ສື່ເຜີຍປືນທຸ່ມທະນະບັດມະສາຫານຫວັງດຶງກຣິສມັນ

 

“ປືນໃຫຍ່” ອາເຊນອນ ວາງແຜນການສູງຫວັງຫັກເອິກ “ຜີສາດແດງ” ແມນ ຢູໄນເຕັດ ອະລິຮ່ວມລີກໂດຍການທຸ່ມເງິນ 86 ລ້ານປອນຫວັງດຶງ ອັອງຕວນ ກຣິສມັນ ກອງໜ້າທີມຊາດຝຣັ່ງຂອງ “ກາໝີ” ແອັດ ມາດຣິດ ເຂົ້າຮັງ ຈາກການເປີດເຜີຍຂອງ ເດລີ ເມວ ສື່ດັງຂອງເມືອງຜູ້ດີ.

 

ອາເຊນອນ ເຄີຍພະຍາຍາມດຶງນັກເຕະຄົນນີ້ມາແລ້ວເມື່ອຊຳເມີຜ່ານມາ ຫຼ້າສຸດລາຍງານລະບຸວ່າພວກເຂົາຍັງບໍ່ຍອມຍົກທຸງຂາວງ່າຍໆ ແລະ ກຳລັງພິຈາລະນາຄ່າຈີກສັນຍາ 86 ລ້ານປອນຂອງ ກຣິສມັນ ເຊິ່ງຖືວ່າສູງກວ່າຄ່າຫົວ 42 ລ້ານປອນທີ່ສະໂມສອນທຸ່ມສະຖິຕິຊື້ ເມຊຸດ ໂອຊິວ ຈາກ ເຣອັນ ມາດຣິດ ເມື່ອປີ 2013 ກວ່າສອງເທົ່າ.

 

ຢ່າງໃດກໍຕາມທາງ ແມນ ຢູໄນເຕັດ ເບິ່ງຄືຈະໝັ້ນໃຈຫຼາຍກວ່າວ່າເປົ້າໝາຍນີ້ບໍ່ໜ້າຈະຫຼຸດລອດໄປໄດ້ເນື່ອງຈາກພວກເຂົາຫວັງໃຫ້ ປໍ ປັອກບາ ສ່ຽວຮັກສ່ຽວແພງຊ່ວຍໂນ້ມນ້າວ ກຣິສມັນ ນອກຈາກນີ້ “ຜີສາດແດງ” ຍັງພ້ອມສະເໜີເມື່ອຍໃຫ້ຫຼາຍກວ່າທີ່ ອາເຊນອນ ພ້ອມໃຫ້ຄື 250,000 ປອນຕໍ່ອາທິດ.

 

ແຕ່ເຖິງແບບນັ້ນອາດມີກໍລະນີທີ່ອາດຈະເຮັດໃຫ້ສະຖານະການປີ້ນຜັນເປັນ ອາເຊນອນ ໄດ້ປຽບຄືການຍອມໃຫ້ ອະເລັກຊິດສ໌ ຊານເຊດ ເປັນສ່ວນໜຶ່ງໃນການເຮັດສັນຍາແລກຕົວນຳເພາະທາງ “ກາໝີ” ສົນໃຈອະດີດດາວເຕະຂອງ ບາເຊໂລນາ ເຊັ່ນດຽວກັນ.