ສາຍເລືອດອາຟຣິກາຄົນທຳອິດ!! ມາເຣດ ຮັບລາງວັນນັກເຕະດີເດັ່ນຂອງ ພີເອຟເອ

ຣີຢາດ ມາເຣດ ປີກຟອມດີຂອງ ເລສເຕີ ຊີຕີ ຮັບລາງວັນນັກເຕະດີເດັ່ນຂອງ ພີເອຟເອ ໃນລະດູການນີ້ ແລະ ເປັນນັກເຕະສາຍເລືອດອາຟຣີກາຄົນທຳອິດທີ່ໄດ້ຮັບລາງວັນນີ້.

 

ຣີຢາດ ມາເຣດ ປີກຂອງ “ຈິງຈອກເງິນ” ເລສເຕີ ຊີຕີ ຈ່າຝູງຈາກ ພຣີເມຍລີກ ໄດ້ຮັບເລືອກໃຫ້ເປັນຜູ້ຊະນະລາງວັນດີເດັ່ນແຫ່ງປີຂອງສະມາຄົມບານເຕະອາຊີບອັງກິດ (ພີເອຟເອ) ປະຈຳລະດູການ 2015-2016.

ປີກເລືອດແອວຈີເລຍເຮັດຜົນງານໄດ້ດີໃນລະດູການນີ້ເມື່ອຍິງໃນລີກໄປ 17 ເມັດ ແລະ ຜ່ານບານໃຫ້ໝູ່ຍິງໄດ້ອີກ 11 ເທື່ອຈົນເປັນກຳລັງສຳຄັນທີ່ຊ່ວຍໃຫ້ “ຈິງຈອກເງິນ” ເປັນຈ່າຝູງຂອງລີກສົ່ງຜົນໃຫ້ເຂົາໄດ້ລາງວັນນີ້ ໂດຍເອົາຊະນະຄູ່ແຂ່ງຄົນອື່ນໆຄື ເຈມີ ວາດີ ກອງໜ້າເພື່ອນຮ່ວມທີມ, ເອັນໂກໂລ ກອງເຕ ກອງກາງຂອງທີມ, ແຮຣີ ເຄນ ຫົວຫອກຈາກ ທັອດແນມ ຮັອດສະເປີ, ເມຊຸດ ໂອຊິວ ຈອມທັບຈາກ ອາເຊນອນ ແລະ ດິມິທຣີ ປາເຢດ ກອງກາງຈາກ ເວສແຮມ ຢູໄນເຕັດ ໄປໄດ້.

 

ທັງນີ້ ມາເຣດ ນັບເປັນນັກເຕະສາຍເລືອດແອວຈີເລຍຄົນທຳອິດໃນປະຫວັດສາດທີ່ໄດ້ຮັບລາງວັນນັກເຕະດີເດັ່ນແຫ່ງປີຂອງສະມາຄົມບານເຕະອາຊີບອັງກິດໄປຄອງ ແລະ ຍັງເປັນນັກເຕະຄົນທຳອິດຈາກ ເລສເຕີ ທີ່ຮັບລາງວັນນີ້.