ສະຫວັນນະເຂດ ຈັດກອງປະຊຸມໃຫຍ່ ຄັ້ງທີ IX ສະຫະພັນແມ່ຍິງແຂວງ

ກອງປະຊຸມໃຫຍ່ ຄັ້ງທີ IX ສະຫະພັນແມ່ຍິງ ແຂວງສະຫວັນນະເຂດ ໄດ້ຈັດຂຶ້ນໃນວັນທີ 15-16 ກັນຍາ 2015 ນີ້, ຢູ່ແຂວງສະຫວັນນະເຂດ ໂດຍມີທ່ານ ນາງ ສີໃສ ລືເດດມູນສອນ ກຳມະການສູນກາງພັກ, ປະທານຄະນະບໍລິຫານງານສູນກາງ ສະຫະພັນ ແມ່ຍິງລາວ, ທ່ານ ດຣ ສຸພັນ ແກ້ວມີໄຊ ເລຂາພັກແຂວງ, ເຈົ້າແຂວງໆສະຫວັນນະເຂດ, ພ້ອມດ້ວຍ ພາກສ່ວນກ່ຽວຂ້ອງ ແລະ ຜູ້ແທນສົມບູນ ຈຳນວນ 220 ສະຫາຍ ເຊິ່ງເປັນຕົວແທນ ໃຫ້ແກ່ບັນດາອົງການຈັດຕັ້ງ ສະຫະພັນແມ່ຍິງ ແລະ ສະມາຊິກແມ່ຍິງ ໃນທົ່ວແຂວງ ຈຳນວນ 130.767 ສະຫາຍເຂົ້າຮ່ວມ.

ທ່ານ ນາງ ສີສະຫວັດ ໂຄດທະວົງສາ ປະທານສະຫະພັນແມ່ຍິງ ແຂວງສະຫວັນນະເຂດ ໄດ້ຂຶ້ນກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານ ບົດລາຍງານການເມືອງພາກ I ແລະ II  ເຊິ່ງໃນຕະຫຼອດໄລຍະ 5 ປີ ທີ່ຜ່ານມາ ເອື້ອຍນ້ອງ ແມ່ຍິງບັນດາເຜົ່າ ໃນທົ່ວແຂວງ ສາມາດຍາດ ໄດ້ຜົນງານ ຫລາຍດ້ານເປັນຕົ້ນ: ຄະນະສະຫະພັນແມ່ຍິງ ແຕ່ລະຂັ້ນ ໄດ້ຖືເອົາວຽກງານສຶກສາອົບຮົມ ການເມືອງ-ແນວຄິດ ເປັນວຽກງານຕົ້ນຕໍ ແລະ ສຳຄັນ ເຮັດໃຫ້ຖັນແຖວ ສະມາຊິກສະຫະພັນແມ່ຍິງ ແລະ ເອື້ອຍນ້ອງແມ່ຍິງ ບັນດາເຜົ່າມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍ ຂອງພັກ-ລັດ, ມີຄວາມສາມັກຄີ ເປັນປຶກແຜ່ນແໜ້ນໜາ ຢູ່ພາຍໃຕ້ ການນຳພາຂອງພັກ, ມີສະຕິເປັນເຈົ້າຂອງປະເທດຊາດ ແລະ ຮັກກຽດສັກສີຂອງແມ່ຍິງລາວ, ເອົາໃຈໃສ່ ໃນການຂະຫຍາຍສະມາຊິກແມ່ຍິງ ໄດ້ຕື່ມອີກ 31.334 ຄົນ, ເພີ່ມຂຶ້ນ 33,8%, ປັດຈຸບັນ ທົ່ວແຂວງ ລວມມີ ສະມາຊິກ ສະຫະພັນ ແມ່ຍິງ ທັງໝົດ 130.568 ຄົນ, ມີເງິນບຳລຸງ ຈຳນວນ 763 ລ້ານກວ່າກີບ. ສຳລັບວຽກງານຈັດຕັ້ງປະຕິບັດ ຂໍ້ແຂ່ງຂັນ 3 ດີ ຄະນະ ສະຫະພັນແມ່ຍິງ ແຕ່ລະຂັ້ນ ໄດ້ສືບຕໍ່ຈັດຕັ້ງປະຕິບັດ ຂໍ້ແຂ່ງຂັນ 3 ດີ ຕິດພັນກັບ ຂະບວນການແຂ່ງຂັນຮັກຊາດ ແລະ ພັດທະນາ

ກອງປະຊຸມ ໄດ້ຮັບຟັງບົດສະຫລຸບ ການຈັດຕັ້ງປະຕິບັດແຜນພັດທະນາ ແມ່ຍິງແຂວງ 5 ປີ(2011-2015) ແລະ ທິດທາງແຜນການ ໃນຕໍ່ໜ້າ ຈາກທ່ານ ນາງ ພູທອນ ແກ້ວພູວົງ ຮອງປະທານສະຫະພັນແມ່ຍິງແຂວງ. ຈາກນັ້ນ ໃນພິທີ ກໍໄດ້ມີການ ມອບທຸງໄຊ 3 ດີໃຫ້ແກ່ 5 ຕົວເມືອງຄື: ໄກສອນ ພົມວິຫານ, ອຸທຸມພອນ, ຈຳພອນ, ອາດສະພັງທອງ ແລະ ໄຊບູລີ ແລະ ມອບໃບຍ້ອງຍໍ ຂອງສູນກາງສະຫະພັນແມ່ຍິງລາວ ໃຫ້ແກ່ ຄະນະພັກ-ອົງການ ປົກຄອງແຂວງ ແລະ 15 ຕົວເມືອງຂອງແຂວງ

ທີ່ມາ http://kpl.gov.la/