ສຳນັກຂ່າວສານປະເທດລາວເຕີບໃຫຍ່ເຂັ້ມ ແຂງໂດຍຕິດພັນກັບພາລະກິດປະຕິວັດ

ໃນ​ໂອກາດ​ການ​ຫ້າງ​ຫາ​ກະກຽມ​ສ​ະ​ເຫລີ​ມສະຫລອງ​ວັນສື່​ມວນ​ຊົນ ​ແລະ ການ​ພິມ​ຈໍາ ໜ່າຍ​ຄົບຮອບ 65 ປີ (13 ສິງຫາ 1965 ) ​ແລະ ວັນ​ສະ​ຖາປະນາ​ ສປປ ລາວ ​ຄົບຮອບ 40 ປີ  (2 ທັນວາ 1975), ທ່ານ ສູນ​ທອນ ຄັນທະ​ວົງ​ ຜູ້ອໍານວຍ​ການ​ໃຫຍ່​ສຳນັກຂ່າວສາ​ນປະ​ເທດ​ລາວ​ໄດ້​​ ໃຫ້​ສໍາພາດ​ຕໍ່​ສື່​ມວນ​ຊົນ​ລາວ​ ໃນ​ວັນ​ທີ 30 ກໍລະ ກົດ 2015 ນີ້​ ວ່າ: ຕະຫລອດ​ໄລຍະ​​ແຫ່ງ​ການ​ຕໍ່ສູ້​ກູ້​ຊາດ​ ເພື່ອ​ປົດ​ປ່ອຍປະ​ເທດ​ອອກ​ຈາກ​ແອກ​ປົກຄອງ​ ຂອງ​ລັດທິ​ລ່າ​ເມືອງ​ຂຶ້ນ​ແບບ​ເກົ່າ ​ແລະ​ ໃໝ່, ພັກ​ປະຊາຊົນປະຕິວັດ​ລາວ ຍາມ​ໃດ​ກໍ​ຖື​ເອົາ​ວຽກງານໂຄສະນາ, ສຶກສາອົບຮົມ, ຂົນຂວາຍ ​ແລະ ປຸກ​ລະ ດົມນ້ຳ​ໃຈ​ຮັກ​ຊາດຂອງ​ປະຊາຊົນ ​ເຂົ້າຮ່ວມ​ຂະ​ບວນການ​ຕໍ່ສູ້​ປົດ​ປ່ອຍ​ຊາດ​ຢ່າງ​ພິລະ​ອາດ​ຫານ​. ໃນ​ນັ້ນ ໜ່ວຍງານຂ່າວສານ​ ​ເປັນອີກໜ່ວຍງານໜຶ່ງ​ ທີ່ໄດ້​ຕິດ​ພັນ​ກັບ​ເຫດການ​ເຫລົ່າ​ນັ້ນ, ໂດຍ​ສະ​ເພາະ​ແມ່ນ​ບັ້ນໂຄສະນາ​ປຸກລະດົມ​ປະຊາຊົນ ​ລຸກ​ຮື້ຂຶ້ນຍຶດອຳນາດ ​ແລະ ປົດ​ແອກການ​ປົກຄອງຈາກ​ກຳມື​ຂອງ​ພວກ​ລ່າ​ເມືອງ​ຂຶ້ນແບບ​ເກົ່າ​. ຕໍ່​ມາພັກ​ປະ​ຊາ​ຊົນ​ປະຕິວັດລາວ ກໍ​ຄື​ແນວ​ລາວ​ສ້າງ​ຊາດ ໄດ້​​ຕົກລົງ​ສ້າງ ຕັ້ງສຳນັກ​ຂ່າວສານ​ປະ​ເທດ​ລາວ (ຂປລ) ຫລື (KPL) ຂຶ້ນໃນວັນທີ 6 ເດືອນມັງກອນ ປີ 1968 ​ສາ ມາດເວົ້າ​ໄດ້​ວ່າ​​ເປັນ​ການ​ປ່ຽນ​ແປງ​ຄັ້ງ​ຍິ່ງ​ໃຫຍ່ ​ແລະ ​​ເປັນ​ສື່​ທີ່ໄດ້​ຮັບນິຍົມ​ທີ່​ສຸດ​ ສໍາລັບປະຊາຊົນ​ລາວ​ບັນດາ​ເຜົ່າໃນ​ໄລຍະ​ນັ້ນ.

