ສື່ຜູ່ດີເຜີຍຜີແດງຈັດໜັກກຽມດຶງໂດ້ກັບຮັງເກົ່າ

 

ແມນ ຢູໄນເຕັດ ເອົາແທ້ກັບການຈັດການດຶງ ຄຣິສຕຽນໂນ ໂຣເນົາໂດ ກັບມາອີກຄັ້ງຫຼັງສື່ເຜີຍວ່າວາງແຜນຍື່ນ ດາບິດ ເດ ເຄອາ ມືກາວເລືອດກະທິງບວກກັບເມັດເງິນມະຫາສານເປັນສະຖິຕິໂລກໃຫ້ກັບ ເຣອັນ ມາດຣິດ ພິຈາລະນາແລກກັບການດຶງໂຄດມະຫາແຄ່ງເທບມາໃສ່ເສື້ອ “ຜີສາດແດງ” ອີກເທື່ອ.

ແມນເຊສເຕີ ຢູໄນເຕັດ ກຽມທຸ່ມເງິນ 175 ລ້ານປອນພ້ອມກັບ ດາບິດ ເດ ເຄອາ ນາຍທະວານມືກາວຂອງທີມເປັນສ່ວນໜຶ່ງໃນຂໍ້ສະເໜີເພື່ອດຶງຕົວ ຄຣິສຕຽນໂນ ໂຣເນົາໂດ ປີກຊຸບເປີສະຕາຂອງ ເຣອັນ ມາດຣິດ ກັບມາສູ່ຖິ່ນ ໂອນ ທຣາຟເຟິດ ຊ່ວງຊຳເມີນີ້ຈາກການລາຍງານຂອງ ເດິ ມິນເລີ ສື່ເມືອງຜູ່ດີເມື່ອວັນຈັນທີ່ຜ່ານມາ.

ກ່ອນໜ້ານີ້ “ອາ ໂບລາ” ສື່ແດນຝອຍທອງລາຍງານຂ່າວສະທ້ານໂລກວ່າກັບຕັນທີມຊາດປັອກຕຸຍການຕັດສິນໃຈທີ່ຈະອຳລາຖິ່ນ ຊານຕິອາໂກ ເບີນາເບວ ຊຳເມີນີ້ ແລະ ໄດ້ແຈ້ງເລື່ອງໃຫ້ ຟລໍເຣັນຕິໂນ ເປເຣດ ປະທານສະໂມສອນ “ລາຊາຊຸດຂາວ” ຮັບຊາບຮຽບຮ້ອຍແລ້ວ ພ້ອມຢືນຢັນວ່າຈະບໍ່ປ່ຽນໃຈແນ່ນອນ ເນື່ອງຈາກວ່າໂມໂຫເບື່ອນ່າຍທີ່ຖືກເຈົ້າໜ້າທີ່ກົມພາສີ-ອາກອນຂອງສະເປນກ່າວວ່າລ່ຽງພາສີຈຳນວນເຖິງ 14.7 ລ້ານເອີໂຣລະຫວ່າງປີ 2001-2014.

ທາງດ້ານຂອງ ເດ ເຄອາ ຕົກເປັນເປົ້າໝາຍຂອງ ເຣອັນ ມາດຣິດ ມາດົນ ແລະ ເຄີຍເກືອບຍ້າຍໄປຢູ່ກັບ “ລາຊາຊຸດຂາວ” ແລ້ວຊ່ວງຊຳເມີປີ 2015 ແຕ່ກໍບໍ່ເກີດຂຶ້ນເນື່ອງຈາກວ່າ ມາດຣິດ ຍື່ນເອກະສານຕໍ່ບານເຕະລີກສະເປນບໍ່ທັນເສັ້ນຕາຍ ເຖິງແບບນັ້ນກໍຍັງຕິດຕາມຜົນງານຂອງອະດີດນາຍດ່ານ ແອັດເລຕິໂກ ມາດຣິດ ຢ່າງຕໍ່ເນື່ອງ.

ທັງນີ້ລາຍງານລະບຸວ່າ ແມນ ຢູໄນເຕັດ ຫວັງດຶງ ໂຣເນົາໂດ ທີ່ໄດ້ຮັບຄວາມສົນໃຈຈາກ ເຊວຊີ, ປາຣີ ແຊງ-ແຊັກແມງ ແລະ ສະໂມສອນຈາກຈີນເຊັ່ນກັນກັບມາປະຈຳການໃນເກມບຸກອີກເທື່ອໜຶ່ງ ໂດຍວາງແຜນຍື່ນເມັດເງິນເປັນສະຖິຕິໂລກບວກກັບການພ່ວງ ເດ ເຄອາ ໃຫ້ພິຈາລະນາ ຫວັງ “ລາຊາຊຸດຂາວ” ຍອມໃຈອ່ອນປ່ອຍອະດີດເດັກປັ້ນ ສະປອດຕິງ ລິສບອນ ຕໍ່ໄປ.