ສູ້ຕໍ່!!ຊໍປະຕິເສດຍ້າຍທີມແບບສັນຍາເຊົ່າ

 

ເດິ ຊັນ ສື່ຂອງອັງກິດລະບຸ ລຸກ ຊໍ ຟູແບັກຂອງ ແມນ ຢູໄນເຕັດ ຈະຂໍຢູ່ກັບທີມຕໍ່ໄປ ແລະ ບໍ່ຄິດຍ້າຍໄປຫຼິ້ນແບບຢືມໂຕກັບບ່ອນອື່ນເຖິງວ່າຈະມີຂ່າວວ່າ ພາເຫຼດ ຢາກໄດ້ເຂົາໄປຮ່ວມທັບກໍຕາມ.

 

ລຸກ ຊໍ ແບັກຊ້າຍ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ປະຕິເສດທີ່ຈະຍ້າຍໄປຫຼິ້ນກັບທີມອື່ນດ້ວຍສັນຍາເຊົ່າ ແລະ ຕັດສິນໃຈທີ່ຈະຂໍຢູ່ສູ້ຕຳແໜ່ງໃນທີມຕໍ່ໄປ ຕາມການລາຍງານຂອງ ເດິ ຊັນ ສື່ຊື່ດັງຂອງເມືອງຜູ້ດີ.

 

ລະດູການນີ້ ຊໍ ໄດ້ລົງຫຼິ້ນໃນທຸກລາຍການໃຫ້ທີມໄປ 12 ນັດແຕ່ມັນມີການລືກັນວ່າອະນາຄົດຂອງເຂົາເຕັມໄປດ້ວຍຄວາມບໍ່ແນ່ນອນຫຼັງຈາກທີ່ເຂົາຖືກ ໂຊເຊ ມູຣິນໂຢ ຜູ້ຈັດການທີມຕຳໜິຢ່າງໜັກ.

 

ທັງນີ້ ມີຂ່າວລືວ່າ ຄຣິສຕັນ ພາເຫຼດ ສົນໃຈທີ່ຈະດຶງ ຊໍ ໄປຮ່ວມທີມເຊິ່ງມັນຈະເຮັດໃຫ້ເຂົາມີໂອກາດໄດ້ເປັນຕົວຈິງໃນທຸກອາທິດ ແຕ່ຫຼ້າສຸດ ເດິ ຊັນ ລະບຸວ່າດາວເຕະທີມຊາດອັງກິດຕ້ອງການຢູ່ກັບ “ຜີສາດແດງ” ຕໍ່ໄປເພື່ອພະຍາຍາມຢຶດຕໍາແໜ່ງຕົວຈິງໃຫ້ໄດ້.