ສຳນັກຂ່າວສານປະ​ເທດ​ລາວ​ ໄດ້​ຜ່ານ​ຜ່າ​ເສັ້ນທາງ​ທີ່ແສນ​ທຸລະກັນດານ ໃນ​ໄລຍະ​ເ​ວລາກ​ວ່າ 40 ປີ, ​ໄປ​ຄຽງ​ຄູ່​ກັບການ​​ເຕີບ​ໃຫຍ່​ຂະ​ຫຍາ​ຍຕົວຢ່າງ​ວ່ອງ​ໄວ ​ເມື່ອ​ທຽບ​ໃສ່​ເມື່ອ​ກ່ອນ ຈາກ​ສອງ​ຝາ​ມື​ເປົ່າ, ຂາດ​ເຂີນ​ທາງ​ກຳລັງ​ຄົນ, ກຳລັງ​ຊັບ ແລະ​ ວັດຖຸອຸປະກອນ​ເກົ່າ​ແກ່​ຫລ້າຫລັງ. ​ເລີ່ມ​ຈາກຈັກ​ໂທ ລະ​ເລກເກົ່າໆ 1 ເຄື່ອງ ​ກາຍ​ມາ​ເປັນສາມ​ເຄື່ອງ, ​ເຄື່ອງ​ສົ່ງ(ຈັກກະ​ຈາ​ຍ) ກໍມີ​ຈັກ T50, T100, T 500, T1.000, 5 KW, ສ່ວນ​ເຄື່ອງຮັບ​ກໍມີ​ຈັກ​ໂທລະ​ພິມ​ P 250, P 371, TOPON, EKAD, ​ໄລຍະຕໍ່​ມາ​ກໍ​ໄດ້​ນຳໃຊ້​ເຄື່ອງ​ຄອມ​ພິວ​ເຕີ​ ແທນ​​ເຄື່ອງ​ໂທລະ​ເລກ-​ໂທລະ​ພິມໃນ​ການ​ຮັບ-ສົ່ງ​ຂ່າວ, ແຕ່​ຍ້ອນ​ຄວາມ​ບຸກບືນ​ເປັນ​ຈິດ​ໜຶ່ງ​ໃຈ​ດຽວ​ກັນ ​ຢູ່​ໃຕ້​ຮົ່ມ​ທຸງ​ຂອງ​ພັກ​ປະຊາຊົນ​ປະຕິວັດ​ລາວ ​ໄດ້​ເຮັດ​ໃຫ້​ສຳນັກຂ່າວສານ​ປະ​ເທດ​ລາວ​ ນັບ​ມື້ນັບ​ເຕີບ​ໃຫ່ຍ​ເຂັ້ມ​ແຂງ​ຢ່າງ​ບໍ່​ຢຸດ​ຢັ້ງ ມາ​ເຖິງ​ປະຈຸ​ບັນ​ ສຳນັກຂ່າວ ສານ​ປະ​ເທດ​ລາວ​ ໄດ້​ກ້າວ​ໄປ​ສູ່​ເຄື່ອງ​ມື​ທີ່ທັນ​ສະ​ໄໝ​, ໂດຍ​ສະ​ເພາະເຕັກ​ໂນ​ໂລ​ຊີ​ທັນ​ສະ​ໄໝ​ເທົ່າ​ທຽມ​ກັບປະເທດອື່ນໆ, ອັນ​ໄດ້​ເຮັດ​ໃຫ້ຊື່​ສຽງ​ຂອງ​ສຳນັກ​ຂ່າວສານ​ປະ​ເທດ​ລາວ​ ເປັນ​ທີ່​ຮັບ​ຮູ້​ໄປ​ທົ່ວ​ໂລກ, ພາລະ​ບົດບາດ​ກໍສູງ​ຂຶ້ນ​ເລື້ອຍໆ

