ຫົງຈໍ່ທຸ່ມ 40 ລ້ານປອນດຶງ 2 ແນວຮັບຈາກນັກບຸນ

 

ເຊົາແຮມຕັນ ກຽມຮັບຊັບກ້ອນໃຫຍ່ຈາກ ລີເວີພູ ເມື່ອຫຼ້າສຸດມີຂ່າວວ່າ “ຫົງແດງ” ຈໍ່ທຸ່ມ 40 ລ້ານປອນດຶງ ເຟີກິວ ຟານ ໄດ ແລະ ແຊມ ແມັກຄວີນ 2 ແນວຮັບໄປເສີມທັບໃນຊ່ວງປີໃໝ່ນີ້ ຫຼັງຈາກທີ່ທີມດັງຈາກຖິ່ນ ແອນຟິວ ເປັນລູກຄ້າປະຈຳຂອງ “ນັກບຸນ” ມາຕະຫຼອດ.

 

“ຫົງແດງ” ລີເວີພູ ສະໂມສອນຍັກໃຫຍ່ຂອງ ພຣີເມຍລີກ ຕົກເປັນຂ່າວວ່າກຽມທີ່ຈະທຸ່ມເງິນເຖິງ 40 ລ້ານປອນເພື່ອດຶງໂຕ ເຟີກິວ ຟານ ໄດ ແລະ ແຊມ ແມັກຄວີນ 2 ນັກເຕະຂອງ “ນັກບຸນ” ເຊົາແຮມຕັນ ມາເສີມທັບໃນຊ່ວງເປີດຕະຫຼາດຊື້ຂາຍນັກເຕະຮອບສອງເດືອນມັງກອນນີ້ ຈາກການລາຍງານເມື່ອວັນອັງຄານທີ່ຜ່ານມາ.

 

ເຈີເກັນ ຄັອບ ຜູ້ຈັດການທີມ ລີເວີພູ ຕ້ອງການທີ່ຈະເສີມແນວຮັບ ແລະ ເລັງດຶງ 2 ນັກເຕະຂອງ ເຊົາແຮມຕັນ ມາຮ່ວມທີມໂດຍ ຟານ ໄດ ເປັນໜຶ່ງໃນກອງຫຼັງທີ່ໂຊຟອມໄດ້ຢ່າງໂດດເດັ່ນໃນ ພຣີເມຍລີກ ຕະຫຼອດຊ່ວງ 2 ລະດູການທີ່ຜ່ານມາ ຂະນະທີ່ ແມັກຄວີນ ກໍເຮັດຜົນງານໜ້າປະທັບໃຈຫຼັງຈາກທີ່ໄດ້ປະເດີມສະໜາມໃນລະດູການນີ້.

 

ຖ້າວ່າ ຄັອບ ຈັດການດຶງ ຟານ ໄດ ແລະ ແມັກຄວີນ ມາຮ່ວມທີມແທ້ພວກເຂົາກໍຈະເຂົ້າມາເປັນຄອບຄົວ “ນັກບຸນ” ໃນ ແອນຟິວ ຫຼັງຈາກທີ່ ລີເວີພູ ໄດ້ດຶງນັກເຕະຂອງ ເຊົາແຮມຕັນ ມາແລ້ວຫຼາຍຄົນທັງ ອະດຳ ລັນລານາ, ນາທານຽວ ຄາຍ, ເດຢັນ ລອຟເຣັນ, ຣິກກີ ແລມເບິດ ລວມທັງ ຊາດິໂອ ມາເນ ໃນຊ່ວງບໍ່ເທົ່າໃດປີທີ່ຜ່ານມາ.