ສາລະພັດປະໂຫຍດຈາກແປ້ງເດັກ ທີ່ຫຼາຍທ່ານຍັງບໍ່ທັນຮູ້!!!

ແປ້ງ​ເດັກ ຫຼາຍໆ​ຄົນ​ອາດຈະ​ຄິດວ່າ​ເອົາ​ໄວ້​ໃຊ້​ສຳລັບ​ເດັກ​ນ້ອຍ ​ຫຼື ​ເອົາ​ມາ​ທາ​ໂຕໃຫ້ມີກິ່ນຫອມ​ເທົ່າ​ນັ້ນ ແຕ່ໃນທາງກົງກັນຂ້າມ ແປ້ງເດັກສາມາດໃຫ້ປະໂຫຍດຫຼາກຫຼາຍກວ່າທີ່ທ່ານຄິດແນ່ນອນ! ສະນັ້ນ, ມື້ນີ້ ເຮົາມາເບິ່ງນຳກັນວ່າແປ້ງເດັກສາມາດເຮັດຫຍັງໄດ້ແນ່!!

 ແກ້​ມາຍສາຍຄໍ ທ່ານບໍ່ຕ້ອງ​ເສຍ​ເວລາ​ອີກ​ຕໍ່ໄປ ຫາກຖ້າ​ທ່ານ​ເຈີກັບ​ບັນ​ຫາ​ສາຍ​ຄໍ​ພັນ​ກັນ​ຈົນ​ເປັນ​ປຸ້ມ​ແກະ​ຍາກ ພຽງ​ໂຮຍ​ແປ້ງ​ເດັກໜ້ອຍດຽວ​ເພື່ອ​ໃຫ້​ມື່ນ​ຂຶ້ນ ຈາກ​ນັ້ນ​ກໍ​ຄ່ອຍ​ແກ້ປຸ້ມ ປຸ້ມ​ທີ່​ມັດ​ກັນ​ໄວ້​ຈະ​ແກ້ອອກໄດ້​ຢ່າງ​ງ່າຍ​ດາຍ.

ຫຼຸດກິ່ນເໝັນອັບ ແປ້ງເດັກ​ສາມາດ​ຊ່ວຍ​ຫຼຸດ​ກິ່ນ​ອັບ​ໃນ​ບໍລິເວນ​ຕ່າງໆ​ໄດ້ດີ ໂດຍ​ສະເພາະ​ເຟີນິເຈີ ເຊັ່ນ ໃນ​ບໍລິເວນ​ລິ້ນ​ຊັກ​ຕູ້​ເຄື່ອງ​ ຫຼື ​ຕາມ​ພາຍ​ໃນ​ຕູ້​ໄມ້​ຕ່າງໆ ພຽງ​ໂຮຍ​ແປ້ງ​ເດັກ​ໄວ້ກິ່ນອັບຊື້ນກໍ່ຈະຈາງລົງ

ຫຼຸດ​ຄວາມ​ມັນ​ຂອງ​ເສັ້ນ​ຜົມ ແປ້ງ​ເດັກ​ມີ​ຄຸນສົມບັດ​ຫຼຸດ​ຄວາມ​ມັນ​ເທິງ​ເສັ້ນ​ຜົມ​ໄດ້ ພຽງ​ໂຮຍ​ລົງ​ເທິງ​ຝາມື ແລ້ວ​ກໍ​ນວດ​ຜົມ​ເບົາໆ ພຽງ​ເທົ່າ​ນີ້​ຄວາມ​ມັນ​ເງົາ​ເທິງ​ຫົວ​ເຈົ້າ​ກໍ​ຈະ​ຫຼຸດລົງ.

ແກ້​ບັນຫາ​ຕຽງ​ນອນ​ຮ້ອນ​ໃນ​ລະດູ​ຮ້ອນ  ການ​ນອນ​ຫຼັບ​ເທິງ​ຕຽງ​ຮ້ອນໆ​ໃນ​ຄືນ​ທີ່​ຮ້ອນ​ອົບ​ເອົ້າ ບໍ່ແມ່ນ​ເລື່ອງທີ່ຫຼາຍໆທ່ານປາດ​ຖະໜາເລີຍ ແຕ່ມີວີທີແກ້ດ້ວຍການໂຮຍ​ແປ້ງ​ໄວ້​ເທິງ​ບ່ອນນອນ​ເພື່ອ​ດູດ​ຊັບອາຍຮ້ອນ ພຽງ​ເທົ່າ​ນີ້​ບັນຫາ​ຕຽງ​ຮ້ອນ​ກໍ​ຈະ​ໝົດ​ໄປ.