ທ່ານ ສູນ​ທອນ ຍັງ​ກ່າວ​ຕ່ືມ​ວ່າ: ອາ​ດີດ​ຜ່ານ​ມາ​ພວກ​ເຮົາ​ມີ​ຫລາຍ​ຜະລິດ​ຕະພັນ​ເຊັ່ນ: ໜັງສື ພິມKPLNews ​ເປັນພາສາ​ຝຣັ່ງ-ອັງກິດ, ໜັງສືພິມ​ປະ​ເທດ​ລາວ, ​ໃບ​ຂ່າວ​ລາຍ​ວັນ, ​ໃບ​ຂ່າ​ວຄົ້ນຄວ້າ, ວາລະສານ​ປະ​ເທດ​ລາວ, ​ເວ​ບ​ໄຊ ​ແລະ ອື່ນໆ ​ເຊິ່ງ​ເປັນ​ເຄື່ອງມື​ທີ່​ແຫລມ​ຄົມ ​ແລະ ສໍາຄັນ​ທີ່​ສຸດ​ຂອງ​ພັກ-ລັດຖະບານໃນ​ໂຄສະ​ນາ​ເຜີຍ​ແຜ່ ​ແລະ ນໍາ​ສະ​ເໜີຂໍ້​ມູນ​ຂ່າວສານ ​ທີ່​ເປັນ​ປະ​ໂຫຍ​ດ​ໂດຍ​ສະ​ເພາະ ນະ​​ໂຍບາຍ, ມະຕິ, ຂໍ້​ກໍານົດ​ລະບຽບ, ​ແຜນ​ພັດທະນາ​ເສດຖະກິດ-ສັງຄົມ, ການ​ຄ້າ, ການ​ລົງທຶນ, ການທ່ອງທ່ຽວ, ການ​ບໍລິການ ​ແລະ  ອື່ນໆ​ອອກ​ສູ່​ສັງຄົມ​ເປັນ​ວົງ​ກວ້າງ​ຮັບ​ຮູ້ ​ແລະ ​ເຂົ້າ​ໃຈ​ຢ່າງ​ເລິກ​ເຊິ່ງທີ່​ສຸດ ທັງ​ພາຍ​ໃນ ​ແລະ ຕ່າງປະ​ເທດ, ​ແຕ່​ແນວ​ໃດ​ກໍ​ດີ ຖ້າ​ປຽບທຽບ​ກັບ​ຄວາມ​ຕ້ອງການ ​ແລະ ການ​ພັດ​ທະນາ​ໃນ​ສະພາບ​ປັດຈຸບັນ ​ແລະ ​ໃນ​ອະນາຄົດ​ຍັງ​ເຫັນວ່າ ​ພວກ​ເຮົາ​ຍັງ​ຕ້ອງ​ໄດ້​ບຸກບືນ, ຂະ ຫຍັນຂັນ​ແຂງ, ​ພາກ​ພຽນ​ພະຍາຍາມ, ອົດທົນ ​ແລະ ​ເອົາ​ໃຈ​ໃສ່​ເຮັດ​ວຽກ​ໜັກ​ຂຶ້ນ​ຫລາຍ​ກວ່າ​ນີ້​ ເພາະ​ໃນຕໍ່ໜ້າ​ນີ້​ ພວກ​ເຮົາ​ພວມ​ຈະ​ກ້າວ​ເຂົ້າ​ສູ່​ປະຊາ​ຄົມ​ເສດຖະກິດ​ອາ​ຊຽນທ້າຍ​ປີ​ນີ້ ​ແລະ ​ເປັນ​ປະທານ​ອາ​ຊຽນ 2016 ຍິ່ງ​ເຮັດ​ໃຫ້​ພວກ​ເຮົາ​ຕ້ອງ​ຄິດ​ໜັກ ​ແລະ ຕ້ອງ​ວາງ​ແຜນ​ຢ່າງ​ເປັນ​ລະບົບ​ຄົບ​ຊຸດ​ເພື່ອ​ຮອງ​ຮັບ​ກັບ​ສິ່ງ​ທີ່​ເກີດ​ຂຶ້ນ​ນັ້ນ​. ຍົກ​ຕົວຢ່າງ​ພວກ​ເຮົາ​ຕ້ອງ​ຍົກ​ລະດັບ​ວິຊາ​ການ​ຂຽນ​ຂ່າວ, ​ຮຽນ​ຮູ້​ພາສາ​ອັງ ກິດ, ປັບປຸງເຕັກນິກ​ການ​ນໍາ​ສະ​ເໜີ​ຂໍ້​ມູນ​ຂ່າວສານ​ທີ່​ເປັນ​ປະ​ໂຫຍ​ດ ຮັບປະກັນ​ໃຫ້​ມີ​ຄວາມວ່ອງ​ໄວ ​ແລະ ຖືກຕ້ອງ​ສອດຄ່ອງ​ກັບ​ແນວ​ທາງ​ນະ​​ໂຍບານ​ຂອງ​ພັກ-ລັດ. ສະ​ນັ້ນ ປັດຈຸບັນ​ນີ້ ສຳນັກຂ່າວສານ​ປະ​ເທດລາວ ​ກໍ​ໄດ້​ມີ​ການ​ຍົກ​ລະດັບ​ພາສາ​ອັງກິດ, ວິທີຂຽນ​ຂ່າວ, ວິທີ​ປັບປຸງ​ເຕັກນິກ ​ແລະ ອື່ນໆ​ໃຫ້​ທັນ​ກັບ​ສະ​ພາບ​ການ​ແຕ່ລະ​​ໄລຍະ​ເປັນ​ຕົ້ນ ​ພວກ​ເຮົາ​ໄດ້​ມີ​ຜະລິດ​ຕະພັນ​ໃໝ່ ເພີ່ມ​ອີກ​ຈໍານວນ​ຫລາຍ​ຄື: ການບໍລິການ​ຂໍ້​ມູນ​ຂ່າວສານ​ຜ່ານ​ແອັຟ (kpl-news apps), ​ເຟສບຸກ Facebook, FTP, google drive, SMS, ວີ​ດີ​ໂອ​ອອນ​ລາຍ ​ແລະ ອື່ນໆ ​ເຊິ່ງປັດຈຸບັນ​ຈໍານວນ​ດັ່ງກ່າວ ໄດ້​ເປີດ​ໃຫ້​ບໍລິການ​ເປັນ​ທາງ​ການ​ແລ້ວ ​ເຊິ່ງຖື​ວ່າ​ຜະລິດ​ຕະພັນ​ສຳນັກຂ່າວສານ​ປະ​ເທດ​ລາວ ທີ່​ກ່າວ​ມາ​ຂ້າງ​ເທີ​ງນັ້ນເປັນອີກ​ຊ່ອງ​ທາງໜຶ່ງ​ ໃນ​ການ​ກະ​ຈ່າຍ​ຂໍ້​ມູນ​ໄດ້​ຢ່າງ​ວ່ອງ​ໄວທັນ​ເຫດການ, ​ໄດ້​ຮັບ​ຄວາມ​ນິ​ຍົມ​ຈາກ​ພາຍ​ໃນ ​ແລະ ຕ່າງປະ​ເທດ, ໂດຍ​ສະ​ເລ່ຍມີ​ຜູ້​​ເຂົ້າ​ຊົມ​​ເວ​ບ​ໄຊ​ ສຳນັກຂ່າວສານ​ປະ​ເທດ​ລາວ ຫລາຍ​ກວ່າ 1 ​ແສນ​​ເທື່ອ​ຄົນຕໍ່​ເດືອນ,​ ຜູ້​ເຂົ້າ​​​ອ່ານ​ສາລະ​ໜ້າ​ຮູ້​ຜ່ານເຟສບຸກສະ​ເລັ່ຍຫລາຍ​ແສນ​ຄົນ​ຕໍ່​ເດືອນ​ແລະອື່ນໆ.