ສັບປະດາຮູບເງົາຈີນ ໄດ້ຈັດຂື້ນຢູ່ນະຄອນຫຼວງວຽງຈັນ

ຕອນຄໍ່າວັນທີ 12 ພະຈິກນີ້, ສະຖາບັນຂົງຈື ມະຫາວິທະຍາໄລແຫ່ງຊາດລາວ, ໄດ້ຈັດງານ ສັບປະດາຮູບເງົາຈີນ ທີ່ມະຫາວິທະຍາໄລແຫ່ງຊາດລາວ ເພື່ອເປັນການແລກປ່ຽນວັດທະນະທຳລະຫວ່າງລາວ-ຈີນ, ເປັນກຽດເຂົ້າຮ່ວມໂດຍ ທ່ານ ນາງ ຍອນວິໄລ ໄຊຍະເລີດ ຮອງອໍານວຍການສະຖາບັນຂົງຈື ( ຝ່າຍລາວ), ທ່ານ ນາງ ຫຼີຊ່ຽວ ຜູ້ອໍານວຍການສະຖາບັນຂົງຈື ( ຝ່າຍຈີນ ), ພ້ອມດ້ວຍບັນດາຄູອາຈານ, ນ້ອງນັກຮຽນ, ນັກສຶກສາ ຈາກສະຖາບັນຂົງຈື, ຄູອາຈານໂຮງຮຽນອ້ອມຂ້າງ ແລະ ບັນດາແຂກທີ່ເຊີນ 300 ກວ່າເຂົ້າຮ່ວມ.
ທ່ານ ນາງ ຍອນວິໄລ ໄຊຍະເລີດ ກ່າວວ່າ: ງານສັບປະດາຮູບເງົາຈີນປະຈໍາປີ 2015 ນີ້, ຈັດຂື້ນເພື່ອເປັນການແລກປ່ຽນລະຫວ່າງວັດທະນະທຳລາວ-ຈີນ ແລະ ເພື່ອເປັນການເຜີຍແຜ່ວັດທະນະທຳຂອງປະຊາຊົນຈີນ ໃຫ້ປະຊາຊົນລາວໄດ້ຮັບຮູ້. ດັ່ງນັ້ນ, ທຸກປີຈື່ງມີການຈັດງານສັບປະດາຮູບເງົາຈີນຂື້ນ. ສໍາລັບຮູບເງົາທີ່ນຳມາສາຍໃນງານສັບປະດາຮູບເງົາຈີນ ຄັ້ງນີ້, ມີຊື່ເລື່ອງວ່າ: “ ສີ່ອ້າຍນ້ອງ ” ເຊິ່ງເນື້ອໃນເລື່ອງສ່ອງແສງເຖິງຄວາມສາມັກຄີຮັກແພງໃນຄອບຄົວດຽວກັນ ໂດຍສະເພາະແມ່ນສີ່ອ້າຍນ້ອງທີ່ເກີດໃນຄອບຄົວທີ່ທຸກຍາກ, ຕ່າງຄົນໄດ້ພັດພາກຈາກກັນໄປຢູ່ຄົນລະບ່ອນ ແຕ່ເມື່ອທັງ 4 ຄົນ ເຕີບໃຫຍ່ຂື້ນມາແລ້ວຕ່າງກໍ່ຊອກຫາກັນຍ້ອນຄວາມຜູກພັນຄິດຮອດຄິດເຖິງ ຄວາມສາມັກຄີຮັກແພງເຊິ່ງກັນ ແລະ ກັນ ທີ່ມີມາແຕ່ດົນນານ. ປຽບເໜືອນດັ່ງຄວາມສາມັກຄີຮັກແພງລະຫວ່າງປະຊາຊົນຂອງສອງຊາດລາວ-ຈີນ.
ງານສັບປະດາຮູບເງົາຈີນ, ຈະຈັດຂື້ນໃນລະຫວ່າງການເດືອນ ພະຈິກ ທຸກໆປີ.