ສ ປ ປ ລາວ ເລັ່ງຄວາມພ້ອມເພື່ອນໍາສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກໃນໄວໆນີ້

ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ກະຊວງກະສິກຳ ແລະ ປ່າໄມ້ ຮ່ວມກັບ ອົງການປົກຄອງແຂວງຄຳມ່ວນ ແລະ ອົງການຈັດຕັ້ງສາກົນ ປະຈໍາ ສປປ.ລາວ ໄດ້ພ້ອມກັນປຶກສາຫາລືໃນກອງປະຊຸມສໍາມະນາດ້ານຂໍ້ມູນຂ່າວສານ ໃນການແນະນຳກ່ຽວກັບຂະບວນການຈັດຕັ້ງປະຕິບັດທີ່ກ່ຽວຂ້ອງເພື່ອນໍາສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກຂອງອົງການ (UNESCO) ເຊິ່ງຈັດຂຶ້ນໃນທ້າຍອາທິດຜ່ານມາ ທີ່ ນະຄອນຫລວງວຽງຈັນ ໂດຍການເປັນປະທານຂອງ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ມີບັນດາຜູ້ຕາງໜ້າກະຊວງກະສິກໍາ ແລະປ່າໄມ້ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານຮອງລັດຖະມົນຕີກະຊວງ ຖວທ ໄດ້ກ່າວວ່າ ກອງປະຊຸມໃນຄັ້ງນີ້ແມ່ນໄດ້ຮັບຟັງການລາຍງານຈາກຊ່ຽວຊານອາວຸໂສຂອງອົງການສາກົນເພື່ອການອະນຸຮັກທຳມະຊາດ (IUCN) ກ່ຽວກັບຜົນການສຶກສາເບື້ອງຕົ້ນຂອງຂະບວນການຈັດຕັ້ງປະຕິບັດທີ່ກ່ຽວຂ້ອງໃນການສະເໜີເຂດປ່າສະຫງວນດັ່ງກ່າວເຂົ້າເປັນມໍລະດົກໂລກ ໃນນັ້ນ ຜູ້ຊ່ຽວຊານໄດ້ແນະ ນຳເຖິງຂະບວນການຈັດຕັ້ງປະຕິບັດທີ່ກ່ຽວຂ້ອງ ພ້ອມທັງຂອບເຂດ ໄລຍະການດຳເນີນງານ ແລະ ມາດຕະຖານ ເພື່ອພິຈາລະນາຄຸນຄ່າອັນໂດດເດັ່ນທີ່ເປັນສາກົນ ແລະ ຍັງໄດ້ອະທິບາຍຄວາມກະຈ່າງແຈ້ງເຖິງອົງປະກອບ ຫລື ທາງເລືອກຕ່າງໆທີ່ເໝາະສົມສຳລັບການສະເໜີ ທັງໄດ້ປຶກສາຫາລື ແລະ ແລກປ່ຽນບັນດາຄຳຄິດຄຳເຫັນທີ່ກ່ຽວຂ້ອງ ເປັນຕົ້ນວຽກງານບູລິມະສິດທີ່ຈະຕ້ອງສຳເລັດໃນການຈັດຕັ້ງປະຕິບັດ ແລະ ຊ່ອງວ່າງສຳລັບການສະເໜີເຂດປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກ ຂອງອົງການອຸຍເເນັສໂກ ເຊິ່ງກອງປະຊຸມຍັງໄດ້ມີການສົນທະນາບັນຫາສໍາຄັນຕ່າງໆອີກຈໍານວນໝື່ງ ເພື່ອພ້ອມກັນແກ້ໄຂຂໍ້ຄົງຄ້າງໃນການຈັດຕັ້ງປະຕິບັດວຽກງານໃຫ້ມີເນື້ອໃນຄົບຖ້ວນສົມບູນ ເພື່ອນໍາສະເໜີຕໍ່ອົງການອຸຍເເນັສໂກ ເອົາປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກທາງດ້ານຊັບພະຍາກອນທຳມະຊາດເປັນແຫ່ງທຳອິດຂອງລາວ ຄາດວ່າຈະມີຂຶ້ນໃນໄວໆນີ້ ທັງນີ້ ພູຫີນໜາມໜໍ່ ນອກຈາກເປັນເຂດທີ່ມີທຳມະຊາດອັນງົດງາມ ແລະ ປົກຫຸ້ມດ້ວຍປ່າໄມ້ຢ່າງໜາແໜ້ນ ໃນພື້ນທີ່ກວ້າງກວ່າ 3.000 ເຮັກຕາແລ້ວ ຍັງເປັນແຫລ່ງທີ່ຢູ່ອາໄສຂອງຊ້າງປ່າຈຳນວນຫລາຍຮ້ອຍໂຕ ໂຮມທັງສັດປ່າຫາຍາກຫລາຍຊະນິດທີ່ໃກ້ຈະສູນພັນອີກດ້ວຍ.

ທີ່ມາ: ປະເທດລາວ Pathedlao