ສຸດໃຈ!! ຟານກາວ ຍົກຜີຫຼິ້ນດີເກມທຸບເຮືອ

 

ຫຼຸຍ ຟານກາວ ນາຍໃຫຍ່ ແມນເຊສເຕີ ຢູໄນເຕັດ ຍົກນິ້ວຍ້ອງລູກທີມທີ່ຫຼິ້ນໄດ້ດີໃນເກມຊະນະ ແມນຊີຕີ 1-0 ພ້ອມຍົກໃຫ້ໄຊຊະນະຄັ້ງນີ້ເປັນສິ່ງທີ່ສຳຄັນທີ່ສຸດເພາະມັນຊ່ວຍໃຫ້ “ຜີສາດແດງ” ໄລ່ຈີ້ “ເຮືອໃບສີຟ້າ” ທີ່ເປັນອັນດັບ 4 ເຫຼືອພຽງ 1 ຄະແນນເທົ່ານັ້ນພ້ອມທັງຍ້ອງ ມາຄັສ ຣັສຝອດ ຮີໂຣຂອງທີມໃນເກມນີ້ດ້ວຍ.

 

ຫຼຸຍ ຟານກາວ ຜູ້ຈັດການທີມ ແມນເຊສເຕີ ຢູໄນເຕັດ ກ່າວຍ້ອງລູກທີມທີ່ຫຼິ້ນໄດ້ໜ້າປະທັບໃຈຈົນເຮັດໃຫ້ບຸກໄປຊະນະ ແມນເຊສເຕີ ຊີຕີ 1-0 ຮອດສະໜາມ ເອຕິຮັດ ສະເຕດຽມ ໃນເກມລີກນັດດາບີແມັດເມືອງ ແມນເຊສເຕີ ເມື່ອວັນອາທິດທີ່ຜ່ານມາ.

 

ປະຕູດຽວໃນເກມນີ້ມາຈາກຜົນງານຂອງ ມາຄັສ ຣັສຝອດ ກອງໜ້າດາວລຸ້ງຂອງທີມສົ່ງຜົນໃຫ້ ແມນຢູ ເກັບເພີ່ມເປັນ 50 ຄະແນນຈາກການລົງຫຼິ້ນ 30 ນັດໂດຍເຖິງວ່າຈະຢູ່ທີ 6 ຂອງຕາຕາລາງຄະແນນຄືເກົ່າແຕ່ພວກເຂົາກໍມີຄະແນນເທົ່າກັບ ເວສແຮມ ຢູໄນເຕັດ ທີ່ເປັນອັນດັບ 5 ແລະ ນຳຫຼັງ ແມນ ຊີຕີ ເຊິ່ງປັດຈຸບັນຢູ່ອັນດັບ 4 ພຽງ 1 ຄະແນນເທົ່ານັ້ນ.

 

ຟານກາວ ເຜີຍວ່າ “ເຮົາຫຼິ້ນໄດ້ດີຫຼາຍໃນເຄິ່ງທຳອິດໂດຍທີ່ໄດ້ປະຕູຂຶ້ນນຳ ແລະ ມີໂອກາດທີ່ຈະເພີ່ມໄດ້ ຂະນະດຽວກັນເຮົາກໍບໍ່ປ່ອຍໃຫ້ພວກເຂົາມີໂອກາດເຮັດປະຕູໄດ້ຄືກັນໃນເຄິ່ງຫຼັງເຮົາກໍຕ້ອງເລີ່ມກັນໃໝ່ເຊິ່ງເຮົາກໍເລີ່ມກັນໄດ້ດີແຕ່ຫຼັງຈາກນັ້ນເຮົາກໍຕ້ອງກັດແຂ້ວສູ້ຈົນຮອດນາທີສຸດທ້າຍ ເພາະເຮົາເມື່ອຍຈາກການຫຼິ້ນເກມເມື່ອວັນພະຫັດ ຂະນະທີ່ພວກເຂົາຫຼິ້ນໃນວັນອັງຄານນັ້ນໝາຍຄວາມວ່າພວກເຂົາໄດ້ພັກຫຼາຍກວ່າເຮົາ 2 ມື້ ເຊິ່ງມັນຖືເປັນເລື່ອງສຳຄັນຫຼາຍ”.

 

“ມື້ນີ້ຂ້ອຍພູມໃຈສຸດ ມັນເປັນໄຊຊະນະທີ່ສຳຄັນ ກອ່ນໜ້ານີ້ຊ່ອງວ່າງມັນຢູ່ທີ 4 ແຕ້ມແຕ່ຕອນນີ້ເຫຼືອພຽງ 1 ຄະແນນແລ້ວ ເຮົາຍັງມີຄະແນນເທົ່າກັບ ເວສແຮມ ຢູໄນເຕັດ ເຊິ່ງມັນຖືເປັນເລື່ອງສຳຄັນຫຼາຍ ແມ່ນຫຍັງສາມາດເກີດຂຶ້ນໄດ້ແນ່ ຂ້ອຍບອກບໍ່ໄດ້ດອກແຕ່ເຮົາບໍ່ຕ້ອງລົງຫຼິ້ນໃນວັນພະຫັດອີກແລ້ວ ແລະ ມັນຖືເປັນເລື່ອງທີ່ດີ” ນາຍໃຫຍ່ ຜີສາດແດງ ກ່າວ.

 

ນາຍໃຫຍ່ຈາກຖິ່ນ ໂອນ ທຣາຟເຟິດ ກ່າວຍ້ອງ ຣັສຝອດ ພ້ອມທັງສະແດງຄວາມເຫັນໃຈ ມາຕິນ ເດມິເຄລິສ ກອງຫຼັງ ແມນຊີຕີ ທີ່ຖືກດາວລຸ່ງຈັດການຈົນຫົວປັ່ນເຊັ່ນກັນ “ຣັສຝອດ ໄວຫຼາຍ ແລະ ເດມິເຄລິສ ກໍເບິ່ງຈະຖືກເຂົາປັ່ນປ່ວນແລ້ວ ເຂົາເປັນກອງຫຼັງທີ່ເກັ່ງຫຼາຍ ເຂົາເປັນເຊັນເຕີແບັກໃຫ້ຂ້ອຍສະໄໝຢູ່ທີ່ ບາເຢິນ”.