ສ້າງຕັ້ງຫ້ອງການສະພາການຄ້າຊາວຈີນຕ່າງດ້າວປະຈຳສປປລາວຢູ່ນະຄອນຫຼວງວຽງຈັນ

ພິທີສະຫຼອງການສ້າງຕັ້ງຫ້ອງການສະພາການຄ້າຊາວຈີນຕ່າງດ້າວປະຈຳສປປລາວ ໄດ້ຈັດຂຶ້ນຢູ່ໂຮງແຮມແລນດ໌ມາກຂອງນະຄອນຫຼວງວຽງຈັນເມື່ອວັນທີ 29 ກໍລະກົດນີ້. ເຂົ້າຮ່ວມພິທີມີທ່ານກ່ວນຮວາປິ່ງ, ເອກອັກຄະລັດຖະທູດຈີນປະຈຳລາວ, ທ່ານສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ, ທ່ານນາງເຂັມມະນີ ພົນເສນາ, ລັດຖະມົນຕີວ່າການກະຊວງອຸດສາຫະກຳການຄ້າ ພ້ອມດ້ວຍຜູ້ຕາງໜ້າພາກສ່ວນທີ່ກ່ຽວຂ້ອງຂອງລັດຖະບານລາວ, ຜູ້ຕາງໜ້າຂອງວິສາຫະກິດຈີນ, ຜູ້ຕາງໜ້າຂອງຊາວຈີນຕ່າງດ້າວແລະຊາວລາວເຊື້ອສາຍຈີນ.

ໃນພິທີດັ່ງກ່າວ, ທ່ານຈ່າງມິງຊຽງ, ປະທານສະພາການຄ້າຊາວຈີນຕ່າງດ້າວປະຈຳສປປລາວກ່າວວ່າ, ສະພາການຄ້າຊາວຈີນຕ່າງດ້າວປະຈຳສປປລາວ ແມ່ນອົງການການຄ້າທີ່ໄດ້ເຕົ້າໂຮມຜູ້ມີຄວາມຮູ້ຄວາມສາມາດໃນວົງການການຄ້າຂອງຊາວຈີນຕ່າງດ້າວ ແລະມີຂະໜາດໃຫຍ່ສົມຄວນ ໂດຍຕາມສະຖານະການພັດທະນາຂອງອາຊຽນ ແລະເສດຖະກິດໂລກາພິວັດ. ສະພາການຄ້າຈະນຳໃຊ້ທ່າແຮງຂອງຊາວຈີນຕ່າງດ້າວຢູ່ສປປລາວ, ປະກອບສ່ວນຢ່າງຕັ້ງໜ້າເພື່ອເພີ່ມທະວີແລະຊຸກຍູ້ການຮ່ວມມື, ການແລກປ່ຽນແລະການພັດທະນາລະຫວ່າງລັດຖະບານ, ວິສາຫະກິດ ແລະການຄ້າປະຊາຊົນຂອງສອງປະເທດ.

ທ່ານກ່ວນຮວາປິ່ງ, ເອກອັກຄະລັດຖະທູດຈີນປະຈຳລາວ ໄດ້ກ່າວຄຳປາໄສໃນພິທີວ່າ, ປັດຈຸບັນ, ການພົວພັນລະຫວ່າງຈີນກັບລາວ ໄດ້ຂະຫຍາຍຕົວຢ່າງໜັກແໜ້ນ, ການຮ່ວມມືທາງເສດຖະກິດການຄ້າກໍນັບມື້ນັບກວ້າງອອກ, ເຊິ່ງໄດ້ສ້າງອະນາຄົດແຫ່ງການພັດທະນາທີ່ບໍ່ເຄີຍມີມາກ່ອນແລະໂອກາດການຄ້າທີ່ກວ້າງໃຫຍ່ໄພສານໃຫ້ແກ່ຊາວຈີນຕ່າງດ້າວແລະຊາວລາວເຊື້ອສາຍຈີນ. ສະພາການຄ້າຊາວຈີນຕ່າງດ້າວປະຈຳສປປລາວ ແມ່ນອົງການຊາວຈີນຕ່າງດ້າວດ້ານການຄ້າລະດັບທົ່ວປະເທດລາວອົງການທຳອິດ, ແມ່ນເວທີໃໝ່ເພື່ອຊຸກຍູ້ການຮ່ວມມືດ້ານການຄ້າລະຫວ່າງນັກທຸລະກິດຈີນຢູ່ລາວ. ເຊື່ອໝັ້ນວ່າ, ສະພາການຄ້າດັ່ງກ່າວ ຈະສືບທອດເຊື້ອສາຍແລະມູນເຊື້ອຂອງຊາວຈີນຕ່າງດ້າວຢູ່ລາວທຸກເຊັ່ນຄົນ, ອີງໃສ່ກຳລັງຂອງຍຸກສະໄໝ, ເສີມຂະຫຍາຍຈຸດດີແລະທ່າແຮງຂອງຕົນ, ປະກອບສ່ວນໃໝ່ເຂົ້າໃນການຊຸກຍູ້ການສ້າງສະພາຊາວຈີນຕ່າງດ້າວທີ່ປອງດອງກັນ, ສົ່ງເສີມວັດທະນະທຳຈີນ, ຊຸກຍູ້ການເຕົ້າໂຮມເປັນເອກະພາບກັນໂດຍສັນຕິຂອງຈີນ ແລະຊຸກຍູ້ການຮ່ວມມືທາງເສດຖະກິດການຄ້າລະຫວ່າງຈີນກັບລາວ.

ທ່ານນາງເຂັມມະນີ ພົນເສນາ, ລັດຖະມົນຕີວ່າການກະຊວງອຸດສາຫະກຳການຄ້າລາວ ໄດ້ສະແດງຄວາມຊົມເຊີຍຕໍ່ການສ້າງຕັ້ງຫ້ອງການສະພາການຄ້າຊາວຈີນຕ່າງດ້າວປະຈຳສປປລາວ, ແລະກ່າວວ່າ, ສະພາການຄ້າແມ່ນຂົວທີ່ເຊື່ອມຕໍ່ລັດຖະບານກັບວິສາຫະກິດ, ແມ່ນກະບອກສຽງທີ່ນຳສົ່ງຄວາມຄິດຄວາມເຫັນຂອງວິສາຫະກິດໄປສູ່ລັດຖະບານ, ເພື່ອໃຫ້ລັດຖະບານສາມາດວາງກົດໝາຍຂໍ້ກຳນົດທີ່ມີຜົນດີຕໍ່ການພັດທະນາຂອງວິສາຫະກິດ, ແລະສ້າງສະພາບແວດລ້ອມທາງສັງຄົມທີ່ດີໃຫ້ແກ່ການພັດທະນາຂອງວິສາຫະກິດ. ທ່ານຍັງໄດ້ສະແດງຄວາມຫວັງຢ່າງຍິ່ງວ່າ, ສະພາການຄ້າຊາວຈີນຕ່າງດ້າວປະຈຳສປປລາວ ຈະຮ່ວມກັບສະພາການຄ້າຂອງປະເທດອື່ນໆ, ເພີ່ມທະວີການແລກປ່ຽນກັບສະຫະພັນອຸດສາຫະກຳການຄ້າລາວຕື່ມອີກ, ແລະຮັບໃຊ້ການພັດທະນາເສດຖະກິດ-ສັງຄົມຂອງລາວໃຫ້ດີຍິ່ງຂຶ້ນ.

ທີ່ມາ CRI-FM93