ໄພ້​ຕິດກັນ ບາງເທື່ອ​ເວລາ​ເຮົາ​ຫລິ້ນ​ໄພ້​ເຮືອນດີ ຫຼື ເຮືອນກຳ ​ກັບ​ເພື່ອນຝຸງບັນຫາ​ໄພ້​ສອງ​ໃບ​ຕິດ​ເປັນ​ແຜ່ນ​ດຽວ​ກັນ ບັນຫາ​ນີ້​ແກ້​ໄດ້​ໂດຍງ່າຍໆພຽງ​ຈັບ​ເອົາ​ໄພ້​ທີ່​ຕິດ​ກັນ​ໃສ່​ໃນ​ຖົງ​ທີ່​ໃສ່​ແປ້ງ​ເດັກ ຫລັງ​ຈາກ​ນັ້ນ​ກໍ​ເຊັດ​ໃຫ້​ສະ​ອາດ​ກ່ອນ​ເອົາ​ມາ​ຫລິ້ນ​ໄດ້.

ປ້ອງ​ກັນ​ມົດ ແປ້ງ​ເດັກ​ສາມາດ​ປ້ອງ​ກັນ​ມົດ​ໄດ້ ພຽງ​ນຳ​ໄປ​ໂຮຍ​ບໍລິເວນ​ທີ່​ມົດ​ມັກ​ຍ່າງ​ຜ່ານ ພຽງ​ເທົ່າ​ນີ້​ມົດ​ກໍ​ຈະ​ບໍ່​ມາ​ລົບກວນ​ບໍລິເວນ​ນັ້ນ​ອີກ​ຕໍ່​ໄປ.

ທຳ​ຄວາມ​ສະ​ອາດ​ບໍລິເວນ​ທີ່​ເປັນ​ຄາບ​ມັນ ການເຮັດ​ອາຫານ​ໃນ​ຫຼາຍໆ​ເທື່ອ ອາດຈະ​ເຮັດໃຫ້​ພື້ນ​ທີ່​ອ້ອມຮອບ​ນັ້ນເປື້ອນໄປ​ດ້ວຍ​ຄາບ​ມັນ ໂຮຍ​ແປ້ງ​ເດັກ​ລົງ​ໃສ່ບໍລິເວນ​ນັ້ນ ແລ້ວ​ກໍ​​ເຊັດ​ອອກ ຄວາມ​ມັນ​ກໍ​ຈະ​ບໍ່​ມີ​ລົບກວນ​ອີກ​ຕໍ່ໄປ

ຢືດ​ອາ​ຍຸ​ການ​ໃຊ້​ງານ​ຖົງ​ມື​ຢາງ ພຽງ​ນຳ​ແປ້ງ​ເດັກ​ໃສ່​​ໃນ​ຖົງ​ມື​ຢາງ​ກ່ອນ​ໃຊ້​ງານ​ທຸກ​ເທື່ອ ຈະ​ຊ່ວຍ​ໃຫ້​ຖົງ​ມື​ໃໝ່​ຢູ່​ສະເໝີ ແຖມ​ຍັງ​ຖອດ​ສະ​ດວກ​ຫລັງ​ຈາກ​ໃຊ້​ງານ​ແລ້ວ.

ເສີມ​ຄວາມ​ສວຍຄວາມງາມ​ໃຫ້​ຂົນຕາ ປະໂຫຍດຂອງ​ແປ້ງ​ເດັກ​ຂໍ້​ນີ້​ໄດ້ຮັບ​ການ​ຢືນຢັນ​ຈາກ​ຫຼາຍ​ນັກ​ແຕ່ງ​ໜ້າ ຫຼັງ​ຈາກ​ປັດ​ມາດ​ຄາ​ລ່າ​ແລ້ວ​ໃຊ້ສຳລີໄປຈຸກໃສ່​ແປ້ງ​ເດັກ ນຳໄປປັດ​ເບົາໆ​ບໍລິເວນຂົນຕາ ພຽງ​ເທົ່າ​ນີ້​ຂົນ​ຕາ​ກໍ​ໜາ ແລະ ຈະ​ເບິ່ງ​ເດັ່ນ​ຂຶ້ນ​ມາ​ເລີຍ​

ຫຼຸດ​ຄວາມ​ອັບ​ຊື້ນ​ໃຫ້​ກັບເກີບ ພຽງ​ໂຮຍ​ແປ້ງ​ໄວ້​ໃນ​ເກີບ​ທີ່​ທ່ານໃສ່ເປັນ​ປະຈຳ ຈະ​ຊ່ວຍ​ຫລຸດ​ກິ່ນ​ອັນ​ບໍໍ່​ພຶງ​ປະສົງ​ຈາກ​ຕີນ​ໄດ້.