ສົ່ງອັດຖິ ທະຫານອາສາສະໝັກ ຫວຽດນາມ 104 ອັດຖິ ຄືນສູ່ຖິ່ນກຳເນີດ

 ຄະນະສະເພາະກິດ 2 ຝ່າຍ ລາວ-ຫວຽດນາມ ​ຈັດ​ພິທີມອບ-ຮັບ ແລະ ຈັດສົ່ງອັດຖິ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫລະຊີວິດ ໃນປາງສົງຄາມຢູ່ລາວ ສົກປີ 2016-2017 ຈຳນວນ 104 ອົດ​ຖິ ກັບຄືນສູ່ປະເທດ ກໍ​ຄື ບ້ານເກີດເມືອງນອນ ຢ່າງສົມກຽດ, ໃນ​ວັນ​ທີ 10 ພຶດສະພາ 2017 ຢູ່​ຫ້ອງ​ວ່າການ​ປົກຄອງ ​ແຂວງ​ຊຽງ​ຂວາງ ​ໂດຍ​ມີຫົວໜ້າ​ຄະນະ ​ສະ​ເພາະ​ກິດ ​ແຂວງ​ຊຽງຂວາງ, ​ໄຊ​ສົມບູນ ​ແຂວງ​ວຽງ​ຈັນ ​ແລະ ຫົວໜ້າ​ສະ​ເພາະ​ກິດ ແຂວງເຫງະອານ ສສ ຫວຽດນາມ ​ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.​

ໂອກາດ​ນີ້, ຄະນະ​ສະ​ເພາະ​ກິດ​ແຕ່ລະ​ແຂວງ​ ຕ່າງ​ກໍ​ໄດ້ສະຫລຸບ ຕີລາຄາການຮ່ວມມື ຊີ້ນຳວຽກງານສະເພາະກິດ ສົກປີ 2016-2017 ສາມາດຂຸດຄົ້ນ ຊອກຄົ້ນທ້ອນໂຮມໄດ້ 104 ອັດຖິ ໃນນີ້ແຂວງ ຊຽງຂວາງ ສາມາດຂຸດຄົ້ນທ້ອນໂຮມໄດ້ 90 ອັດຖິ, ໄຊສົມບູນ ​ໄດ້ 9 ອັດຖິ ແລະ ແຂວງວຽງຈັນ ໄດ້ 5 ອັດຖິ. ​ເຊິ່ງການຂຸດຄົ້ນທ້ອນໂຮມອັດຖິ ແມ່ນມີຄວາມຫຍຸ້ງຍາກ ຄືປີຜ່ານມາ ຍ້ອນຂຸມຝັງສົບໄດ້ຜ່ານໄລຍະ ເວລາອັນຍາວນານ, ພື້ນທີ່ການຊອກຄົ້ນ ມີການປ່ຽນແປງ, ທຸລະກັນດານ, ກະແຈກກະຈາຍ, ສະ ພາບດິນຟ້າອາກາດ ບໍ່ເອື້ອອຳນວຍ ແລະ  ເສັ້ນທາງຄົມມະນາຄົມ ພົບຄວາມຫຍຸ້ງຍາກ.

ຂໍ້ມູນຈາກ: ສຳນັກຂ່າສານປະເທດລາວ