ສະມາຊິກພີເອັສ ຜູ້ຕ້ອງການຖອນເງິນ ຮີບໄປຖອນດ່ວນ !!! ພີເອັສຂາຍນ້ຳ 2 ປີມີເງິນກວ່າ 600 ຕື້, ເຜີຍພ້ອມຄືນເງິນສະມາຊິກ

ພີເອສ ນັບວ່າເປັນບໍລິສັດຊຶ່ງເປັນທີ່ຮູ້ຈັກຂອງສັງຄົມໃນວົງກວ້າງ ແລະກຳລັງເປັນທີ່ສົນໃຈຂອງສັງຄົມໂດຍສະເພາະຜູ້ທີ່ເປັນສະມາຊິກ, ມື້ວານນີ້ປະທານບໍລິສັດຖະແຫຼງຂ່າວເຜີຍລາຍຮັບຂາຍນ້ຳ ແລະຜະລິດຕະພັນ 2 ປີໄດ້ 700 ຕື້, ຕອນນີ້ຍັງມີເງິນພຽງພໍສຳລັບເປັນທຶນໝູນວຽນໃນບໍລິສັດ ແລະຄືນແກ່ສະມາຊິກ ລໍຖ້າພຽງທິດຊີ້ນຳຂອງພາກລັດກໍ່ເທົ່ານັ້ນ.

ຕາມການເປີດເຜີຍໃນງານຖະແຫຼງຂ່າວຂອງປະທານບໍລິສັດພີເອສສົ່ງເສີມກະສິກຳ ແລະອຸດສາຫະກຳຂາເຂົ້າ-ຂາອອກຄົບວົງຈອນ ທ່ານ ນາງສຸກນາລີ ເທບສີເມືອງ ໃນວັນທີ 18 ພືດສະພານີ້ໃຫ້ຮູ້ວ່າ: ບໍລິສັດພີເອັສເລີ່ມດຳເນີນທຸລະກິດຢ່າງຈິງຈັງມາແຕ່ປີ 2014 ແລະ ມາຮອດ 2015 ສາມາດຂາຍນ້ຳດື່ມໄດ້ 8 ລ້ານກວ່າແກັດ ແລະສ້າງລາຍຮັບໄດ້ 264,4 ຕື້ກວ່າກີບ ແລະເພີ່ມຂຶ້ນເປັນ 390 ຕື້ກີບໃນປີ 2016 ບວກໃສ່ລາຍຮັບຈາກການຂາຍໄຂ່, ເຫັດ ແລະຜັກຈາກສວນ 17,3 ຕື້ສັງລວມແລ້ວ 2 ປີຜ່ານມາບໍລິສັດພີເອັສມີລາຍຮັບ 671,8 ລ້ານກວ່າກີບ.

ຈາກລາຍຮັບທີ່ໄດ້ຈາກການຂາຍຜະລິດຕະພັນຄືດັ່ງກ່າວ ເຖິງວ່າຜ່ານມາມີລູກຄ້າຈຳນວນໜຶ່ງໄດ້ຖອນເງິນອອກໄປແລ້ວ 100,69 ຕື້ກວ່າກີບຂອງຈຳນວນ 22.290 ລະຫັດ ແຕ່ພີເອັສຍັງມີເຫຼືອຍອດ 853 ຕື້ກວ່າກີບໃນ 179.863 ລະຫັດ ຊຶ່ງເງິນທີ່ມີຢູ່ຍັງພຽງພໍສໍາລັບຈ່າຍຄືນໃຫ້ສະມາຊິກຜູ້ມາແຈ້ງຖອນ.
ທ່ານ ນາງສຸກນາລີ ເທບສີເມືອງ ກ່າວ່າ: ກ່ຽວກັບປະຊາຊົນທີ່ເປັນສະມາຊິກຂອງພີເອັສ ທີ່ມາແຈ້ງຖອນ ສາມາດຖອນເປັນເງິນ ແລະສິ່ງຂອງອຸປະໂພກບໍລິໂພກ ແຕ່ຕ້ອງແມ່ນພາຍຫຼັງ 3 ເດືອນທີ່ຍື່ນການແຈ້ງຖອນເນື່ອງຈາກບໍລິສັັດບໍ່ຕ້ອງເບິ່ງສະພາບຄ່ອງບໍ່ໃຫ້ຂາດຕົ້ນທຶນໝູນວຽນ ແລະກໍລະນີຜູ້ໃດຖອນເງິນຫຼາຍລະດັບ 100 ລ້ານຂຶ້ນເມືອແມ່ນພີເອັສຈະບໍ່ພິຈາລະນາໃຫ້ເບິກໄດ້ຄັ້ງດຽວ ອາດຈະຈ່າຍໃຫ້ເປັນງວດໆໄປ.

ປະທານບໍລິສັດພີເອັສຍັງບອກອີກວ່າ ລູກຄ້າຂອງບໍລິສັດທີ່ແຈ້ງຖອນແລ້ວແຕ່ຍັງບໍໄດ້ເງິນ ປະຈຸບັນລັດໄດ້ໃຫ້ມີໜ່ວຍງານສະເພາະກິດຂອງທະນາຄານລົງຕິດຕາມແກ້ໄຂຊ່ວຍບໍລິສັດ ສະນັ້ນພີເອັສຕ້ອງລໍຖ້າພາກລັດກຳນົດວ່າຈະຈ່າຍເງິນໃຫ້ແບບໃດກ່ອນຈິ່ງສາມາດເບິກໃຫ້ສະມາຊິກໄດ້.

Cr: Laoupdate.com