ສະຫວັນນະເຂດ ອຸບັດຕິເຫດພົ້ນເດັ່ນ

ຕາມການລາຍງານຂອງຕຳຫຼວດໜ່ວຍງານຄະດີອຸປະຕິເຫດ ເມືອງໄກສອນພົມວິຫານ ແຂວງສະຫວັນນະເຂດ ໄດ້ແຈ້ງໃຫ້ຜູ້ສື່ຂ່າວ ໜັງສືພິມສະຫວັນພັດທະນາ ໃນວັນທີ 22 ກຸມພາ 2016 ນີ້ວ່າ: ໃນວັນເສົາ-ອາທິດ ຄືວັນທີ 20 ແລະ 21 ຜ່ານມາ ໄດ້ເກີດມີອຸປະຕິເຫດຕາມທ້ອງຖະໜົນ 3 ລາຍໃຫຍ່ ເປັນຕົ້ນ: ໃນເວລາ 01 ໂມງ 30 ນາທີ ໄດ້ມີອຸປະຕິເຫດເກີດຂຶ້ນ ໂດຍລົດຍົນ ຕຳເຮືອນປະຊາຊົນຢ່າງຮຸນແຮງ, ເຮັດໃຫ້ລົດ ແລະເຮືອນເສຍຫາຍໜັກ ສ່ວນຜູ້ຂັບຂີ່ລົດ ບາດເຈັບສາຫັດ ຕາມການສືບສວນເບື້ອງຕົ້ນໄດ້ພົບວ່າ: ເປັນລົດກະບະໄຮຣັກ ສີປອນເງິນ ໝາຍເລກທະບຽນ 9079 ສະຫວັນນະເຂດ ເຊິ່ງຂັບໂດຍ ທ້າວ ເຈມ ອາຍຸ 19 ປີ, ອາຊີບນັກຮຽນ ຢູ່ບ້ານອຸດົມມີໄຊ ເມືອງອຸທຸມພອນ, ໄດ້ແລ່ນມາຕາມທາງເລກ 9 (ສະຫວັນ-ເຊໂນ) ດ້ວຍຄວາມໄວພໍສົມຄວນ ພໍມາຮອດສາມແຍກບ້ານນາເຕີຍ ກໍ່ໄດ້ເກີດເສຍຫຼັກ ແລ່ນເຂົ້າຕຳຮົ້ວເຮືອນ ແລະເຮືອນຂອງ ທ້າວ ກອງມີ ເຮັດໃຫ້ຮົ້ວ ແລະເຮືອນເສຍຫາຍ. ສ່ວນລົດກະບະເປ້ເພຢ່າງໜັກ, ສຳລັບຜູ້ຂັບຂີ່ຄື ທ້າວ ເຈມ ບາດເຈັບສາຫັດ ແລະໄດ້ນຳສົ່ງໂຮງພະຍານ.
ໃນມື້ດຽວກັນ ເວລາ 4 ໂມງເຊົ້າ ໄດ້ມີລົດເກັງ ໂຕໂຍຕ້າ ລາລີກ້າ ສີແດງ ເຊິ່ງແລ່ນມາແຕ່ທາງທິດຕາເວັນອອກ ຕາມເສັ້ນທາງເລກ 9 ພໍມາຮອດກິໂລແມັດທີ 5 (ຕໍ່ໜ້າໂຮງງານປຸງແຕ່ງໄມ້ ເລັ່ງພັດທະນາ) ລົດໄດ້ເສຍຫຼັກ ຕຳກັບກົກໄມ້ແຄມທາງເບື້ອງຊ້າຍມື ອັນໄດ້ເຮັດໃຫ້ ທ້າວ ຄຳເກັ່ງ ອາຍຸ 28 ປີ, ບ້ານໄຊຍະພູມ ເຊິ່ງເປັນຜູ້ຂັບ ໄດ້ເສຍຊີວິດຄາທີ່ ພ້ອມດ້ວຍທ້າວ ຕິ໋ ຫຼື ສຸກສະຫວັນ ອາຍຸ 24 ປີ, ບ້ານຫົວເມືອງໄດ້ເສຍຊີວິດໃນບ່ອນເກີດເຫດເຊັ່ນກັນ, ສ່ວນ ນາງ ນີລະມົນ ອາຍຸ 27 ປີ, ບ້ານໄຊຍະພູມ ບາດເຈັບສາຫັດ ແລະທ້າວ ອໍລະດີ ອາຍຸ 28 ປີ ບ້ານໂພໄຊ ໄດ້ຮັບບາດເຈັບເລັກນ້ອຍ.
ອີກຄະດີໜຶ່ງ ເຫດໄດ້ເກີດຂຶ້ນໃນເວລາ 19 ໂມງ 45 ນາທີ ຂອງວັນທີ 21 ກຸມພາ ຢູ່ຖະໜົນເລກ 9 ເຊັ່ນກັນ ເຂດບ້ານໂພນສະຫວ່າງໃຕ້ (ກິໂລແມັດທີ 6) ໄດ້ມີລັດຈັກ ປະສານກັບລົດກະບະ ອັນໄດ້ເຮັດຜູ້ຂັບຂີ່ລົດຈັກ ໄດ້ຮັບບາດເຈັບສາຫັດ ແລະໄດ້ເສຍຊີວິດໃນເວລາຕໍ່ມາ, ຕາມການສອບສວນເບື້ອງຕົ້ນພົບວ່າ: ຜູ້ຂັບຂີລົດຈັກຊື່ ທ້າວ ກາວ່າວ ອາຍຸ 21 ປີ, ເປັນນັກສຶກສາໂຮງຮຽນກະສິກຳ-ປ່າໄມ້, ບ້ານເກີດຢູ່ບ້ານໂພນໂດກ ເມືອງຈຳພອນ ໄດ້ຂີ່ລົດຈັກຍີ່ຫໍ້ YAMAHA Fino ສີຂາວ ໝາຍເລກທະບຽນ ຈທ 9979 ສະຫວັນນະເຂດ. ເຊິ່ງໄດ້ແລ່ນລົດອອກຈາກເທສະບານແຂວງ. ສ່ວນຄູ່ກໍລະນີຄື ລົດກະບະ ຍີ່ຫໍ້ DAEHAN ສີຂາວ ໝາຍເລກທະບຽນ ກກ 9332 ສະຫວັນນະເຂດ ຂັບຂີ່ໂດຍ ນາງ ທິບພາພອນ ອາຍຸ 40 ປີ, ຢູ່ບ້ານສຸນັນທາ ເຊິ່ງໄດ້ແລ່ນສວານທາງກັນມາ.

ແຫຼ່ງຂ່າວ: ສະຫວັນພັດທະນາ ຂ່າວ / Savanhphuttana News