ສື່ນຳ້ຫອມປະໂຄມຂ່າວ!! ໂມນາໂກຕົກລົງປ່ອຍເອັມບັບເປ້ໃຫ້ເປເອັດເຊແລ້ວ

 

ສື່ຝຣັ່ງຢືນຢັນກົງກັນ ຄີລ້ຽນ ເອັມບັບເປ້ ດາວຍິງຟອມລະເບີດຂອງ ໂມນາໂກ ຈະກາຍເປັນສະມາຊິກໃໝ່ຂອງ ເປເອັດເຊ ໃນຕະຫຼາດນີ້ອີກຄົນໜຶ່ງຫຼັງທັງສອງສະໂມສອນສາມາດຕົກລົງກັນໄດ້ໃນຫຼັກເມື່ອວັນຄືນວັນພຸດ ດ້ວຍຄ່າຕົວ 150 ລ້ານເອີໂຣບວກນັກກິລາອີກຄົນໜຶ່ງ.

ຫຼັງເປັນຂ່າວມາຕະຫຼອດຕະຫຼາດໜ້າຮ້ອນປີນີ້ໂດຍສະເພາະກັບ ເຣອັນ ມາດຣິດ ແລະ ເປເອັດເຊ ຫຼ້າສຸດສື່ໃຫຍ່ຂອງຝຣັ່ງພາກັນລາຍງານວ່າ ໂມນາໂກ ຕົກລົງຈະຂາຍກອງໜ້າຝຣັ່ງອາຍຸ 18 ປີໃຫ້ກັບ ເປເອັດເຊ ດ້ວຍມູນຄ່າ 150 ລ້ານເອີໂຣບວກກັບນັກເຕະຂອງ ເປເອັດເຊ ອີກຄົນໜຶ່ງເຊິ່ງອາດຈະເປັນ ລູກັສ ມູຣ້າ, ຢູລ້ຽນ ດຣັກສະເລີ ຫຼື ຮາເວຍ ປາສຕໍເຣ້ ໂດຍ ເອັມບັບເປ້ ຈະເຊັນສັນຍາກັບ ເປເອັດເຊ 5 ປີຄ່າເມື່ອຍ 15 ລ້ານເອີໂຣຕໍ່ປີ ສູງກວ່າວທີ່ ເຣອັນ ມາດຣິດ ສະເໜີໃຫ້ເຂົາເຖິງ 9 ລ້ານເອີໂຣຕໍ່ປີ.

ກ່ອນໜ້ານີ້ມີລາຍງານວ່າ ເປເອັດເຊ ອາດຈະຊື້ ເອັມບັບເປ້ ໄວ້ກ່ອນ ແລະ ໃຫ້ໂມນາໂກຢືມຕົວໄປໃຊ້ງານ 1 ລະດູການເພື່ອຫາທາງປ່ອຍນັກເຕະໃນສັງກັດອອກ ແລະ ເກັບຄ່າເມື່ອຍຂອງ ເອັມບັບເປ້ ເພື່ອທີ່ສະໂມສອນຈະໄດ້ເຮັດໃຫ້ຢູ່ໃນຂອບຂອງກົດຄວບຄຸມການເງິນ ຫຼື ໄຟແນນຊຽວ ແຟ ເພລ ຂອງ ຢູເອຟາ.

ຖ້າວ່າຄ່າຕົວຂອງ ເອັມບັບເປ້ ເປັນໄປຕາມນັ້ນແທ້ກໍຈະເຮັດໃຫ້ເຂົາກາຍເປັນນັກເຕະຄ່າຕົວແພງທີ່ສຸດອັນດັບ 2 ຂອງໂລກຮອງຈາກ ເນມາ ກອງໜ້າທີມຊາດເບຣຊິນທີ່ ເປເອັດເຊ ຫາກໍດຶງເຂົ້າມາຮ່ວມທັບເມື່ອວັນທີ 3 ທີ່ຜ່ານມາ.