ສັງກະສີ ແຮ່ທາດດີໆທີ່ຜູ້ຊາຍຫ້າມພາດ

 

ສັງກະສີ (Zincຫຼື Zn) ຄືແຮ່ທາດຊະນິດໜຶ່ງ ທີ່ຈໍາເປັນຕໍ່ການຈະເລີນເຕີບໂຕຂອງຮ່າງກາຍ ເປັນໜຶ່ງໃນສານອາຫານທີ່ເປັນພະເອກຂອງໜຸ່ມໆພວກເຮົາ ເພາະມີຫຼາຍງານວິໄຈຊີ້ແຈງແລ້ວວ່າສັງກະສີຊ່ວຍສ້າງເຊວສືບພັນ, ໃນນ້ຳອະສຸຈິມີທາດສັງກະສີຢູ່ເປັນຈຳນວນຫຼວງຫຼາຍ, ມີຄວາມຈຳເປັນຕໍ່ການເຮັດວຽກຂອງຕ່ອມລູກໝາກ ແລະລະບົບສືບພັນ ບໍ່ແປກໃຈເລີຍທີ່ຫຼາຍຄົນພາກັນເວົ້າຫຍອກແກມແທ້ວ່າ ໃຜຢາກມີລູກໃຫ້ກິນຫອຍນາງລົມ ເນື່ອງຈາກຫອຍນາງລົມມີທາດສັງກະສີຢູ່ຢ່າງຫຼວງຫຼາຍ ແຕ່ກໍຢ່າລືມວ່າມັນກໍມີຄໍເລສເຕີຣອນຫຼາຍເຊັ່ນດຽວກັນ ອາດຈະກໍໃຫ້ເກີດບັນຫາອື່ນຕາມມາ ສະນັ້ນ, ຄວນຮັບປະທານໃນປະລິມານທີ່ເໝາະສົມ. ນອກນັ້ນ ສັງກະສີຍັງຊ່ວຍເຮັດໃຫ້ບາດແຜອັກເສບ, ສິວເຊົາໄວເນື່ອງຈາກມັນສາມາດຊ່ວຍຟື້ນຟູເຊວຜິວ, ເນື້ອເຍື່ອຕ່າງໆໃຫ້ມີຄວາມແຂງແຮງ ແລະສ້າງພູມຄຸ້ມກັນໃຫ້ກັບຮ່າງກາຍ.

ນອກຈາກຫອຍນາງລົມແລ້ວ ສັງກະສີຍັງມີຢູ່ຫຼັງຄາເຮືອນ ອຸ່ຍ! ບໍ່ແມ່ນ ມີຢູ່ໃນອາຫານຈຳພວກ  ຖົ່ວແດງ, ງາ, ທັນຍາພືດ, ຕັບ, ອາຫານທະເລ ແລະອື່ນໆ ປະລິມານທີ່ເໝາະສົມສຳລັບຜູ້ຊາຍທີ່ມີອາຍຸ 11ປີຂຶ້ນໄປແມ່ນ 15ມິລລີກຣາມຕໍ່ມື້ ແລະຫ້າມກາຍ 100ມິລລີກຣາມຕໍ່ມື້.

ນັກໂພຊະນາການແນະນຳວ່າບໍ່ຈຳເປັນຕ້ອງບໍລິໂພກໃນຮູບແບບອາຫານເສີມຖ້າຫາກເຮົາຮັບປະທານອາຫານພຽງພໍ ແລະທີ່ສຳຄັນຄວນຫຼຸດຜ່ອນການດື່ມເຄື່ອງດື່ມແອລກໍຮໍເພາະເປັນຕົວທຳລາຍແຮ່ທາດສັງກະສີ.

ບົດຄວາມໃຫມ່ໆ