ສື່ເຜີຍ!!ຜີຕົກລົງຂາຍເດີປາຍໃຫ້ໂອແອວ

 

ເມສຟິສ ເດີປາຍ ໃກ້ແລ້ວທີ່ຈະຍ້າຍໄປຮ່ວມທີມ ໂອລິມປິກ ລີຢົງ ເມື່ອຫຼ້າສຸດ “ຜີສາດແດງ” ຕົກລົງຂາຍໃຫ້ ໂອແອວ ຮຽບຮ້ອຍໂດຍຄ່າຫົວຂັ້ນຕົ້ນຢູ່ທີ່ 16 ລ້ານປອນ.

 

ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ຕົກລົງຂາຍ ເມມຟິສ ເດີປາຍ ໃຫ້ກັບ ໂອລິມປິກ ລີຢົງ ສະໂມສອນດັງຂອງ ລີກແອັງ ຮຽບຮ້ອຍແລ້ວດ້ວຍຄ່າຕົວທີ່ອາດຈະສູງເຖິງ 21.6 ລ້ານປອນ ຕາມການລາຍງານຈາກ ເດລີ ເມວ ສື່ຊັ້ນນຳຂອງເມືອງຜູ້ດີເມື່ອວັນພຸດທີ່ຜ່ານມາ.

 

ດາວເຕະອາຍຸ 22 ປີຍ້າຍຈາກ ພີເອສວີ ໄອໂຮເຟັນ ມາຮ່ວມທັບ “ຜີສາດແດງ” ເມື່ອຊ່ວງຊໍາເມີປີ 2015 ແຕ່ລະດູການນີ້ກາຍເປັນນັກເຕະທີ່ຖືກລືມ ເມື່ອໄດ້ລົງຫຼິ້ນໃນເກມ ພຣີເມຍລີກ ພຽງແຕ່ 20 ນາທີເທົ່ານັ້ນ ພາຍໃຕ້ການນຳທັບຂອງ ໂຊເຊ ມູຣິນໂຢ.

 

ເດີປາຍ ໄດ້ຮັບຄວາມສົນໃຈຈາກຫຼາຍສະໂມສອນເຊິ່ງກໍລວມເຖິງ ປາຣີ ແຊັງ-ແຊກແມັງ ແຕ່ຫຼ້າສຸດ ເດລີ ເມວ ລະບຸວ່າ ແມນ ຢູໄນເຕັດ ໄດ້ຕົກລົງຂາຍເຂົາໃຫ້ກັບ ລີຢົງ ຮຽບຮ້ອຍດ້ວຍຄ່າຕົວຂັ້ນຕົ້ນທີ່ 16 ລ້ານປອນ ແລະ ຄ່າຕົວເຂົາອາດຈະເພີ່ມຂຶ້ນອີກດ້ວຍຖ້າວ່າ ລີຢົງ ໄດ້ຫຼິ້ນຖ້ວຍ ຢູຟາ ແຊມປຽນ ລີກ ລະດູການໜ້າ ແລະ ຕົວນັກເຕະໄດ້ເຊັນສັນຍາສະບັບໃໝ່ກັບ ໂອແອວ.

 

ນອກຈາກນີ້ຕາມລາຍງານຂ່າວຍັງລະບຸອີກວ່າ ແມນ ຢູໄນເຕັດ ໄດ້ໃສ່ເງື່ອນໄຂຊື້ກັບ ແລະ ຂາຍຕໍ່ລົງໄປໃນຂໍ້ຕົກລົງອີກນຳ.