ຫັກເອິກຜີແດງ!!ຣາມອສຍອມເຊັນສັນຍາໃໝ່ກັບລາຊາຊຸດຂາວແລ້ວ

   ມາກ້າ ສື່ຂອງສະເປນຕີຂ່າວ ເຊຄິໂອ້ ຣາມອສ ກອງຫຼັງຂອງ ເຣອັລ ມາດຣິດ ຕົກລົງທີ່ຈະຕໍ່ສັນຍາກັບທີມ ແຕ່ຍັງບໍ່ໄດ້ເຊັນສັນຍາຢ່າງເປັນທາງການ ໂດຍທີ່ນັກເຕະອາຍຸ 29 ປີຈະໄດ້ຄ່າເມື່ອຍເຖິງ 9 ລ້ານຢູໂຣຕໍ່ລະດູການ.

   ເຊຄິໂອ້ ຣາມອສ ກອງຫຼັງໂຕເກັ່ງຂອງລາຊາຊຸດຂາວ ສະໂມສອນຍັກໃຫຍ່ຂອງວົງການ ລາ ລີກ້າ ສະເປນ ຕົກລົງເລື່ອງເຊັນສັນຍາສະບັບໄດ້ແລ້ວ ໂດຍຈະໃຫ້ເຂົາຢູ່ໃນຖິ່ນ ຊານເດໂກ້ ເບີນາເບວ ໄປຈົນເຖິງປີ 2020 ຕາມລາຍງານຂອງ ມາກ້າ ສື່ດັງຂອງຖິ່ນກະທິງໂຫດ.

   ຊ່ວງທີ່ຜ່ານມາອະດີດດາວເຕະ ເຊບີຍ້າ ຕົກເປັນຂ່າວເລື່ອງການຍ້າຍທີມຢ່າງໜັກ ຫຼັງຈາກທີ່ມີຂ່າວລືກັນວ່າຣາມອສມີບັນຫາກັບ ຟໍເຣັນຕິໂນ້ ເປເຣສ ປະທານຂອງສະໂມສອນ ແລະ ບໍ່ພໍໃຈທີ່ບໍ່ໄດ້ຮັບສັນຍາເຊິ່ງໃຫ້ຄ່າເມື່ອຍຫຼາຍພໍສົມຄວນ ໂດຍທີ່ແມນເຊັສເຕີ້ຍູໄນເຕັດເປັນທີມທີ່ຕົກເປັນຂ່າວກັບນັກເຕະຄົນນີ້ຫຼາຍທີ່ສຸດ.

    ຕອນນີ້ກອງຫຼັງທີມຊາດສະເປນ ຍັງບໍ່ໄດ້ເຊັນສັນຍາຢ່າງເປັນທາງການເທື່ອ ແຕ່ກໍມີການຕົກລົງເງື່ອນໄຂຫຼັກໆກັນໄປແລ້ວ ໂດຍລາຍງານລະບຸວ່າໃນສັນຍານັ້ນ ຣາມອສ ຈະໄດ້ຄ່າເມື່ອຍເພີ່ມຂຶ້ນເປັນ 9 ລ້ານຢູໂຣຕໍ່ລະດູການ.

   ຖ້າເປັນແບບນີ້ກໍອາດຈະສົ່ງຜົນກັບ ດາວິດ ເດ ເຄອາ ຜູ້ຮັກສາປະຕູມືກາວຂອງ ແມນເຊັສເຕີ້ຍູໄນເຕັດເຊັ່ນກັນ ຫຼັງຈາກທີ່ເຊື່ອກັນວ່າ ແມນຍູໄນເຕັດ ບໍ່ເຕັມໃຈທີ່ຈະປ່ອຍປະຕູມືດີໄປໃຫ້ນອກຈາກວ່າຈະໄດ້ ຣາມອສ ມາເສີມທັບທີມ.