ສະຫວັນນະເຂດຈຳລອງເຫດການຝຶກຊ້ອມທາງດ້ານສຸກເສີນດ້ານສາທາລະນະສຸກ

ກະຊວງສາທາລະນະສຸກ ຮ່ວມກັບອົງການອະນາໄມໂລກ ຈັດຊຸດອົບຮົມການຝຶກຊ້ອມເຫດການຈຳລອງກ່ຽວກັບການເຝົ້າລະວັງ ແລະ ໂຕ້ຕອບຕໍ່ການລະບາດຂອງພະຍາດ MER-CoV ໃຫ້ພະນັກງານເຝົ້າລະວັງ ແລະ ໂຕ້ຕອບຂັ້ນແຂວງ, ຫ້ອງການພະແນກສາທາລະນະສຸກແຂວງສະຫວັນນະເຂດຂຶ້ນໃນວັນທີ 15 ຕຸລາ 2015ນີ້, ທີ່ວິທະຍາໄລວິທະຍາສາດສຸຂະພາບແຂວງ ໂດຍການເຂົ້າຮ່ວມຂອງທ່ານ ດຣ ສີສະຫວາດ ສຸດທະນິວົງ ຮອງຫົວໜ້າກົມຄວບຄຸມພະຍາດຕິດຕໍ່, ມີທ່ານ ນາງ ດຣ ຈັນດອນ ມະນີພູໃສ ຮອງຫົວໜ້າພະແນກສາທາລະນະສຸກແຂວງ, ທ່ານຫົວໜ້າສູນວິເຄາະ ແລະ ລະບາດວິທະຍາ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງຂັ້ນສູນກາງ ແລະ ທ້ອງ ຖິ່ນ.
ທ່ານ ດຣ ສີສະຫວາດ ສຸດທະນິວົງ ກ່າວວ່າ: ການຝຶກຊ້ອມເຫດການຈຳລອງກ່ຽວກັບການເຝົ້າລະວັງ ແລະ ໂຕ້ຕອບຕໍ່ເຫດການສົມຸດວ່າມີການນຳເຂົ້າຂອງພະຍາດ MER-CoV ໃຫ້ພະນັກງານສາທາລະນະສຸກ ແລະ ພາກສ່ວນທີ່ກ່ຽວຂ້ອງ. ເຊິ່ງເປັນເຫດການໜຶ່ງ ທີ່ມີຄວາມສຳຄັນໃນການປຶກສາຫາລື, ສົນທະນາແລກປ່ຽນປະກອບຄຳຄິດຄຳເຫັນເຊິ່ງກັນ ແລະ ກັນຂອງທຸກພາກສ່ວນ ທີ່ມີສ່ວນຮ່ວມໃນການວາງແຜນຄັ້ງນີ້ ເພື່ອຈະໄດ້ພ້ອມກັນວາງຍຸດທະສາດໃນການປ້ອງກັນພະຍາດ MER-CoV ຊຶ່ງເປັນໄພຂົ່ມຂູ່ໃຫ້ແກ່ປະຊາຊາດໃນທົ່ວໂລກ ໂດຍສະເພາະໃນປະເທດຊາອຸດິດ ອາລາເບຍ ແລະ ຕາເວັນອອກກາງຖືກຄົ້ນພົບໃນປີ 2012 ຮອດວັນທີ 14/10/2015 ອົງການແະນາໄມໂລກ ໄດ້ລາຍງານມີຈຳນວນກໍລະນີສະສົມ 1.152 ກໍລະນີ, ເສຍຊີວິດ 434 ກໍລະນີ ໃນ 25 ປະເທດທົ່ວໂລກ. ອາການຂອງພະຍາດດັ່ງກ່າວ ທີ່ມັກພົບແມ່ນອາການໄຂ້, ໄອ ແລະ ຫັນໃຈຝືດ ພ້ອມນັ້ນກໍ່ພາໃຫ້ເກີດປອດອັກເສບຮຸນແຮງ ເຮັດໃຫ້ຄົນເຈັບເສຍຊີວິດ. ເສັ້ນທາງການຕິດຕໍ່ຂອງພະຍາດນີ້ແມ່ນຄົນສູ່ຄົນ ແລະ ສັດສູ່ຄົນ, ໄລຍະບົ່ມຕົວ 2-14 ວັນ ແລະ ອັດຕາຄວາມຮຸນແຮງ 38,6%, ກຸ່ມທີ່ສ່ຽງແມ່ນພະນັກງານແພດໝໍ ທີ່ຢູ່ສະຖານທີ່ບໍລິການດ້ານສາທາລະນະສຸກ, ຜູ້ທີ່ຢູ່ໃກ້ສິດກັບຄົນເຈັບ MER-CoV, ຜູ້ທີ່ສຳຜັດກັບອູດ ຫຼືດື່ມນົມອູດດິບໆ, ຜູ້ທີ່ເດີນທາງ ຫຼືນັກທ່ອງທ່ຽວທີ່ເດີນທາງໄປ-ກັບຈາກບັນດາປະເທດຕາເວັນອອກກາງ. ຊຸດຝຶກອົບຮົມການຝຶກຊ້ອມເຫດການຈຳລອງໃນຄັ້ງນີ້ ເພື່ອກຽມຄວາມພ້ອມໃຫ້ແກ່ພະນັກງານສາທາລະນະສຸກໃນການຕອບໂຕ້, ການເຄື່ອນຍ້າຍຄົນເຈັບ, ຫ້ອງແຍກປ່ຽວຄົນເຈັບ ແລະ ອະເຊື້ອ, ການປິ່ນປົວ, ໃຫ້ຄຳແນະນຳແກ່ຄົນເຈັບເວລານອນໂຮງໝໍ ແລະ ເຝົ້າລະວັງຄົນເຈັບ. ຈາກນັ້ນກໍ່ຈະໄດ້ມີການຖອດຖອນບົດຮຽນເພື່ອນຳມາປັບປຸງບັນດາຈຸດອ່ອນ ແລະ ຂໍ້ຄົງຄ້າງຕ່າງໆ. ຊຸດອົບຮົມຈະດຳເນີນໄປເປັນເວລາສອງວັນ ບັນດານັກວິທະຍາກອນ ຈະໄດ້ອະທິບາຍກ່ຽວກັບເສັ້ນທາງການຕິດຕໍ່, ວິທີການປ້ອງກັນການຕິດເຊື້ອ ແລະ ການກະກຽມຄວາມພ້ອມຂອງ ສປປ ລາວ ໃນການຕອບໂຕ້ພະຍາດ MER-CoV.