ສື່ປູດ!! ຜີເຕັງດຶງ ອີກາໂລ ເສີມທັບຊ່ວງຊຳເມີ

 

ສື່ຕີຂ່າວ ແມນເຊສເຕີ ຢູໄນເຕັດ ເປັນໂຕເຕັງທີ່ຈະໄດ້ ໂອດຽນ ອີກາໂລ ກອງໜ້າຂອງ ວັດຝອດ ມາຟາດແຄ່ງໃນ ໂອນ ທຣາຟເຟິດ ຊ່ວງພັກລະດູການນີ້ພ້ອມກັບຄາດວ່ານັກເຕະໄນຈີເລຍກຽມເກັບເຄື່ອງຍ້າຍສັງກັດດ້ວຍຄ່າໂຕຈຳນວນມະຫາສານຫຼັງຈາກທີ່ໂຊຟອມເທບໃນລະດູການນີ້.

 

“ເດິ ຊັນ” ສື່ເຈົ້າມະໂນຂອງຜູ້ດີລາຍງານຂ່າວວ່າ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຈາກລີກຜູ້ດີກ້າວຂຶ້ນມາເປັນເຕັງໜຶ່ງທີ່ຈະໄດ້ໂຕ ໂອດຽນ ອີກາໂລ ດາວຍິງຕີນໄຟຂອງ ວັດຝອດ ຄູ່ແຂ່ງຮ່ວມລີກມາເສີມທັບໃນຊ່ວງເປີດຕະຫຼາດນັດເຕະຊຳເມີນີ້.

ກອງໜ້າໄນຈີເລຍ 26 ປີ ເຮັດຜົນງານໄດ້ເໜືອຄວາມຄາດໝາຍຍິງ 14 ເມັດຈາກ 24 ນັດລວມທຸກລາຍການໃຫ້ຕົ້ນສັງກັດ ຂະນະດຽວກັນເຊື່ອວ່າ ແມນຢູ ໄດ້ລົມກັບ “ແຕນອາລະວາດ” ຫວັງດຶງໂຕນັກເຕະໃນວັນສຸດທ້າຍຂອງຕະຫຼາດນັກເຕະເດືອນມັງກອນທີ່ຜ່ານມາ ແລະ ເຖິງວ່າການຍ້າຍຈະບໍ່ເກີດຂຶ້ນແຕ່ “ຜີສາດແດງ” ຍັງຕ້ອງການເຂົາມາຮ່ວມທີມ ແລະ ລ່າສຸດສື່ຈາກເມືອງຜູ້ດີຕີຂ່າວວ່າທີມຂອງ ຫຼຸຍ ຟານກາວ ເປັນເຕັງທີ່ຈະໄດ້ອະດີດເຕະ ອູດິເນເຊ ທີ່ອາດຈະມີຄ່າຫົວ 40 ລ້ານປອນໃນຊ່ວງຊຳເມີ.

 

ທັງນີ້ ອີກາໂລ ເຄີຍປະຕິເສດຂໍ້ສະເໜີຄ່າເມື່ອຍຈຳນວນ 300,000 ປອນຕໍ່ອາທິດຈາກທີມນິລະນາມ ໃນການຍ້າຍໄປຟາດແຄ່ງໃນຈີນມາແລ້ວ ແລະ ຄາດວ່າເຂົາອາດຍ້າຍທີມດ້ວຍຄ່າໂຕກ້ອນໃຫຍ່ກໍເປັນໄດ້.