມທັບຂອງ ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນເປົ້າໝາຍການເສີມທັບຂອງ ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນຕາມການລາຍງານຈາກ ດິ ອາຣິໂອ ໂກ ສື່ກິລາຊັ້ນນຳຂອງແດນກະທິງເມື່ອວັນພຸດທີ່ຜ່ານມາ.

 

ລະດູການນີ້ ຄູຕິນໂຢ ໂຊຟອມໄດ້ຢ່າງໂດດເດັ່ນໂດຍການຍິງ 5 ປະຕູກັບອີກ 5 ແອັດຊິດຈົນຊ່ວຍໃຫ້ “ຫົງແດງ” ຂຶ້ນມາເປັນຈ່າຝູງຢ່າງສະຫງ່າ ແລະ ດ້ວຍຟອມອັນໂດດເດັ່ນດັ່ງກ່າວເຮັດໃຫ້ສະຕາທີມຊາດບາຊິວກາຍເປັນທີ່ໝາຍປອງ “ລາຊາຊຸດຂາວ” ພາຍໃຕ້ການນຳທັບຂອງ ຊີເນດີນ ຊີດານ ແລະ ອາດຈະມີການເດີນເລື່ອງທາບທາມທັນທີຖ້າວ່າ ຮາເມສ ໂຣດຣິເກດ ເພເມກເກີຊາວໂຄລຳບີເລືອກອຳລາຖິ່ນ ຊານດີເອໂກ ເບີນາເບວ.

 

ສຳລັບລະດູການນີ້ “ຄູຕີ້” ເຊິ່ງຍ້າຍມາຈາກ ມິລານ ເມື່ອເດືອນມັງກອນປີ 2013 ລົງຫຼິ້ນໃຫ້ກັບ ລີເວີພູ ລວມທຸກລາຍການ 11 ນັດຍິງໄດ້ 6 ປະຕູ.