ສະຫວັນນະເຂດ ປັບປຸງກົງຈັກ ການຈັດຕັ້ງ ຂັ້ນແຂວງ ແລະ ເມືອງ

ກອງປະຊຸມປະກາດ ແລະ ປັບປຸງກົງຈັກການຈັດຕັ້ງຂັ້ນແຂວງ ແລະ ຂັ້ນເມືອງ ໂດຍການເປັນປະທານຂອງ ທ່ານ ສັນຕິພາບ ພົມວິຫານ ຮອງເຈົ້າ ແຂວງໆສະຫວັນນະເຂດ ​ໄດ້​ຈັດ​ຂຶ້ນເມື່ອ ທ້າຍເດືອນກໍລະກົດຜ່ານມານີ້ ທີ່ສະໂມ ສອນຫ້ອງວ່າການ ແຂວງສະຫວັນນະເຂດ ​ໂດຍໄດ້ແຕ່ງຕັ້ງທ່ານ ກົງຈັກ ໜໍ່ແກ້ວ ຫົວໜ້າພະແນກ ຍຸຕິທຳ ເປັນຫົວໜ້າພະແນກ ການເງິນແຂວງສະຫວັນນະເຂດຜູ້ໃໝ່, ຍົກຍ້າຍທ່ານ ສົມສັກ ບຸຈະເລີນ ຫົວໜ້າພະແນກ ການເງິນຜູ້ເກົ່າ ໄປຮັບໜ້າທີ່ໃໝ່ເ ປັນຮອງຫົວໜ້າຫ້ອງວ່າການແຂວງ, ຍົກຍ້າຍທ່ານ ສົມໝາຍ ສົງວິໄລ ຫົວໜ້າຫ້ອງງົບປະ ມານຜູ້ເກົ່າ ໄປເປັນຮອງເຈົ້າ ເມືອງ ໄກສອນພົມວິຫານ, ແຕ່ງຕັ້ງທ່ານ ເພັດດາລາ ແກ້ວລາສີ ຫົວໜ້າຂະແໜງຂໍ້ມູນຂ່າວສານ ແລະ ບໍລິຫານ ພາສີເຂດ 3 ເປັນຮອງຫົວໜ້າ ພະແນກການເງິນ, ແຕ່ງຕັ້ງທ່ານ ສີສະໝຸດ ໄຊຍະວົງ ຮອງຫົວໜ້າພະແນກຍຸຕິທຳ ເປັນຫົວໜ້າພະແນກ ຍຸຕິທຳແຂວງ, ແຕ່ງຕັ້ງທ່ານ ພູທອນ ພຸດທະຂັນຕິ ຮອງຫົວໜ້າພະແນກ ຍຸຕິທຳ ເປັນຮອງຫົວໜ້າຫ້ອງວ່າການປົກຄອງແຂວງ.
ໃນກອງປະຊຸມ, ທ່ານ ສັນຕິພາບ ພົມວິຫານ ໄດ້ໂອ້ລົມຕໍ່​ກອງ​ປະຊຸມ ​ໂດຍໄດ້ຍົກໃຫ້ເຫັນ ກ່ຽວກັບເນື້ອໃນຈິດ ໃຈຂໍ້​ກຳ​ນົດຂອງກົມການເມືອງ ສູນກາງພັກ ​ເລກ​ທີ 02/ກມ​ສ​ພ ທີ່ຕິດພັນກັບການ​ແຕ່ງ​ຕັ້ງ​, ຍົກ​ຍ້າຍ, ສັບ​ປ່ຽນ​ໜ້າ​ທີ່ ແລະ ບ່ອນ​ປະ​ຈຳ​ການຂອງ​ພະ​ນັກ​ງານ ແມ່ນ​ມີ​ລັກ​ສ​ະ​ນະ​ທົ່ວ​ໄປ ແລະ ປົກ​ກະ​ຕິ​ຮັບປະ​ກັນ ລັກ​ສະ​ນະສືບ​ທອດ​ຕໍ່​ເນື່ອງ ແລະ ເຮັດ​ໃຫ້​ການ​ຈັດ​ຕັ້ງ​ທຸກ​ຂັ້ນ ແລະ ຂະ​ແໜງ​ການ​ຕ່າງໆມີ​ສ​ະ​ຖຽນ​ລະ​ພາບມີ​ການ​ເຄື່ອນ​ໄຫວ​ຢ່າງ​ຕັ້ງ​ໜ້າ ແລະ ມີ​ປະ​ສິດ​ທິ​ພາບ. ນອກຈາກນັ້ນ ຮອງເຈົ້າແຂວງ ກໍໄດ້ເນັ້ນໃຫ້ພະນັກງານອ້ອມຂ້າງແຂວງ ສຸມໃສ່ປະຕິ ບັດຫລັກການລວມຂອງພັກເປັນຕົ້ນແມ່ນ ການແບ່ງຄວາມຮັບຜິດຊອບ ໃຫ້ຈະແຈ້ງ, ຍົກສູງຫລັກການລວມສູນ ປະຊາທິປະໄຕ ເພື່ອໃຫ້ມີຄວາມສາມັກຄີເປັນເອກະພາບ.
