ສາມຫລ່ຽມຄໍາ ຈັດການແຂ່ງຂັນລົດຈັກວິບາກສາກົນຄັ້ງທີ 1

ໃນ​ອາທິດ​ຜ່ານ​ມານີ້, ຢູ່ເຂດເສດຖະກິດພິເສດ ສາມຫລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຈັດການ​ແຂ່ງຂັນ​ລົດຈັກ ​ວິບາກ​ສາກົນ ຊີງ​ຂັນ​ເຂດ​ເສດຖະກິດ​ ພິ​ເສດ​ສາມຫລ່ຽມ​ຄໍາ ຄັ້ງທີ 1 ​​ເຊິ່ງມີ​ນັກ​ກິລາ ​​ແຂ່ງ​ລົດ​ວິບາກ​ມື​ອາຊີບ ​ແລະ ສະໝັກ​ຫລິ້ນ​ເຂົ້າຮ່ວມ 158 ຄົນ ທີ່ມາ​ຈາກ 13 ປະ​ເທດ​ໃນ​​ເອີ​ຮົບ ແລະ ພາກພື້ນອາຊີ ເຂົ້າຮ່ວມ, ພິ​ເສດ ​ແມ່ນ​ນັກ​ກິລາ​ຈາກ ​ເມືອງ​ຫລ້າ ​ເຂດ​ປົກຄອງ​ຕົນ​ເອງ ​ສິບ​ສອງ​ພັນ​ນາ ສປ.ຈີນ.

ການ​ແຂ່ງຂັນຄັ້ງ​ນີ້ ​ໄດ້​ແບ່ງ​ອອກ​ເປັນ​ສາມ​ປະ​ເພດ ຄື ລຸ້ນ 350 cc, 300 cc ແລະ 250cc ແລະ ແຂ່ງ ຂັນກັນສອງສະໜາມມື້​ທຳ​ອິດ​ ແຂ່ງຂັນ​ຢູ່​ທີ່​ສະໝາ​ມວິບາກ​ ທີ່​ສ້າງ​ໃໝ່​​ໄດ້​ມາດຕະ ຖານ​ສາກົນຢູ່ ​ເຂດ​ເສດຖະກິດ​ພິ​ເສດ ມີໄລຍະ​ທາງປະມານ 1,5 ກິ​ໂລ​ແມັດ; ສ່ວນ​ມື້​ທີ​ສອງມີ​ການ​ແຂ່ງຂັນ​ຈາກ ບ້ານ​ສີ​ບຸນ​ເຮືອງ ​ເຂດ​ເສດຖະກິດ​ພິ​ເສດ ​ສາມຫລ່ຽມ​ຄໍາ ​ໄປ​ຫາ ​ບ້ານ​ສາລີ​ເຮືອງ ເມືອງ​​ເມິງ ​​ໃນໄລຍະ​ທາງ​ຫລາຍ​ກວ່າ 150 ກິ​ໂລ​ແມັດ, ເປັນການແຂ່ງຂັນພະຈົນໄພ ໄປກັບທິວທັດທຳມະຊາດໂດຍ ຜ່ານ 32 ບ້ານ ​ເຊິ່ງຄະນະ​ກຳມະການ​ ຈະ​ຕັດສິນ​ຫາ​ຜູ້​ຊະນະ​ເລີດ ດ້ວຍ​ການ​ຈັບ​ເວລາ ​ເອົາ​ນັກ​ກິລ າ​ທີ່​ໃຊ້​ເວລາ​ໜ້ອຍ​ທີ່​ສຸດ.

ທ່ານ ຫລິວ ສຽວ​ເຊີ​ງ ປະທານ​ສະ​ໂມ​ສອນ​ແຂ່ງຂັນ ​ລົດຈັກ​ເຂດ​ເສດຖະກິດ​ພິ​ເສດສາມ ຫລ່ຽມ​ຄໍາ ກ່າວ​ວ່າ: ການ​ແຂ່ງຂັນ​ຄັ້ງນີ້ ມີ​ຈຸດປະ​ສົງ​ເພື່ອ​ສົ່ງ​ເສີມ​ ແລະ ​ໂຄສະນາ​ເຜີຍ​ແຜ່​ ການ​ທ່ອງ​ທ່ຽວ​​ ໃນ​ທ້ອງ​ຖິ່ນ ກໍຄື ​ເພີ່ມ​ທະວີ​ສາຍ​ພົວພັນ ​ແລກປ່ຽນ​ທາງ​ດ້ານ ວັດທະນະທຳ​ ແລະ ກິລາ ລະຫວ່າງ ​ເຂດ​ເສດ​ຖະກິດ​ພິ​ເສດ ​ສາມຫລ່ຽມ​ຄໍາ​ກັບ ​ເມືອງ​ຫລ້າ ​ເຂດ​ປົກຄອງ​ຕົນ​ເອງ​ສິບ​ສອງ​ພັນ​ນາ ສປ.ຈີນ ​​ໂດຍສະ​ເພາະ ​ແມ່ນ ​ເຂດ​ສາມຫລ່ຽມ​ຄໍາ ​ ​ໃຫ້​ມີ​ການ​ຂະຫຍາຍຕົວ​ຢ່າງ​ກວ້າງຂວາງ.

ຂໍ້ມູນຈາກ: ສຳນັກຂ່າວສານປະເທດລາວ