ສາຍເໜືອກຽມລົດເພີ່ມຂຶ້ນທົບເທົ່າໂຕ ຮັບໃຊ້ໄລຍະປີໃໝ່ລາວ

ສາຍເໜືອກຽມລົດເພີ່ມຂຶ້ນທົບເທົ່າໂຕ ຮັບໃຊ້ໄລຍະປີໃໝ່ລາວ

    ເພື່ອກຽມພ້ອມບໍລິການມວນຊົນທີ່ມີຈຸດປະສົງເດີນທາງໄປທາງພາກເໜືອ, ທ່ານນາງ ຈິດປະສົງ ຫຼວງເດດມີໄຊ ຜູ້ອຳນວຍການສະຖານີລົດຂົນສົ່ງລົດໂດຍສານສາຍເໜືອ ໄດ້ຊີ້ແຈງຕໍ່ສື່ມວນຊົນ ໃນວັນທີ 4 ເມສາ 2017 ນີ້ວ່າ ໃນບຸນກຸດສົງການປີໃໝ່ ພສ 2560 ນີ້ ທາງສະຖານີ ໄດ້ເພີ່ມຈຳນວນລົດໂດຍສານຂຶ້ນເທົ່າຕົວໄວ້ບໍລິ ການມວນຊົນບໍ່ໃຫ້ມີບັນຫາລົດບໍ່ພໍ.

 

     ທ່ານຜູ້ອຳນວຍການສະຖານີລົດຂົນສົ່ງໂດຍສານສາຍເໜືອ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ກ່າວວ່າ: ເພື່ອບໍລິການດ້ານການຂົນສົ່ງໃນໂອກາດກຸດສົງການປີໃໝ່ລາວ ພສ 2560 ຊຶ່ງເລີ່ມແຕ່ວັນທີ 14-16 ເມສາ 2017 ໃຫ້ພຽງພໍກັບຄວາມຕ້ອງຂອງພໍ່ແມ່ປະຊາຊົນລາວບັນດາເຜົ່າ ກໍຄືມວນຊົນລາວທົ່ວໄປທີ່ເຂົ້າມາໃຊ້ບໍລິການຢູ່ສະຖານີແຫ່ງນີ້ ໂດຍນັບແຕ່ວັນທີ 7 ເມສາເປັນຕົ້ນໄປ ທາງສະຖານີ ພວກເຮົາໄດ້ມີການກະກຽມຄວາມພ້ອມດ້ານຕ່າງໆເຊັ່ນ: ກວດກາສະພາບເຕັກນິກລົດດ້ວຍນາຍຊ່າງທີ່ຊໍານານງານ, ການເຝິກອົບຮົມໃຫ້ຄວາມຮູ້ແກ່ນັກຂັບລົດ ແລະແອັດລົດ ໂດຍການຖອດຖອນບົດຮຽນຈາກປີຜ່ານມາ, ພ້ອມນັ້ນ ທາງສະຖານີ ກໍມີຫຼາກຫຼາຍການບໍລິການດ້ານຂົນສົ່ງມວນຊົນທົ່ວໄປເຊັ່ນມີສະມາຄົມລົດຕູ້, ລົດສອງແຖວ ແລະລົດອື່ນໆ ຊຶ່ງຄາດວ່າປີໃໝ່ຈະມີລົດພຽງພໍກັບຄວາມຕ້ອງການຂອງຜູ້ມາໃຊ້ບໍລິການ.

     ປະຈຸບັນທາງສະຖານີ ມີຄວາມພ້ອມບໍລິການມວນຊົນແລ້ວ 100% ແລະ ໄດ້ມີການກະກຽມລົດໂດຍສານເພີ່ມຂຶ້ນ ທົບເທົ່າໂຕຂອງແຕ່ລະສາຍເຊັ່ນ: ລົດວຽງຈັນ-ຫຼວງພະບາງ ມີທັງໝົດ 10 ຖ້ຽວທາງສະຖານີກຽມລົດຮອງຮັບໄວ້ບໍລິການ 20 ຄັນ ແລະຖ້ຽວລົດສາຍອື່ນໆກໍເຊັ່ນດຽວກັນ. ສ່ວນທາງດ້ານລາຄາປີ້ລົດໂດຍສານແມ່ນປະຕິບັດຕາມທິດຊີ້ນໍາຂອງພະແນກໂຍທາທິການ ແລະຂົນສົ່ງ ນະຄອນຫລວງວຽງຈັນ ກໍຄືຄຳ ສັ່ງແນະນຳຂອງກະຊວງໂຍທາທິການ ແລະຂົນສົ່ງວາງອອກຕາມລາຄາປົກກະຕິ, ພ້ອມທັງຢືນຢັນວ່າຈະບໍ່ມີການຂຶ້ນລາຄາປີ້ໂດຍສານໃນໄລຍະປີໃໝ່ລາວປີນີ້ເດັດຂາດ ແລະໝັ້ນໃຈວ່າ ຈະບໍ່ໃຫ້ມີ ຜູ້ໂດຍສານຕົກຄ້າງຢູ່ສະຖານີ.

     ທ່ານນາງ ຈິດປະສົງ ຫຼວງເດດມີໄຊ ຍັງໄດ້ກ່າວຕື່ມອີກວ່າ ເນື່ອງໃນໂອ ກາດປີໃໝ່ລາວ ພສ 2560 ປີນີ້ ຂໍຮຽກຮ້ອງເຖິງຜູ້ທີ່ມີຈຸດປະສົງຈະເດີນທາງ ໄປພາກເໜືອຂອງລາວ ໃຫ້ມາຂຶ້ນລົດ ຫຼື ຈັບຈອງປີ້ສາຍທາງຢູ່ທີ່ສະຖານີລົດຂົນສົ່ງໂດຍສານສາຍເໜືອ ແລະໃຫ້ກະກຽມເຄື່ອງຂອງຕ່າງໆຂອງຕົນໃຫ້ຄົບຖ້ວນ ແລະຂຶ້ນລົດໃຫ້ຖືກຕາມສາຍທາງ ເນື່ອງຈາກການອອກລົດແມ່ນບໍ່ມີກຳນົດເວລາ ຕາຍໂຕຫາກມີຜູ້ໂດຍສານເຕັມຍາມໃດກໍຈະປ່ອຍລົດອອກທັນທີ.

Cr: http://www.sedthakid.la

ບົດຄວາມໃຫມ່ໆ