ສື່ກະໂລນີເຜີຍດີບາລາປັດຂໍ້ສະເໜີ 68 ລ້ານປອນຂອງຜີ

 

ສື່ອີຕາລີແຜ່ຂ່າວ ເປົາໂລ ດີບາລາ ດາວຍິງຂອງ ຢູເວັນຕຸດ ປັດຂໍ້ສະເໜີຍ້າຍໄປ ແມນຢູ ດ້ວຍຄ່າໂຕ 68 ລ້ານປອນຍ້ອນວ່າຢາກຢູ່ໃນຖິ່ນ ຕູຣິນ ຕໍ່ໄປ ແລະ ຫວັງຈະໄດ້ຄ່າເມື່ອຍເພີ່ມຂຶ້ນຫຼັງຈາກທີ່ເຮັດຜົນງານໄດ້ດີໃນລະດູການທີ່ຜ່ານມາ.

 

ຕຸດໂຕ ສະປອດ ສື່ກິລາຊື່ດັງຂອງປະເທດອີຕາລີລາຍງານຂ່າວເມື່ອວັນອາທິດທີ່ຜ່ານມາວ່າ ເປົາໂລ ດີບາລາ ກອງໜ້າຂອງ ຢູເວັນຕຸດ ແຊມ ກັນໂຊ ຊີຣີ ອາ 5 ສະໄໝຕໍ່ກັນປະຕິເສດທີ່ຈະຍ້າຍໄປຢູ່ກັບ ແມນເຊສເຕີ ຢູໄນເຕັດ ເມື່ອອາທິດທີ່ຜ່ານມາ ໂດຍຫວັງທີ່ຈະໄດ້ສັນຍາໃໝ່ທີ່ດີຂຶ້ນຈາກ “ມ້າລາຍ”.

 

ດາວຍິງອາເຈັນຕີນາເຮັດຜົນງານໄດ້ດີໃນປີທຳອິດທີ່ມາຢູ່ກັບ ມ້າລາຍ ໂດຍຍິງໄປ 23 ລູກຈາກ 46 ນັດໃນທຸກລາຍການ ຫຼັງຈາກທີ່ຫາກໍຍ້າຍມາຈາກ ປາລາໂມ ດ້ວຍຄ່າຫົວ 32 ລ້ານເອີໂຣເມື່ອຊຳເມີປີກາຍ.

 

ຕຸດໂຕ ສະປອດ ໃຫ້ຂ່າວວ່າ ໂຊເຊ ມູຣິນໂຢ ນາຍໃຫຍ່ຄົນໃໝ່ຂອງ “ຜີສາດແດງ” ຢາກໄດ້ ດີບາລາ ເຂົ້າມາເສີມແດນໜ້າ ແລະ ໄດ້ຍື່ນຂໍ້ສະເໜີຈຳນວນ 68 ລ້ານປອນໃຫ້ກັບ ຢູເວ ແຕ່ ດີບາລາ ປະຕິເສດທີ່ຈະຍ້າຍທີມເນື່ອງຈາກຢາກຢູ່ໃນຖິ່ນ ຕູຣິນ ຕໍ່ໄປ ແລະ ໄດ້ຮັບຄ່າເມື່ອຍເພີ່ມຂຶ້ນ.

 

ຂະນະທີ່ ຢູເວັນຕຸດ ພ້ອມປັບສັນຍາໃຫ້ກັບ ດີບາລາ ໄດ້ຄ່າເມື່ອຍເພີ່ມຂຶ້ນຈາກທີ່ເວລານີ້ໄດ້ຮັບລະດູການລະ 2.5 ລ້ານເອີໂຣເປັນ 4.5 ລ້ານເອີໂຣ.