ຫົງມີສຽວ..ຄູຕີ້ບອກສົນໄປບາຊາ

 

ສະປອດ ສື່ກິລາຈາກກາຕາລັນເຜີຍວ່າ ເຟລິບເປ ຄູຕິນໂຢ ສົນໃຈທີ່ຈະໄປຢູ່ກັບ ບາເຊໂລນາ ເປັນທີມທຳອິດເຖິງວ່າຈະມີ ເຣອັນ ມາດຣິດ ແລະ ປາຣີ ແຊັງ-ແຊັກແມັງ ທີ່ຢາກໄດ້ເຂົາກໍຕາມ.

 

ເຟລິບເປ ຄູຕິນໂຢ ມິດຟິວເລືອດແຊມບາຂອງ “ຫົງແດງ” ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ເປີດໂອກາດທີ່ຈະຍ້າຍໄປຢູ່ກັບ ບາເຊໂລນາ ໃນອະນາຄົດຕາມການລາຍງານຂອງ ສະປອດ ສື່ກິລາຊື່ດັງຂອງແຄວ້ນກາຕາລັນ.

 

ນັບຕັ້ງແຕ່ຍ້າຍຈາກ ອິນເຕີ ມິລານ ມາຢູ່ກັບ ລີເວີພູ ໃນປີ 2013 ຄູຕິນໂຢ ກໍເປັນກຳລັງສຳຄັນໃນເກມບຸກຂອງທີມມາຕະຫຼອດ ແລະ ລະດູການນີ້ກໍໂຊຟອມຢ່າໂດດເດັ່ນຈົນມີສ່ວນຊ່ວຍໃຫ້ທີມເປັນອັນດັບ 3 ຂອງລີກໂດຍການມີ 23 ຄະແນນຈາກການລົງຫຼິ້ນ 10 ເກມເທົ່າກັບ ແມນເຊສເຕີ ຊີຕີ ແລະ ອາເຊນອນ ພຽງແຕ່ວ່າ “ຫົງແດງ” ມີຜົນປະຕູໄດ້ເສຍໜ້ອຍກວ່າ 2 ທີມນັ້ນ.

 

ຟອມອັນເທບດັ່ງກ່າວເຮັດໃຫ້ ຄູຕິນໂຢ ຕົກເປັນຂ່າວກັບຫຼາຍທີມຊັ້ນນຳທົ່ວເອີຣົບເຊັ່ນ ບາເຊໂລນາ, ເຣອັນ ມາດຣິດ ແລະ ເປເອັດເຊ ແຕ່ວ່າ ສະປອດ ເຜີຍວ່າ ບາຊາ ເປັນຕົວເລືອກທຳອິດຂອງ ຄູຕິນໂຢ ຖ້າວ່າເຂົາຕ້ອງຍ້າຍທີມ.