ສື່ປ່ອຍຂ່າວເປເປຕົກລົງຍ້າຍຈາກລາຊາໄປລີກຈີນແລ້ວ

 

ສື່ກະທິງເຜີຍ ເປເປ ກອງຫຼັງຂອງ ເຣອັນ ມາດຣິດ ຕົກລົງຍ້າຍໄປຫຼິ້ນໃຫ້ກັບ ເຫີເປີ່ຍ ໄຊນາ ຟໍຈູນ ທີມມາຫະເງິນໃນລີກແດນມັງກອນແລ້ວ ໂດຍຄາດວ່ານັກເຕະຈະໄດ້ຮັບເງິນຄ່າເມື່ອຍເພີ່ມຂຶ້ນເຖິງ 3 ເທົ່າຈາກທີ່ໄດ້ຮັບກັບ “ລາຊາຊຸດຂາວ”.

 

ເປເປ ເຊັນເຕີແບັກປະສົບການສູງຂອງ ເຣອັນ ມາດຣິດ ຍັກໃຫຍ່ຂອງ ລາ ລີກາ ສະເປນຕົກລົງທີ່ຈະຍ້າຍໄປຫຼິ້ນໃຫ້ກັບ ເຫີເປີ່ຍ ໄຊນາ ຟໍຈູນ ສະໂມສອນຂອງ ໄຊນິດສ໌ ຊູເປີລີກ ປະເທດຈີນ ຫຼັງຈົບລະດູການ 2016-2017 ຈາກການລາຍງານຂອງ ຄາເດນາ ໂຄບ ສື່ດັງໃນເມືອງກະທິງ.

 

ກອງຫຼັງທີມຊາດປັອກຕຸຍການເຊິ່ງຫາກໍຊ່ວຍທັບ “ຝອຍທອງ” ຄວ້າແຊມ ຢູໂຣ 2016 ເຫຼືອສັນຍາຢູ່ໃນຖິ່ນ ຊານດິເອໂກ ເບີນາເບວ ພຽງແຕ່ 6 ເດືອນເທົ່ານັ້ນ ແລະ ເຮັດໃຫ້ຕອນນີ້ມີລາຍງານອອກມາວ່ານັກເຕະຄິດທີ່ຈະອອກໄປຫາຄວາມທ້າທາຍໃໝ່ໃນເດືອນມິຖຸນານີ້.

 

ກ່ອນໜ້ານີ້ ແມນເຊສເຕີ ຢູໄນເຕັດ ເຄີຍມີຂ່າວວ່າພະຍາຍາມດຶງ ເປເປ ມາຮ່ວມທີມແຕ່ຫຼ້າສຸດສື່ໃນສະເປນລາຍງານວ່າ ເຫີເປີ່ຍ ໄຊນາ ຟໍຈູນ ເອົາຊະນະທຸກໆສະໂມສອນເມື່ອພວກເຂົາສາມາດຈັບດາວເຕະອາຍຸ 33 ປີໃຫ້ມາຢູ່ກັບພວກເຂົາໄດ້ແລ້ວ.

 

ນອກຈາກນີ້ສື່ເຈົ້າເດີມຍັງລາຍງານເພີ່ມອີກວ່າ ເປເປ ເຊິ່ງເຊື່ອວ່າຕ້ອງການສັນຍາໃໝ່ 2 ປີກັບ “ລາຊາຊຸດຂາວ” ຫຼາຍກວ່າ 12 ເດືອນທີ່ຕົ້ນສັງກັດສະເໜີ ຈະໄດ້ຮັບຄ່າເມື່ອຍເພີ່ມຂຶ້ນເຖິງ 3 ເທົ່າຈາກທີ່ໄດ້ຮັບໃນປັດຈຸບັນເມື່ອນັກເຕະຍ້າຍໄປທຳມາຫາກິນໃນແດນມັງກອນ.