ເຊິ່ງຈະນຳມາສູ່ຄວາມສຳເລັດ ຂອງການປະຕິບັດໜ້າທີ່ ການເມືອງທີ່ພັກ-ລັດມອບໝາຍໃຫ້; ໃຫ້ຫັນລົງສູ່ຮາກຖານຂັ້ນເມືອງ ແລະ ບ້ານໃຫ້ຫລາຍຂຶ້ນເພາະຮາກຖານເປັນບ່ອນຈັດຕັ້ງປະຕິບັດນະໂຍບາຍຕ່າງໆຂອງພັກ-ລັດຖະ ບານ ໃຫ້ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆໃນຖັນແຖວພະນັກງານ ໃຫ້ທັນການ ແນໃສ່ປັບປຸງ ການຈັດຕັ້ງໃຫ້ມີຄວາມເຂັ້ມແຂງຂຶ້ນເທື່ອລະກ້າວ; ໃຫ້ເອົາໃຈໃສ່ການສຶກສາອົບຮົມດ້ານການເມືອງແນວຄິດໃຫ້ມີຄວາມຕໍ່ເນື່ອງ, ເລິກເຊິ່ງເຖິງຖອງໂດຍຕິດພັນກັບການຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ, ສຶກສາອົບຮົມຍົກສູງ ຄຸນທາດການເມືອງໃຫ້ມີຄວາມໜັກແໜ້ນ, ມີຄວາມຈົ່ງຮັກພັກດີຕໍ່ຊາດ, ຖືເອົາຜົນປະໂຫຍດສ່ວນລວມເປັນຫຼັກ, ມີຄວາມກະຕືລືລົ້ນ ໃນການປະຕິບັດໜ້າທີ່ ການເມືອງ ຂອງຕົນເປັນຢ່າງດີ;ເອົາໃຈໃສ່ປັບປຸງ ຂອດປະສານງານລະ ຫວ່າງບັນດາຂະແໜງການ ແນໃສ່ປັບປຸງການປະຕິບັດໜ້າທີ່ ໃຫ້ມີຄວາມກົມກຽວ, ເປັນເອກະ ພາບ ແລະ ເປັນກ້ອນກຳລັງອັນໜຶ່ງອັນດຽວກັນເພື່ອໃຫ້ການປະຕິບັດທິດທາງຄາດໝາຍສູ້ຊົນຕາມມະຕິກອງປະຊຸມໃຫຍ່ຂອງສູນກາງພັກກໍຄືແຜນພັດທະນາເສດຖະກິດ-ສັງຄົມ ຂອງແຂວງ ໃຫ້ບັນລຸຕາມຄາດໝາຍ. ທັງນີ້ກໍເພື່ອເປັນການສ້າງ ຂະບວນການຂ່ຳນັບຮັບຕ້ອນກອງປະຊຸມໃຫຍ່ຂອງອົງ ຄະນະພັກ ແຂວງສະຫວັນນະເຂດ ຄັ້ງທີ VIII ແລະ ກອງປະຊຸມໃຫຍ່ຂອງພັກ ຄັ້ງທີ X ທີ່ຈະມີຂຶ້ນໃນຕໍ່ໜ້ານີ້ ໃຫ້ເປັນຂະບວນຟົດຟື້ນ.​.............................................................................................................................................................................

ທີ່​ມາ: www.kpl.gov.la