ສ່ຽວບອກມາ!! ກຣານິດບິນລອນດອນກຽມເຊັນສັນຍາກັບປືນ

ໝູ່ບອກເອງ ກຣານິດ ຊາກາ ມິດຟິວທີມຊາດສະເວິເຊີແລນຂອງທີມ ໂບຣຸສເຊຍ ມິວເຊັນກັດບັກ ຈະບິນມາລອນດອນເພື່ອເຈລະຈາຍ້າຍມາຢູ່ກັບ ອາເຊນອນ ໃຫ້ແລ້ວໄປ ຄາດວ່າຈະບິນມາພ້ອມກັບພໍ່ແມ່ວັນສຸກນີ້ ສ່ວນຄ່າໂຕອາດຈະຢູ່ທີ່ 30 ລ້ານເອີໂຣ.

 

ກຣານິດ ຊາກາ ກອງກາງທີມຊາດສະວິດເຊີແລນຂອງ ໂບຣຸສເຊຍ ມິວເຊັນກັດບັກ ທີມດັງຂອງລີກເຢຍລະມັນຈະບິນໄປລອນດອນເພື່ອເຈລະຈາເຊັນສັນຍາມາຮ່ວມທີມ “ປືນໃຫຍ່” ອາເຊນອນ ຢ່າງເປັນທາງການຈາກການເປີດໂປງຂອງໝູ່ຕໍ່ເນື່ອງຈາກທີ່ທີມ “ສິງໜຸ່ມ” ຢືນຢັນເມື່ອວັນອັງຄານທີ່ຜ່ານມາວ່າພວກເຂົາໄດ້ຮັບຂໍ້ສະເໜີຊື້ຕົວນັກເຕະແລ້ວ.

ອາເຊນອນ ເປັນຂ່າວກັບ ຊາກາ ມາດົນແລ້ວເພາະວ່າ ອາແຊນ ແວນເກີ ຕ້ອງການກອງກາງຄົນໃໝ່ເມື່ອມິເກວ ອາເຕຕາ ຫາກໍປະກາດຢຸດອາຊີບ ຂະນະທີ່ນັກເຕະຄົນອື່ນໆຄື ໂທມັສ ໂຣຊິກກີ ຫຼື ມາຕີເຢີ ຟາມິນີ ໂລຍລາແລ້ວ ແລະ ແບກຄວາມຫວັງທີມບໍ່ໄດ້ສ່ວນ ແຈັກ ວິວເຊຍ ເຖິງວ່າກັບມາຫຼິ້ນໄດ້ແຕ່ດ້ວຍການມີບັນຫາຄວາມສົມບູນມາຕະຫຼອດບໍ່ສາມາດນິ່ງນອນໃຈໄດ້.

 

ຕາມຂ່າວບອກວ່າທີມ “ປືນໃຫຍ່” ຕົກລົງຄ່າຕົວກັບ ກັດບັກ ໄດ້ທີ່ 30 ລ້ານເອີໂຣ ແລະ ຫຼ້າສຸດ ອາຕານ ມູອາຊີຣີ ນັກຂ່າວເພື່ອນສະນິດຂອງ ຊາກາ ໂພສຂໍ້ຄວາມພ້ອມພາບຂອງນັກເຕະລົງ ເຟສບຸກ ບອກວ່າ ຊາກາ ກຳລັງຈະບິນໄປລອນດອນເພື່ອຈັດການເລື່ອງການຍ້າຍທີມ.