ສານຕັດສິນຈໍາຄຸກ 5 ປີພ້ອມປັບໃໝ 20 ກວ່າລ້ານ ສະຖານຄ້າຂາຍຢາບ້າ

      ໃນອາທິດຜ່ານມາ, ຄະນະສານອາຍາ ສານປະຊາຊົນຂັ້ນຕົ້ນນະຄອນຫຼວງວຽງຈັນ ໄດ້ນຳເອົາສຳນວນຄະດີອາຍາຂັ້ນຕົ້ນ ເລກທີ 1000/ອຍກ.ນວ,ລົງວັນທີ 13 ກັນຍາ 2016 ຂຶ້ນມາຄົ້ນຄວ້າພິຈະລານາຕັດສິນຕາມກົດໝາຍ.

       ຜ່ານການຄົ້ນຄວ້າເອກະສານ ແລະ ຫຼັກຖານຕ່າງໆ ໃນສຳນວນຄະດີຢ່າງລະອຽດຖີ່ຖ້ວນ, ຮອບດ້ານ ແລະ ພາວະວິໄສແລ້ວ ເຫັນວ່າ ມີຫຼັກຖານຮັດກຸມທີ່ໜັກແໜ້ນ ແລະ ພຽງພໍຢັ້ງຢືນວ່າ: ການກະທຳຂອງ ທ້າວ ສຸລິຍາ (ຈຳເລີຍ) ເປັນການກະທຳຜິດໃນສະຖານຄ້າຂາຍຢາເສບຕິດ ( ຢາບ້າ ). ດັ່ງນັ້ນ ເຫັນຄວນຕັດອິດສະຫຼະພາບ 5 ປີ 9 ເດືອນປັບໃໝ 25 ລ້ານກີບ.
       ໃນທີ່ຫ້ອງປະຊຸມສານ, ອົງການໄອຍະການປະຊາຊົນນະຄອນຫຼວງວຽງຈັນ ໄດ້ຖະແຫຼງໄຈ້ແຍກການກະທຳຜິດຕົວຈິງຂອງຈຳເລີຍ ຕໍ່ຄະນະສານຂັ້ນຕົ້ນດັ່ງນີ້: ໃນເດືອນເມສາ 2016 ທ້າວ ສຸລິຍາ (ຈຳເລີຍ) ໄດ້ເລີ່ມຄ້າຂາຍຢາບ້າ, ເຊິ່ງຢາບ້າທີ່ນໍາມາຂາຍແມ່ນຊື້ນໍາ ທ້າວ ດວງຕາ ຈຳນວນຫຼາຍຄັ້ງ, ຄັ້ງລະ 200 ເມັດ ແລ້ວນໍາເອົາຢາບ້າມາຂາຍໃຫ້ກັບໄວລຸ້ນທົ່ວໄປ; ມາໃນວັນທີ 25 ພຶດສະພາ 2016 ເວລາ 24:00ໂມງ ທ້າວ ສຸລິຍາ ທໍາມະວົງ ໄດ້ໄປຊື້ຢາບ້ານໍາ ທ້າວ ດວງຕາ ຕື່ມອີກ ຈໍານວນ 200 ເມັດ ແລ້ວໄດ້ນໍາເອົາຢາບ້າມາເສບເອງ ຈໍານວນ 5 ເມັດ ແລະ ໄດ້ຂາຍໃຫ້ໄວລຸ້ນ ຈໍານວນ 45 ເມັດ ແລະ ຍັງເຫຼືອ ຈໍານວນ 150 ເມັດ, ມາຮອດວັນທີ 26 ພຶດສະພາ 2016 ເວລາ 13:00 ໂມງ ທ້າວ ສຸລິຍາ ຈຶ່ງຖືກເຈົ້າໜ້າທີ່ປກສ ເມືອງຫາດຊາຍຟອງ ຈັບຕົວພ້ອມຂອງກາງຢາບ້າ ຈໍານວນ 150 ເມັດ ທີ່ກວດພົບຢູ່ໃນຊອງຢາສູບ; ເຊິ່ງການກະທໍາໃນຄັ້ງນີ້ ຈໍາເລີຍໄດ້ໃຫ້ການວ່າ ຢາບ້າຈໍານວນ 150 ເມັດນັ້ນ ແມ່ນຂອງຈໍາເລີຍທີ່ຊື້ມາໄວ້ເສບ ແລະ ຂາຍແທ້ຕາມຄໍາໃຫ້ການຮັບສາລະພາບຂອງຈໍາເລີຍ ສະບັບ ວັນທີ 27 ພຶດສະພາ 2016. ຢາບ້າ ຈໍານວນ 150 ເມັດ ມີນໍ້າໜັກ 14,2807 ກຼາມ ໄດ້ນໍາເຂົ້າໃນການກວດພິສູດວິໄຈຂອງສູນວິໄຈອາຫານ ແລະ ຢາ ກະຊວງສາທາລະນະສຸກ ສະບັບເລກທີ 2633-16/ສອຢ ລົງວັນທີ 25 ກໍລະກົດ 2016ໄດ້ຢັ້ງຢືນວ່າ ຢາບ້າຈໍານວນດັ່ງກ່າວແມ່ນ ບັນຈຸສານເສບຕິດປະເພດຢາບ້າ (Methampheta-mine+) ແທ້, ສ່ວນຢາບ້າທີ່ຍັງເຫຼືອຈາກການກວດພິສູດ-ວິ ໄຈຈໍານວນ 128 ເມັດ ນໍ້າໜັກ 12.0047 ກຼາມນັ້ນ ສະເໜີໃຫ້ສານຕັດສິນຮີບແລ້ວມອບໃຫ້ພາກສ່ວນທ່ກີ ່ຽວຂ້ອງນໍາໄປທໍາລາຍຖິ້ມຕາມລະບຽບການ.
      ຄະນະສານອາຍາ ໄດ້ວິນິໄສແລ້ວເຫັນວ່າ ການກະທຳຜິດຂອງທ້າວ ສຸລິຍາເປັນການກະທໍາຜິດໂດຍເຈດຕະນາ ເນື່ອງຈາກວ່າຈໍາເລີຍຈົງໃຈຊື້ຢາບ້າເພື່ອເອົາໄປຂາຍ, ເຊິ່ງຈໍາເລີຍກໍຮູ້ດີວ່າຢາບ້ານັ້ນ ກົດໝາຍຫ້າມທໍາການຄ້າຂາຍ ໂດຍເດັດຂາດ; ເຫັນວ່າ ທ້າວ ສຸລິຍາ ມີສະຕິສໍາປະຊະຍະສົມບູນດີ, ບໍ່ເປັນບ້າເສຍຈິດ ແລະ ເຖິງກະສຽນອາຍຸທາງອາຍາ; ດ້ວຍເຫດຜົນ ແລະ ຫຼັກຖານດັ່ງກ່າວ ສານຈິ່ງຕັດສິນລົງໂທດຕາມກົດໝາຍມາດຕາ 146 ຂອງກົດໝາຍອາຍາ ມາດຕາ 2 ຂໍ້ 2 ວັກ 1 ຕັດອິດສະຫຼະພາບ5 ປີ 9 ເດືອນ ແລະ ປັບໃໝ 25 ລ້ານກີບ.
       ສ່ວນທ້າວ ດວງຕາ ຜູ້ທີ່ທ້າວ ສຸລິຍາໄດ້ໃຫ້ການຊັດທອດຫາວ່າໄດ້ຊື້ຢາບ້ານໍານັ້ນ; ປັດຈຸບັນ, ຜູ້ກ່ຽວແມ່ນໄດ້ເອົາຕົວຫຼົບໜີ ແລະ ຍັງບໍ່ສາມາດຈັບຕົວຜ້ກູ ່ຽວມາດໍາເນີນຄະດີໄດ້ຕາມບົດສະຫຼຸບລາຍງານຄະດີສະບັບ ເລກທີ107/ຄດ ລົງວັນທີ 25 ສິງຫາ 2016.

ແຫຼ່ງຂ່າວ: ໜັງສືພິມຄວາມສະຫງົບ LSecurity News