ສົງຄາມນາງຟ້າ!!ບູຊາດເຜີຍມາເຣຍບໍ່ຄວນໄດ້ຫຼິ້ນອີກ

 

ຕົວຢ່າງບໍ່ດີ!! ຢູຈີນີ ບູຊາດ ນັກເທັນນິດສາວການາດາອອກຄວາມເຫັນແບບບໍ່ຢັ້ງ ມາເຣຍ ຊາຣາໂປວາ ນັກເທັນຈາກແດນໝີຂາວເປັນພວກຂີ້ຫຼັກຫຼັງຖືກກວດພົບວ່າໃຊ້ສານກະຕຸ້ນປີກາຍຈົນຖືກແບນຍາວ ພວກແບບນີ້ບໍ່ຄວນໄດ້ຮັບໄຟຂຽວໃຫ້ກັບມາຫຼິ້ນອີກ ເຫດຜົນຍ້ອນວ່າບໍ່ຍຸຕິທຳກັບນັກກິລາຄົນອື່ນທີ່ແຂ່ງຂັນກັນຢ່າງຖືກຕ້ອງ.

 

ຢູຈີນີ ບູຊາດ ນັກເທັນນິດສາວການາດາອອກມາຕຳນິ ມາເຣຍ ຊາຣາໂປວາ ວ່າເປັນພວກຂີ້ຫຼັກ ແລະ ບໍ່ຄວນໄດ້ຮັບອະນຸຍາດໃຫ້ກັບມາແຂ່ງໄດ້ອີກ ຫຼັງຈາກທີ່ກ່ອນໜ້ານີ້ຖືກລົງໂທດແບນເນື່ອງຈາກວ່າບໍ່ຜ່ານການກວດສານກະຕຸ້ນ.

 

ຊາຣາໂປວາ ເຈົ້າຂອງແຊມ ແກຣນສະແລມ 5 ລາຍການຖືກລົງໂທດແບນ 15 ເດືອນຫຼັງຈາກຖືກກວດພົບວ່າໃຊ້ສານກະຕຸ້ນປະເພດເມວໂດນຽມ ເຊິ່ງມີຜົນຊ່ວຍໃຫ້ຫົວໃຈໃຊ້ອົກຊີແຊນໜ້ອຍລົງ ແລະ ຊ່ວຍເຮັດໃຫ້ເນື້ອເຫຍື່ອຂອງກ້າມຊີ້ນບໍ່ເກີດຄວາມເສຍຫາຍໃນລາຍການ ອັອດສະເຕເລຍ ໂອເພນ ເມື່ອປີທີ່ຜ່ານມາ ຂະນະທີ່ຫຼ້າສຸດໄດ້ສິດພິເສດໃຫ້ຮ່ວມລົງແຂ່ງຂັນໃນຖານະມືໄວກາດໃນລາຍການ ພອດ ເທັນນິດ ກຣັງປຣີ ທີ່ປະເທດເຢຍລະມັນຫຼັງຈາກທີ່ພົ້ນໂທດແບນແລ້ວ ແລະ ສາມາດເອົາຊະນະ ໂຣແບຕາ ວິນຊີ ຄູ່ແຂ່ງຈາກອີຕາລີໄປ 2 ເຊັດລວດໃນຮອບທຳອິດ.

 

ເມື່ອຖືກຖາມກ່ຽວກັບການທີ່ ຊາຣາໂປວາ ໄດ້ສິດພິເສດໃຫ້ລົງແຂ່ງໃນຖານະມືໄວກາດໃນເຢຍລະມັນລວມທັງທົວນາເມັນໃນນະຄອນມາດຣິດ ແລະ ໂຣມທີ່ກຳລັງຈະມາຮອດນັ້ນ ບູຊາດ ກ່າວວ່າ “ເຂົາເປັນພວກຂີ້ຫຼັກ ດັ່ງນັ້ນສຳລັບຂ້ອຍແລ້ວຂ້ອຍຄິດວ່າຄົນແບບນີ້ບໍ່ຄວນໄດ້ຮັບອະນຸຍາດໃຫ້ລົງແຂ່ງຂັນໃນກິລານັ້ນອີກ ມັນບໍ່ຍຸຕິທຳສຳລັບນັກກິລາຄົນອື່ນໆທີ່ເຮັດຖືກຕ້ອງ ແລະ ເປັນຈິງ”.

 

“ຂ້ອຍຄິດຈາກມູມມອງຂອງນັກເທັນນິດຍິງວ່າ ມັນເປັນການສົ່ງຂໍ້ມູນຜິດໆເຖິງນັກເທັນນິດດາວລຸ້ງວ່າ ຂີ້ຫຼັກໄດ້ເລີຍ ແລະ ເຮົາພ້ອມອ້າແຂນຕ້ອນຮັບເຈົ້າກັບມາອີກ ຂ້ອຍບໍ່ຄິດວ່າມັນເປັນເລື່ອງຖືກຕ້ອງ ເຂົາບໍ່ແມ່ນຄົນທີ່ຂ້ອຍສາມາດເວົ້າວ່າ ຂ້ອຍເປັນຕົວຢ່າງໄດ້ອີກຕໍ່ໄປເພາະມັນເຮັດໃຫ້ຂ້ອຍຜິດຫວັງໜ້ອຍໜຶ່ງ” ບູຊາດ ກ່າວ.