ສື່ກະທິງເຜີຍຊີດານບອກປະທານຊຸດຂາວລັອກເປົ້າ ຄູຕີ້

 

ສື່ດັງແດນກະທິງເຜີຍ ຊີເນດີນ ຊີດານ ນາຍໃຫຍ່ຂອງ ເຣອັນ ມາດຣິດ ຍັກໃຫຍ່ ລາ ລີກາ ໃສ່ຊື່ ເຟລິບເປ ຄູຕິນໂຢ ເພເມກເກີຂອງ “ຫົງແດງ” ລີເວີພູ ເປັນຊື່ທໍາອິດໃນລາຍຊື່ນັກເຕະທີ່ຢາກໄດ້ມາຮ່ວມທັບຫຼາຍທີ່ສຸດເຖິງວ່າ “ຫົງແດງ” ຕັ້ງຄ່າຫົວສູງເຖິງ 70 ລ້ານປອນແຕ່ບັນຫາຄື “ລາຊາຊຸດຂາວ” ຕ້ອງຖ້າໃຫ້ຕົນເອງພົ້ນໂທດແບນຈາກຕະຫຼາຊຶ້ຂາຍກ່ອນ.

 

“ຄູຕີ້” ກໍາລັງຟອມລະເບີດ ແລະ ຖືວ່າເປັນແກນຫຼັກທີ່ຊ່ວຍໃຫ້ທີມຂອງ ເຈີເກັນ ຄັອບ ໂຊຟອມໄດ້ສຸດຍອດໃນຕອນນີ້ໂດຍທີ່ນັກເຕະທີມຊາດບາຊິວຫາກໍຍິງປະຕູທີ 5 ຂອງລະດູການໃຫ້ກັບຕົນເອງ ແລະ ຍັງຜ່ານບານໃຫ້ໝູ່ຍິງອີກໃນເກມທີ່ “ຫົງແດງ” ທະລົ່ມ ວັດຝອດ 6-1 ຈົນເຮັດໃຫ້ທີມຂຶ້ນນຳເປັນຈ່າຝູງຄັ້ງທຳອິດໃນຮອບກວ່າສອງປີ.

 

ຫຼ້າສຸດ ເດຍຣິໂອ ໂກ ສື່ລູກໜັງຂອງສະເປນເຜີຍວ່າ ຊີດານ ກຳລັງຈັບຕາເບິ່ງຜົນງານຂອງ ຄູຕິນໂຢ ຢ່າງໃກ້ຊິດໂດຍທີ່ນາຍໃຫຍ່ຄົນຝຣັ່ງມັກວິທີການຫຼິ້ນຂອງດາວເຕະແຊມບາມາດົນແລ້ວ ແລະ ໄດ້ຊິບໆລົມໆກັບ ຟໍເຣນຕິໂນ ເປເຣດ ປະທານໃຫຍ່ຂອງ “ລາຊາຊຸດຂາວ” ຮຽບຮ້ອຍວ່ານີ້ເປັນນັກເຕະເບີໜຶ່ງທີ່ຕ້ອງການ.

 

ທັງນີ້ ຊີດານ ຕ້ອງການໄດ້ໂຕ ຄູຕິນໂຢ ມາໃຊ້ງານແທນ ຮາເມດ ໂຣດຣິເກດ ດາວເຕະທີມຊາດໂຄລຳເບຍທີ່ບໍ່ໄດ້ຢູ່ໃນແຜນການເຮັດທີມໄລຍະຍາວ ຢ່າງໃດກໍດີບັນຫາຄື ເຣອັນ ມາດຣິດ ຍັງບໍ່ສາມາດຍື່ນຂໍ້ສະເໜີຂໍຊື້ນັກເຕະໄດ້ຈົນກວ່າຈະຮອດປີ 2018 ທີ່ພົ້ນໂທດແບນຈາກຕະຫຼາດຊື້ຂາຍນັກເຕະ.

 

ຂະນະດຽວກັນເປັນທີ່ເຂົ້າໃຈວ່າ “ຫົງແດງ” ໄດ້ຕັ້ງຄ່າຫົວ ຄູຕິນໂຢ ໄວ້ສູງເຖິງ 67 ລ້ານປອນແຕ່ຖ້າເລືອກໄດ້ພວກເຂົາກໍບໍ່ຕ້ອງການປ່ອຍນັກເຕະລາຍນີ້ອອກໄປ.