ສານສູງສະເປນຢາກສອບສວນເນມາຄະດີຍ້າຍທີມ

 

ສານສະເປນລະບຸວ່າ ເນມາ ຫົວຫອກຂອງ ບາເຊໂລນາ ລວມເຖິງເຈົ້າໜ້າທີ່ຂອງສະໂມສອນອີກ 2 ຄົນ ແລະ ພໍ່ແມ່ຂອງນັກເຕະຄວນຖືກດຳເນີນຄະດີຫຼັງຈາກທີ່ມີການກ່າວຫາວ່າເກີດການຄໍຣັບຊັນໃນປະເດັນທີ່ນັກເຕະຍ້າຍມາຢູ່ກັບ ບາຊາ ໂດຍຕອນນີ້ຕ້ອງລໍຖ້າໃຫ້ຝ່າຍໂຈດຕັດສິນໃຈກ່ອນວ່າຈະຢືນຢັນຄຳຮ້ອງຟ້ອງເກົ່າ ຫຼື ບໍ່.

 

ສານສູງຂອງປະເທດສະເປນກ່າວເມື່ອວັນຈັນທີ່ຜ່ານມາວ່າ ເນມາ ກອງໜ້າຄົນດັງຂອງ ບາເຊໂລນາ ສະໂມສອນຍັກໃຫຍ່ຂອງ ລາ ລີກາ ສະເປນ, ພໍ່ແມ່ຂອງນັກເຕະ ແລະ ເຈົ້າໜ້າທີ່ຂອງ ບາເຊໂລນາ ອີກ 2 ຄົນຄວນທີ່ຈະຕ້ອງຖືກພິຈາລະນາຄະດີເຖິງປະເດັນທີ່ມີການກ່າວວ່າເກີດການສໍ້ລາດທີ່ນັກເຕະຍ້າຍມາຫຼິ້ນໃນແດນກະທິງ.

 

ເນມາ ຍ້າຍຈາກ ຊານໂຕດ ມາຢູ່ກັບ ບາເຊໂລນາ ໃນຊ່ວງປີ 2013 ໂດຍຕອນນັ້ໜມີການລະບຸວ່າຄ່າຫົວຂອງເຂົາຢູ່ທີ່ 57.1 ລ້ານເອີໂຣແຕ່ບັນຫາມາເກີດຂຶ້ນເມື່ອ ດີໄອເອສ ກຸ່ມການລົງທຶນສັນຍາບາຊິວທີ່ຖືສິດເປັນເຈົ້າຂອງນັກເຕະບອກວ່າພວກເຂົາໄດ້ຮັບເງິນສ່ວນແບ່ງໜ້ອຍກວ່າທີ່ຕົກລົງກັນໄວ້ໃນຕອນທຳອິດ.

 

ທັງນີ້ຜູ້ພິພາກສາ ໂຄເຊ ເດ ລາ ມາຕາ ກ່າວວ່າຝ່າຍໂຈດມີເວລາ 10 ມື້ທີ່ຈະຕັດສິນໃຈວ່າຈະຮັບຄຳກ່າວຫາຂອງພວກເຂົາ ຫຼື ຈະຖອນການຟ້ອງຮ້ອງເຊິ່ງມັນຖືເປັນຂັ້ນຕອນຕາມປົກກະຕິກ່ອນທີ່ຈະມີການເປີດການສອບສວນ.