ຫມົດໃຈ!! ປືນກຽມເຊັ້ງອາເລັກຊິດໃຫ້ມ້າລາຍ

 

ອາເຊນອນ ພ້ອມແລ້ວທີ່ຈະປ່ອຍ ອາເລັກຊິດ ຊານເຊດ ກອງໜ້າຂອງທີມໃນຊຳເມີນີ້ ຫຼັງນັກເຕະມີແວວບໍ່ແຮັບປີກັບສະໂມສອນໂດຍມີ ຢູເວັນຕຸດ ສະແດງຄວາມສົນໃຈຢາກໄດ້ໄປເສີມທັບ ເນື່ອງຈາກເຝົ້າຈັບຕາເບິ່ງດາວຍິງ ຊີລີ ມາດົນແລ້ວ.

 

“ປືນໃຫຍ່” ອາເຊນອນ ສະໂມສອນຍັກໃຫຍ່ຈາກ ພຣີເມຍລີກ ຕົກເປັນຂ່າວວ່າພ້ອມທີ່ຈະປ່ອຍ ອາເລັກຊິດ ຊານເຊດ ຫົວຫອກໂຕເກັ່ງຂອງທີມອອກຈາກທີມໃນຊ່ວງພັກລະດູການນີ້ ໂດຍມີ ຢູເວັນຕຸດ ສະໂມສອນດັງຈາກ ກັນໂຊ ຊີຣີ ອາ ທີ່ໃຫ້ຄວາມສົນໃຈ ຈາກການລາຍງານເມື່ອວັນພຸດນີ້.

 

ຢູເວ ເຝົ້າຈັບຕາເບິ່ງສະຖານະການຂອງດາວຍິງທີມຊາດ ຊີລີ ຢ່າງໃກ້ຊິດ ແລະ ພະຍາຍາມທີ່ຈະດຶງໂຕມາຕັ້ງແຕ່ຕອນທີ່ຢູກັບ ອູດິເນເຊ ເມື່ອປີ 2011 ແລະ ກັບ ບາເຊໂລນາ ເມື່ອປີ 2014 ໂດຍຖ້າວ່າ ເຣອັນ ມາດຣິດ ໃຊ້ເງື່ອນໄຂດຶງໂຕ ອັນບາໂລ ໂມຣາຕາ ກັບໄປດ້ວຍລາຄາ 30 ລ້ານເອີໂຣ ພວກເຂົາກໍຈະນຳເງິນມາຊື້ກອງໜ້າໂຕໃໝ່ທົດແທນ ແລະ ອາເລັກຊິດ ກໍຢູ່ໃນລິສລາຍຊື່.

 

ຫຼ້າສຸດມີລາຍງານວ່າ ອາເຊນອນ ຈະມີການລົມກັບ ອາເລັກຊິດ ພາຍໃນບໍ່ເທົ່າໃດມື້ເພື່ອເບິ່ງວ່າເຂົາຍັງຕ້ອງການຢູ່ກັບທີມຕໍ່ໄປ ຫຼື ບໍ່ ຖ້ານັກເຕະບໍ່ຄິດທີ່ຈະຫຼິ້ນໃຫ້ກັບສະໂມສອນຕໍ່ໄປ ການຂາຍໃນຊ່ວງຊຳເມີນີ້ກໍມີສິດທີ່ຈະເກີດຂຶ້ນເພື່ອຫຼີກລ່ຽງກໍລະນີທີ່ຈະປ່ອຍສັນຍາຂອງນັກເຕະໝົດລົງ.

 

ກ່ອນໜ້ານີ້ ອາເລັກຊິດ ສະແດງຄວາມບໍ່ພໍໃຈ ຫຼັງເຂົາຖືກປ່ຽນໂຕອອກໃນເກມກັບ ນໍລິດ ຊີຕີ ແລະ ອອກຈາກສະໜາມໄປທັນທີໂດຍນັກເຕະໄດ້ພິສູດຕົນເອງມາແລ້ວໃນ ຊີຣີ ອາ ແລະ ອາດຈະບໍ່ຕ້ອງໃຊ້ເວລາຫຼາຍໃນການປັບໂຕກັບ ຢູເວ ຂະນະດຽວກັນກໍມີຂ່າວວ່າ ອາເຊນອນ ອາດແທນທີ່ນັກເຕະດ້ວຍ ໂມຣາຕາ ເນື່ອງຈາກ ເຣອັນ ມາດຣິດ ຕັ້ງໃຈທີ່ຈະຂາຍດາວເຕະທີມຊາດສະເປນເພື່ອເຮັດກຳໄລໃຫ້ໃນຊ່ວງຊຳເມີນີ້.