ຫລວງພະບາງ ຝຶກແອບນາງສາວ ກຽມເຂົ້າປະກວດສັງຂານ ປີ 2017

 ວັນ​ທີ 3 ​ເມສາ 2017 ທີ່​ສະ​ໂມ​ສອນ ​ບ້ານ ​ຄອຍ​ ເມືອງ​ຫລວງ​ພະ​ບາງ ​ໄດ້​ຈັດ​ພິທີ​ຝຶກ​ແອບນາງສາວ ​ແລະ ຊ້ອມ​ຍ່າງ ​ເພື່ອ​ເຂົ້າ​ໃນ​ງານ​ ປະ​ກວດສັງຂານ ​ປະ​ຈໍາປີ 2017 ທີ່​ຈະ​ຈັດ​ຂຶ້ນ​ໃນ​ຄ່ຳ​ຄືນ​ ວັນ​ທີ 11-12 ​ເມສາ ທີ່​ຈະ​ມາ​ເຖິງ ​ໂດຍ​ມີນາງ​ສາວ​ເຂົ້າ​ປະ​ກວດ​ ທັງ​ໝົດ 30 ຄົນ.

ທ່ານ ນາງ ອິນທະ​ວອນ ພົມມະຈັນ ຮອງ​ເຈົ້າ​ເມືອງ​ຫລວງ​ພະ​ບາງ, ຜູ້​ຊີ້​ນໍາ​ວຽກ​ງານ​ ວັດ​ຖະນະ​ທໍາ-ສັງຄົມ, ທັງ​ເປັນ​ປະທານ​ຮັບຜິດຊອບ​ ກອງ​ປະ​ກວດ​ ນາງ​ສັງຂານ​ປະ​ຈໍາປີ 2017 ​ໄດ້​ໃຫ້​ສໍາພາດ​ວ່າ: ຜ່ານ​ການ​ຄັດ​ເລືອກ ​ແລະ ຝຶກ​ແອບມາ​​ໄດ້ 6 ວັນ, ທາງ​ຄະນະ​ຮັບຜິດຊອບ​ ກອງ​ປະ​ກວດ​ໄດ້​ຄັດ​​ເລືອກ ​ເອົາ​ນ້ອງ​ນາງ​ສາວ ທີ່​ມາ​ຈາກສະ​ຖາ​ບັນ​ການ​ສຶກສາ ​ແລະ ​ພາກສ່ວນ​ຕ່າງໆ ອ້ອມ​ເທສະບານ​ເມືອງ ​ຫລວງ​ພະ​ບາງ ​ເຊິ່ງມີ​ຜູ້​ເຂົ້າ​ມາ​ຄັດ​ເລືອກ​ທັງ​ໝົດ 70 ກວ່າ​ຄົນ,​ ໃນ​ນັ້ນ​ກອງ​ປະ​ກວດ​ໄດ້​ຄັດ​ເລືອກ​ເອົາ 30 ນ້ອງ,​ ເປັນ​ຜູ້​ທີ່​ມີ​ມາດຖານ​, ມີ​ຄວາມ​ງາມ, ມີ​ຄວາມ​ພ້ອມ. ​​ເຊິ່ງນາງ​ສາວ​ຈຳນວນ 30 ຄົນ​ນີ້​ ຈະ​ໄດ້​ເປັນ​ຕົວ​ແທນ​ ໃຫ້​ແກ່​ເອື້ອຍ​ນ້ອງ​ແມ່ຍິງ​ ໃນ​ທົ່ວ​ເມືອງ​ ​ເຂົ້າ​ມາ​ຄັດ​ເພື່ອ​ຝຶກ​ຊ້ອມ ຂຶ້ນ​ປະ​ກວດ​​ນາງ​ສັງຂານ ​ປະ​ຈໍາປີ 2017.

ກາ​ນຝຶກ​ຊ້ອມ​ຄັ້ງ​ນີ້ ປະກອບ​ມີ ຝຶກ​​ແອບ​ການ​ຟ້ອນ​ລໍາວົງ​ລາວ, ມາລະຍາດ​ໃນ​ການ​ປາກ​ເວົ້າ ຫລື ​ ມາລະຍາດ​ໃນ​ການ​ຍ່າງ, ການວາງທ່າ, ການວາງ​ມື ລວມ​ໄປ​ເຖິງ​ ກິລິຍາມາລະຍາດ​ ຄະ​ນົບ​ທໍານຽມ​ ຕາມ​ແບບຊາວ​ຫລວງ​ພະ​ບາງ.

ຂໍ້ມູນຈາກ: ສຳນັກຂ່າວສານປະເທດລາວ