ສື່ເຜີຍ!! ບາຊາຕົກລົງດຶງຊົວເຣດໄດ້ແລ້ວ

 

ສື່ກະທິງຕີຂ່າວ ບາເຊໂລນາ ບັນລຸຂໍ້ຕົກລົງເລື່ອງການດຶງ ເດນິສ ຊົວເຣດ ກອງກາງຈອມລຸຍຂອງ ບີຢາເຣອັນ ກັບມາສູ່ທີມເປັນຮອບທີສອງໄດ້ແລ້ວຫຼັງຈາກທີ່ ບາຊາ ບໍ່ສາມາດຕົກລົງເລື່ອງຄ່າເມື່ອຍຂອງນັກເຕະໄດ້ໃນກ່ອນໜ້ານີ້.

 

“ສະປອດ” ໜັງສືພິມຊື່ດັງຂອງສະເປນລາຍງານຂ່າວເມື່ອວັນອາທິດທີ່ຜ່ານມາວ່າ ບາເຊໂລນາ ມະຫາອຳນາດລູກໜັງຂອງ ລາ ລີກາ ໄດ້ບັນລຸຂໍ້ຕົກລົງເລື່ອງການດຶງ ເດນິສ ຊົວເຣດ ກອງກາງດາວລຸ້ງຂອງ ບີຢາເຣອັນ ກັບມາສູ່ຖິ່ນ ແຄມນູ ອີກເທື່ອໄດ້ແລ້ວ.

 

ກ່ອນໜ້ານີ້ ບາເຊໂລນາ ໄດ້ໃສ່ເງື່ອນໄຂຊື້ກອງກາງດາວລຸ້ງກັບຮັງໄດ້ດ້ວຍໃນລາຄາ 3.5 ລ້ານເອີໂຣລົງໄປໃນສັນຍາຂອງນັກເຕະຕອນຍ້າຍໄປຢູ່ກັບ “ເຮືອດຳນ້ຳສີເຫຼືອງ”  ແລະ ຊ່ວງທີ່ຜ່ານມາພວກເຂົາຕົກເປັນຂ່າວຫວັງດຶງມາຮ່ວມທີມ ແຕ່ຍັງບໍ່ສາມາດຕົກລົງເລື່ອງຄ່າເມື່ອຍຂອງ ຊົວເຣດ ໄດ້.

 

ຢ່າງໃດກໍຕາມ ຫຼັງຈາກທີ່ມີບັນຫາມາຫຼາຍເດືອນ ຫຼ້າສຸດທີມຂອງ ຫຼຸຍ ເອັນຣິເກ ຕົກລົງເລື່ອງດຶງ ຊົວເຣດ ໄດ້ແລ້ວ ແລະ ເຂົາຈະກາຍເປັນການເຊັນສັນຍາຄົນທຳອິດຂອງ ບາຊາ ໃນວັນທີ 1 ກໍລະກົດນີ້.