ສ້າງຄວາມເຂັ້ມແຂງ ໃນການຕິດຕາມແຜນງານ ສົ່ງເສີມບົດບາດຍິງ-ຊາຍ

ກົມ​ຮ່ວມ​ມື​ສາກົນ ກະຊວງ​ແຜນການ ​ແລະ ການ​ລົງທຶນ ​ໄດ້​ຈັດກອງ​ປະຊຸມ​ແລກປ່ຽນ​ບົດຮຽນ ​ໃນ​ຫົວ​ຂໍ້​ການ​ສ້າງ​ຄວາມ​ເຂັ້ມ​ແຂງ​​ໃນ​ການ​ຕິດຕາມ ​ການຈັດຕັ້ງ​ປະຕິບັດ​ແຜນ​ງານ ບົດບາດ​ຍິງ-ຊາຍ ໃຫ້​ພະນັກງານ​ລັດຖະກອນ ​ຜູ້​ທີ່​ກ່ຽວຂ້ອງ​ ໃນ​ການ​ປະຕິບັດ​ໂຄງການ ​​ເພື່ອ​ແນ​ໃສ່​ໃຫ້​ສາມາດ​ກະກຽມ, ຈັດຕັ້ງປະຕິບັດ, ຕິດຕາມ ​ແລະ ລາຍ​ງານ​ບັນດາ​ໜ້າ​ວຽກ ​ໃນ​ແຜນ​ປະຕິບັດ​ງານ ​ບົດບາດ​ຍິງ​-ຊາຍ ຂອງ​ໂຄງການ​ທີ່​ໄດ້​ຮັບ​ທຶນ ຈາກ​ທະນາຄານ​ພັດທະນາ​ອາຊີ ​ໃຫ້​ມີ​ປະສິດ​ພາບ ​ແລະ ປະສິດທິ​ຜົນ​ສູງ​ຍິ່ງ​ຂຶ້ນ.

ກ​ອງປະຊຸມ​ແລກປ່ຽນ​ ບົດຮຽນ​ດັ່ງກ່າວ​, ໄດ້​ຈັດ​ຂຶ້ນຢູ່​ນະຄອນຫລວງ​ວຽງ​ຈັນ, ​ໃນ​ວັນ​ທີ 24 ກັນຍາ 2015, ​ໂດຍການ​ເປັນ​ປະທານ​ຂອງ ທ່ານ​ນາງ ສີ​ສົມບູນ ອຸ​ນະ​ວົງ ຫົວໜ້າ​ກົມ​ຮ່ວມ​ມື​ສາກົນ ກະຊວງ​ແຜນການ ​ແລະ ການ​ລົງທຶນ ​ແລະ ທ່ານ ສະຕີ​ເວັນ ສຈີ​ປານີ ຊ່ຽວຊານ​ອາວຸ​ໂສ​ ຮັບຜິດຊອບ​ລວມດ້ານ​ການ​ຄຸ້ມ​ຄອງ ​ແລະ ບໍລິຫານ​ໂຄງການ​ຂອງທະ ນາຄານ​ພັດທະນາ​ອາຊີ ປະຈຳ ສປປ ລາວ, ​ມີ​ຜູ້​ຕາງໜ້າ ຈາກບັນດາ​ກະຊວງ ອ້ອມ​ຂ້າງ​ສູນ​ກາງ ​ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ໃນ​ກອງ​ປະຊຸມ​ ຜູ້​ເຂົ້າຮ່ວມ​ໄດ້​ແລກປ່ຽນ​ ​ແລະ ຖອດ​ຖອນບົດຮຽນ​ອັນ​ພົ້ນ​ເດັ່ນ ​ໃນ​ການ​ເຊື່ອມ​ສານ​ວຽກ​ງານ​ບົດ ບາດ​ຍິງ​-ຊາຍ ໃນ​ໂຄງການ​ຕ່າງໆ​ ຈາກ​ຫລາຍ​ຂະ​ແໜງ​ການ ​ທີ່​ແຕກ​ຕ່າງ​ກັນ, ພ້ອມ​ທັງ​ເຫັນ​ດີ​ ເປັນ​ເອກະ​ພາບ​ກັນ​ ໃນ​ບາດກ້າວ​ຕໍ່ໜ້າ ​ເພື່ອ​ເພີ່ມ​ທະວີ​ ຄວາມ​ອາດ​ສາມາດ ​ໃນ​ການຈັດຕັ້ງປະຕິບັດ ​ແລະ ຕິດຕາມ​ແຜນ ​ປະຕິບັດ​ງານ​ບົດບາດ​ຍິງ-ຊາຍ ທີ່​ສອດຄ່ອງ​ກັບ​ ຍຸດ​ທະ​ສາດ ​ສົ່ງ​ເສີມ​ຄວາມ​ກ້າວໜ້າ​ຂອງ​ແມ່ຍິງ ​ໃນ​ໄລຍະ​ປີ 2011-2015 ທີ່​ມີ​ຈຸດ​ມຸ້ງ​ໝາຍ​ ໃນ​ການ​ເຊື່ອມ​ສານ​ຄວາມ​ສະ​ເໜີ​ພາບ ​ລະຫວ່າງ​ຍິງ-ຊາຍ ​ເຂົ້າ​ໃນ​ທຸກຂະ​ແໜງ​ການ.

ທະນາຄານ​ພັດທະນາ​ອາຊີ ​ໄດ້​ໃຫ້ການ​ສະໜັບ​ສະ​ໜູນ​ຈຳນວນ 22 ​ໂຄງການ ​ໃນການຈັດຕັ້ງປະຕິບັດ​ແຜນ​ງານ ບົດບາດ​ຍິງ-ຊາຍ, ​​ເຊິ່ງການ​ສະໜັບ​ສະ​ໜູນດັ່ງກ່າວ ​ມີ​ຈຸດປະສົງ ​ເພື່ອ​ຮັບປະກັນ​ວ່າ​ທັງ​ຍິງ ​ແລະ ຊາຍ ມີ​ໂອກາດ​ເທົ່າ​ທຽມ​ກັນ ​ໃນ​ການ​ເຂົ້າຮ່ວມປະກອບສ່ວນ​ ໃນ​ບັນດາ​ກິດຈະກຳ​ຕ່າງໆ ທີ່​ໄດ້​ຮັບ​ການ​ສະໜັບ​ສະ​ໜູນ ຈາກ​ທະນາຄານ​ພັດທະນາ​ອາຊີ, ພ້ອມ​ທັງ​ມີ​ໂອກາດ ​ໄດ້​ຮັບ​ຜົນ​ປະ​ໂຫຍ​ດ ຈາກ​ການ​ຊ່ວຍ​ເຫລືອ​ດັ່ງກ່າວ ​ເທົ່າ​ທຽມ​ກັນ

ທີ່ມາ http://kpl.gov.la/