ສືບຕໍ່ວຽກງານໂຄງການຄ້ຳປະກັນສະບຽງອາຫານແລະໂຄງການສົ່ງເສີມການຜະລິດເປັນສິນຄ້າ

ຕອນເຊົ້າວັນທີ 03 ພະຈິກ 2015, ທີ່ສະຖາບັນຄົ້ນຄວ້າ ກະສິກຳແລະປ່າໄມ້ ກະຊວງກະສິກຳແລະປ່າໄມ້ ໄດ້ຈັດກອງປະຊຸມຊີ້ນຳໂຄງການຄ້ຳປະກັນສະບຽງອາຫານແລະໂຄງການສົ່ງເສີມການຜະລິດເປັນສິນຄ້າ ໂດຍການເປັນປະທານຂອງ ທ່ານ ສົມສະຫວາດ ເລັ່ງສະຫວັດ, ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ , ໃຫ້ກຽດເຂົ້າຮ່ວມຂອງທ່ານ ດຣ ພວງປາຣິສັກ ປຣະວົງວຽງຄຳ ລັດຖະມົນຕີຊ່ວຍວ່າການກະຊວງກະສິກຳແລະປ່າໄມ້, ພ້ອມດ້ວຍ ບັນດາທ່ານຮອງເຈົ້າແຂວງແລະຫົວໜ້າກົມເຂົ້າຮ່ວມ.


ທ່ານ ດຣ ພວງປາຣິສັກ ປຣະວົງວຽງຄຳ, ລັດຖະມົນຕີຊ່ວຍວ່າການກະຊວງ ກະສິກຳແລະປ່າໄມ້ ກ່າວວ່າ: ໂຄງການຄ້ຳປະກັນສະບຽງອາຫານແລະໂຄງການສົ່ງເສີມການຜະລິດເປັນສິນຄ້າ ສືບຕໍ່ມີຄວາມຄືບໜ້າ ໂດຍສະເພາະໂຄງການຜະລິດເຂົ້າ, ການລ້ຽງງົວລ້ຽງປາ ການຜະລິດສິນຄ້າກະສິກຳ,ໃນການເຄື່ອນໄຫວຕົວຈິງ ດ້ານການຄົ້ນຄ້ວາມະຫາພາກ, ການຄົ້ນຄ້ວາ ນະໂຍບາຍ ສະໜັບສະໜູນແລະຈັດຕັ້ງປະຕິບັດໃນວຽກງານ ສຸມໃສ່ແຕ່ລະດ້ານໂຄງການດັ່ງກ່າວກຳລັງດຳເນີນການມາເປັນເວລາ 1 ປີກວ່າ ນັບແຕ່ມີຂໍ້ຕົກລົງລັດຖະບານລາວ ເພື່ອປະຕິບັດໂຄງການ ສົ່ງເສີມ ການຜະລິດສິນຄ້າແລະໂຄງການ ຄ້ຳປະກັນ ສະບຽງອາຫານ , ໃຫ້ແຕ່ລະກະຊວງ ຂະແໜງການ ໜູນອອ້ມ 10 ແຂວງ ເປົ້າໜາຍ. ໂຄງການທັງສອງແມ່ນໄດ້ຜ່ານ ກອງປະຊຸມຄະນະປະຈຳສະພາແຫ່ງຊາດຂອງລາວ ແລະກໍ່ໄດ້ຮັບຮອງເອົາ ໃນຫຼັກການຕົກລົງສ້າງສາລະບັນການເງີນ ສະເພາະໃຫ້ສອງໂຄງການດັ່ງກ່າວ ສຳລັບປີ 2015-2016ແມ່ນໄດ້ຮັບອະນຸມັດງົບປະມານຈໍານວນ 30 ຕື້ກີບ ຈາກນັ້ນຜ່ານຄະນະປະສານງານ ຂັ້ນສູນກາງ ໄດ້ນຳສະເໜີໂຄງການຄ້ຳປະກັນສະບຽງອາຫານແລະສົ່ງເສີມການຜະລິດເປັນສິນຄ້າ ໂດຍກວມລວມການຈັດຕັ້ງປະຕິບັດເພື່ອໃຫ້ເກີດຜົນເປັນຈິງແລະໃຫ້ລັດຖະບານຊຸກຍູ້ໂຄງການດັ່ງກ່າວ ກ່ຽວກັບການຮັບປະກັນຄວາມໜັນຄົງ ດ້ານສະບຽງອາຫານ ແລະຜະລິດສິນຄ້າ ທີ່ຍັງຖືເປັນພື້ນຖານເສດຖະກິດແຫ່ງຊາດໃນໄລຍະຂອງແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຊຶ່ງແມ່ນການຮັບຜິດຊອບລວມ ຂອງທຸກຂະແໜງການ, ທຸກແຂວງ ແລະນະຄອນຫຼວງຂອງລາວ ທີ່ຈະໄດ້ເຂົ້າຮ່ວມ ແລະສືບຕໍ່ຈັດຕັ້ງປະຕິບັດ ໃຫ້ສຳເລັດຕາມຄາດໝາຍສູ້ຊົນວາງໄວ້ຮອດປີ2020.