ຫົງທຸ່ມ 11 ລ້ານປອນຈີກສັນຍາບຣັນ

 

ເດິ ກາດຽນ ສື່ຂອງອັງກິດລະບຸ ລີເວີພູ ຢາກໄດ້ ຢູລຽນ ບຣັນ ປີກດາວລຸ້ງຂອງ ເລເວີຄູເຊັນ ຈົນຍອມຈ່າຍເງິນ 11 ລ້ານປອນເຊິ່ງເທົ່າກັບຄ່າຈີກສັນຍາຂອງເຂົາແລ້ວ ໂດຍນັກເຕະອາຍຸ 20 ປີຈະຍ້າຍມາຫຼິ້ນໃຫ້ “ຫົງແດງ” ໃນຊ່ວງຊໍາເມີນີ້.

 

ລີເວີພູ ສະໂມສອນຊັ້ນນຳຂອງ ພຣີເມຍລີກ ຕົກລົງທີ່ຈະຈ່າຍເງິນເທົ່າກັບຄ່າຈີກສັນຍາຂອງ ຢູລຽນ ບຣັນ ປີກຕົວເກັ່ງຂອງ ໄບເອີ ເລເວີຄູເຊັນ ເພື່ອທີ່ຈະດຶງເຂົາມາຮ່ວມທີມແລ້ວ ໂດຍຢູ່ທີ່ 11 ລ້ານປອນ ຕາມການລາຍງານຂອງ ເດິ ກາດຽນ ສື່ຊື່ດັງຂອງອັງກິດ.

 

ບຣັນ ພັດທະນາຂຶ້ນມາໄດ້ດີຈົນກາຍເປັນໜຶ່ງໃນດາວລຸ້ງທີ່ໜ້າຈັບຕາເບິ່ງຫຼາຍທີ່ສຸດຂອງວົງການບານເອີຣົບໂດຍໃນລະດູການນີ້ໄດ້ລົງຫຼິ້ນໃນລີກໄປທັງໝົດ 17 ນັດພ້ອມກັບຍິງໄດ້ 2 ປະຕູເຊິ່ງມັນກໍເຮັດໃຫ້ມີຫຼາຍທີມທີ່ຢາກໄດ້ເຂົາໄປຮ່ວມທັບ.

 

ຈົນຫຼ້າສຸດ ເດິ ກາດຽນ ກໍລາຍງານວ່າ ເຈີເກັນ ຄັອບ ຜູ້ຈັດການທີມ ລີເວີພູ ອະນຸຍາດໃຫ້ທີມຈົກເງິນເທົ່າກັບຄ່າຈີກສັນຍາຂອງ ບຣັນ ແລ້ວເຊິ່ງດາວເຕະເຢຍລະມັນຈະໄດ້ຢູ່ກັບ “ຫ້າງຂາຍຢາ” ໄປກ່ອນແລ້ວຈຶ່ງຍ້າຍມາຫຼິ້ນໃຫ້ກັບ “ຫົງແດງ” ໃນຊ່ວງຊໍາເມີນີ້ ໂດຍການໄດ້ສິດຫຼິ້ນ ຢູຟາ ແຊມປຽນລີກ ລະດູການໜ້າ ກໍອາດຈະມີສ່ວນຊ່ວຍໃນການເຈລະຈາທຸລະກິດຄັ້ງນີ້ເຊັ່ນກັນ.