ສົກຮຽນ 2017-2018 ມະຫາວິທະຍາໄລວິທະຍາສາດສຸຂະພາບຈະຮັບນັກສຶກສາພຽງ 500 ກວ່າຄົນ

ທ່ານຮອງຫົວໜ້າຫ້ອງການມະຫາວິທະຍາໄລວິທະຍາສາດສຸຂະພາບ ໃຫ້ຮູ້ວ່າ: ສົກຮຽນປີ 2017-2018 ນີ້, ມະຫາໄລວິທະຍາໄລພວກເຮົາຈະຮັບນັກສຶກສາພຽງແຕ່ 500 ກວ່າຄົນເທົ່ານັ້ນ ແລະ ການເປີດຂາຍແບບສອບເສັງເຂົ້າຮຽນແມ່ນໄດ້ເລີ່ມແຕ່ທ້າຍເດືອນມິຖຸນາເປັນຕົ້ນມາ ແລະ ຈະປິດການຂາຍແບບສອບເສັງໃນວັນທີ 21 ກໍລະກົດ ແລະ ວັນທີ 29 ກໍລະກົດນີ້ແມ່ນມື້ສອບເສັງຢ່າງເປັນທາງການ, ມາຮອດປັດຈຸບັນມີນັກສຶກສາໄດ້ມາລົງທະບຽນສອບເສັງແລ້ວຫລາຍກວ່າ 5 ພັນຄົນ. ຊຶ່ງສູນສອບເສັງໃຫຍ່ໄດ້ກໍານົດເອົາມະຫາວິທະຍາໄລວິທະຍາສາດສຸຂະພາບ, ສ່ວນຈຸດສອບເສັງຍ່ອຍມີຄື: ວິທະຍາເຂດທາດດໍາ, ວິທະຍາເຂດເພຍວັດ, ວິທະຍາເຂດດອນກອຍ, ວິທະຍາໄລເຕັກນິກປາກປ່າສັກ, ໂຮງຮຽນມັດທະຍົມປາຍໂຮຈິມິງ, ໂຮງຮຽນມັດທະຍົມອານຸວົງ ແລະ ວິທະຍາໄລວຽງຈັນ-ຮ່າໂນ້ຍ, ນະຄອນຫລວງວຽງຈັັນ, ໂດຍຫ້າມນັກສອບເສັງນໍາເອົາເອກະສານ, ອຸປະກອນສື່ສານເຂົ້າຫ້ອງສອບເສັງເດັດຂາດ ເປັນຕົ້ນ: ຈັກຄິດໄລ່, ໂທລະສັບມືຖື, ຖ້ານັກສອບເສັງຄົນໃດລະເມີດແມ່ນຈະຖືກຕັດສິດສອບເສັງທັນທີ.

ຮອງຫົວໜ້າຫ້ອງການດັ່ງກ່າວ ໃຫ້ຮູ້ວ່າ: ປັດຈຸບັນມະຫາວິທະຍາໄລວິທະຍາສາດສຸຂະພາບມີຫລັກສູດການຮຽນ-ການສອນສອງລະບົບຄື: ລະບົບປະລີນຍາຕີມີ 9 ສາຂາຄື: ແພດສາດ, ການຢາ, ທັນຕະສາດ, ພະຍາບານ, ພະດຸງຄັນ, ວິເຄາະການແພດ, ກາຍຍະພາບບໍາບັດ, ຢາພື້ນເມືອງ ແລະ ເຕັກນິກລັງສີ ແລະ ລະດັບອະນຸປະລິນຍາຕີີມີສາຂາການຢາ, ວິເຄາະການແພດ, ລັງສີຮູບພາບການແພດ ແລະ ຊ່າງທັນຕະກໍາ (ຜະລິດແຂ້ວທຽບ).

ຂໍ້ມູນຈາກ: ໜັງສືພີມລາວພັດທະນາ Laophattana News