ຫົງຍັງໃຈແຂງ!!ບໍ່ຍອມປ່ອຍເບັນເຕເກໃຫ້ພາເຫຼດ 23 ລ້ານປອນ

 

ຄຣິສຕັນ ພາເຫຼດ ຕ້ອງໃຈໃຫຍ່ຫຼາຍກວ່ານີ້ຖ້າວ່າຢາກໄດ້ ຄຣິສເຕຢອງ ເບັນເຕເກ ກອງໜ້າຂອງ ລີເວີພູ ຫຼັງຈາກທີ່ “ຫົງແດງ” ບອກປັດຂໍ້ສະເໜີຄັ້ງທີສອງຂອງ “ປາສາດເຮືອນແກ້ວ” ທີ່ຍື່ນຂໍຊື້ນັກເຕະ 23 ລ້ານປອນແລ້ວ ເນື່ອງຈາກຢາກໄດ້ຄ່າໂຕເທົ່າກັບທີ່ເຄີຍຈ່າຍໃຫ້ ແອສຕັນ ວິນລາ ເມື່ອປີກາຍ.

 

ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຈັດການປະຕິເສດຂໍ້ສະເໜີຂອງ ຄຣິສຕັນ ພາເຫຼດ ທີ່ຍື່ນຂໍຊື້ ຄຣິສເຕຢອງ ເບັນເຕເກ ກອງໜ້າຮ່າງຍັກໄປອີກເທື່ອໜຶ່ງແລ້ວ ຈາກການລາຍງານຂອງ ບີບີຊີ ສື່ດັງຂອງເມືອງຜູ້ດີເມື່ອວັນອັງຄານທີ່ຜ່ານມາ.

 

ຫົງແດງ ປະຕິເສດຂໍ້ສະເໜີເທື່ອຫຼ້າສຸດຂອງ “ປາສາດເຮືອນແກ້ວ” ທີ່ຍື່ນເງິນເບື້ອງຕົ້ນ 23 ລ້ານປອນບວກກັບເງື່ອນໄຂອີກ 7 ລ້ານປອນທີ່ຈະຈ່າຍເພີ່ມຕາມເງື່ອນໄຂເຮັດຜົນງານຂອງນັກເຕະ ຫຼັງກ່ອນໜ້ານີ້ ພາເຫຼດ ເຄີຍຖືກປັດຂໍ້ສະເໜີ 25 ລ້ານປອນມາແລ້ວເນື່ອງຈາກວ່າ ລີເວີພູ ຕ້ອງການໄດ້ຄ່າໂຕ 32.5 ລ້ານປອນເທົ່າກັບທີ່ເຄີຍຈ່າຍໃຫ້ ແອສຕັນ ວິນລາ ໃນການດຶງນັກເຕະມາຮ່ວມທັບປີກາຍນີ້.

 

ເບັນເຕເກ ບໍ່ສາມາດປັບໂຕໃຫ້ເຂົ້າກັບລະບົບຂອງ ເຈີເກັນ ຄັອບ ຜູ້ຈັດການທີມໄດ້ ແລະ ຍັງມີແວວວ່າເປັນຕົວເລືອກຮອງຈາກ ແດນນຽວ ສະເຕີຣິດ, ດິວັອກ ໂອຣິກີ, ແດນນີ ອິງ ລວມທັງ ໂຣເບໂຕ ຟຣີມິໂນ ສ່ວນ ພາເຫຼດ ມີທຶນໃນການຊື້ນັກເຕະໃໝ່ຫຼາຍຂຶ້ນເນື່ອງຈາກຫາກໍຂາຍ ຢານນິກ ໂບລາຊີ ໄປໃຫ້ກັບ ເອເວີຕັນ ໃນລາຄາ 25 ລ້ານປອນເມື່ອວັນຈັນທີ່ຜ່ານມາ.