ຫົງມີເຮ!!ພູລິຊິດຮັບສົນຍ້າຍຫຼິ້ນລີກຜູ້ດີ

 

ລີເວີພູ ມີລຸ້ນແລ້ວ!! ຄຣິສຕຽນ ພູລິຊິດ ມິດຟິວເລືອດລຸງແຊມຂອງ ໂບຣຸສເຊຍ ດອດມຸນ ຮັບຢາກຍ້າຍໄປລອງສຳຜັດບັນຍາກາດລູກໜັງຜູ້ດີ ລະບຸວ່າ ພຣີເມຍລີກ ເປັນລີກທີ່ໜ້າສົນໃຈ ແລະ ຈັກມື້ໜຶ່ງຕ້ອງຍ້າຍໄປຫຼິ້ນໃຫ້ໄດ້.

 

ຄຣິສຕຽນ ພູລິຊິດ ກອງກາງດາວລຸ້ງຂອງ ໂບຣຸສເຊຍ ດອດມຸນ ສະໂມສອນຍັກໃຫຍ່ຂອງ ບຸນເດສລີກາ ເຢຍລະມັນຍອມຮັບວ່າສົນໃຈຢາກໄປຫຼິ້ນໃນ ພຣີເມຍລີກ ມາຕະຫຼອດພ້ອມກັບຍົກວ່າລີກສູງສຸດເມືອງຜູ້ດີເປັນເກມລູກໜັງທີ່ຕົນມັກມາດົນແລ້ວ.

 

ລີເວີພູ ຕົກເປັນຂ່າວວ່າເຄີຍຍື່ນຂໍ້ສະເໜີ 11 ລ້ານປອນເພື່ອຂໍຊື້ ພູລິຊິດ ຢ່າງໃດກໍຕາມ “ເສືອເຫຼືອງ” ປະຕິເສດຂໍ້ສະເໜີດັ່ງກ່າວເມື່ອຊ່ວງຊຳເມີທີ່ຜ່ານມາ ແຕ່ເຖິງແບບນັ້ນດາວເຕະອາເມລິກັນຍອມຮັບວ່າສົນໃຈຢາກໄປຫຼິ້ນໃນເກມລີກອັງກິດ ແລະ ຖ້າມີໂອກາດຈະຍ້າຍໄປຫຼິ້ນໃຫ້ໄດ້.

 

ມິດຟິວອາຍຸ 18 ປີເຊິ່ງເຄີຍຫຼິ້ນໃນອັງກິດມາແລ້ວສະໄໝເປັນນັກເຕະດາວລຸ້ງກັບ ແບລັກເລ ທາວ ເມື່ອປີ 2005 ກ່າວວ່າຕົນເຕີບໂຕຂຶ້ນມາຈາກແຮງກະຕຸ້ນຈາກເກມ ພຣີເມຍລີກ ແລະ ປາຖະໜາທີ່ຈະມີໂອກາດໄດ້ຫຼິ້ນໃນລີກສູງສຸດເມືອງຜູ້ດີ “ມັນເປັນເຫດຜົນສຳຄັນຫຼາຍໆ ສຳລັບບ່ອນທີ່ຂ້ອຍຢູ່ໃນປັດຈຸບັນ”.

 

“ມີຄົນຫຼວງຫຼາຍທີ່ບໍ່ຮູ້ຄວາມຈິງເພາະຄວາມຈິງແລ້ວຂ້ອຍເປັນຄົນທີ່ເຕັມໄປດ້ວຍແຮງປາຖະໜາໃນການຫຼິ້ນມາຕະຫຼອດ ຫຼັງຈາກເລີກຮຽນທຸກໆມື້ຂ້ອຍຈະໃຊ້ເວລາຫຼາຍຊົ່ວໂມງທີ່ສວນສາທາລະນາໂດຍການເຕະບານກັບໝູ່ນັກຮຽນຂອງຂ້ອຍ ນັ້ນເປັນສະຖານທີ່ເລີ່ມທຳອິດທີ່ເຮັດໃຫ້ຂ້ອຍມີຊີວິດຢູ່ເພື່ອເຕະບານ ແລະ ນັ້ນເປັນສ່ວນສຳຄັນຫຼາຍທີ່ເຮັດໃຫ້ຂ້ອຍພັດທະນາຈົນທຸກວັນນີ້” ພູລິຊິດ ກ່າວ.