ສາວທະນາຄານຍາດໄດ້ມຸງກຸດນາງສາວນະຄອນຫລວງ2016

ຕອນຄໍ່າວັນທີ 10 ເມສາ 2016 ນີ້, ທີ່ສູນການຄ້າໄອເຕັກມໍຊັ້ນ 7 ນະຄອນຫຼວງວຽງຈັນ, ໄດ້ຈັດງານປະກວດນາງສາວງາມນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ນາງ ດຣ. ແກ້ວສາຍໃຈ ພັນລະຍາປະທານປະເທດລາວ, ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງ, ແຂກທີ່ເຊີນ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມຊົມເປັນຈໍານວນຫຼວງຫຼາຍ. ຕາມຂ່າວໃຫ້ຮູ້ວ່າ: ງານປະກວດນາງສາວງາມນະຄອນຫຼວງວຽງຈັນ ໄດ້ຈັດຂຶ້ນທຸກໆປີກ່ອນປີໃໝ່ລາວ ເຊິ່ງຈະມີນາງສາວງາມທີ່ເປັນຕົວແທນຈາກ 9 ຕົວເມືອງທົ່ວນະຄອນຫຼວງວຽງຈັນເຂົ້າຮ່ວມແຂ່ງຂັນ, ຜ່ານການແຂ່ງຂັນມີ 20 ນາງສາວຜ່ານເຂົ້າຮອບສຸດທ້າຍ, ໃນຮອບນີ້, ໄດ້ຄັດເລືອກເອົາ 7 ສາວງາມ ເພື່ອເປັນຕົວແທນລູກສາວຂອງພະຍາກະບິນລະພົມ, ຜົນການແຂ່ງຂັນທີ 1, M19 ນາງ ມະຄະລີ ພະມີສິດ ຈາກເມືອງຫາດຊາຍຟອງເປັນນາງສາວງາມນະຄອນຫຼວງວຽງຈັນປະຈໍາປີ 2016 ໄດ້ຮັບມົງກຸດມູນຄ່າ 25 ລ້ານກີບ, ຄໍາໜັກ 1 ບາດ, ເງິນສົດ 20 ລ້ານກີບ, ຊຸດໃໝມູນຄ່າ 4 ລ້ານກີບ, ທຶນການສຶກສາມູນຄ່າ 50 ລ້ານກີບ ແລະ ຄອມພິວເຕີ 1 ເຄື່ອງ. ອັນດັບທີ2, M5 ນາງ ສຸພາພອນ ສົມວິຈິດ ຈາກເມືອງຈັນທະບູລີ ໄດ້ຮັບເງິນລາງວັນ 10 ລ້ານກີບ, ອັນດັບ 3, M17 ນາງ ສຸລິນດາ ໄຊຍະເພັດ ຈາກເມືອງໄຊເສດຖາ ໄດ້ຮັບເງິນສົດ 5 ລ້ານກີບ, ອັນດັບ 4, M11 ນາງ ສັນຕິສຸກ ສີດາລາສຸກ ຈາກເມືອງໄຊເສດຖາ, M9 ນາງ ຈັນທະລີ ວິໄລ ຈາກເມືອງໄຊເສດຖາ, M16 ນາງ ປະທຸມພອນ ພານະລາດ ຈາກເມືອງຫາດຊາຍຟອງແລະ M7 ນາງ ພອນວິໄລ ຫຼວງລາດ ຈາກເມືອງໄຊເສດຖາ ໄດ້ຮັບເງິນສົດຄົນລະ 3 ລ້ານກີບ, ນອກນັ້ນ, ຍັງມີລາງວັນນາງສາວຜິວງາມສຸຂະພາບດີ, ລາງວັນນາງສາວຂັວນໃຈຊ່າງພາບ, ລາງວັນນາງສາວມິດຕະພາບ ແລະ ລາງວັນນາງສາວຂວັນໃຈມະຫາຊົນ. ນາງສາວງາມນະຄອນຫຼວງ ຈະເປັນຕົວແທນລູກສາວທັງ 7 ຂອງພະຍາກະບິນລະພົມ ແລະ ຈະໄດ້ເຂົ້າຮ່ວມຂະບວນແຫ່ຫົດສົງຫົວຂອງພະຍາກະບິນລະພົມຕາມປະເພນີລາວ ໃນວັນທີ 13 ເມສາ 2016 ທີ່ນະຄອນຫຼວງວຽງຈັນ. Cr.CRI