ສະຖິຕິບໍ່ເປັນຕາຈື່..ມູພາທີມເກັບແຕ້ມໃນລີກໜ້ອຍສຸດ 8 ເກມ

 

ບໍ່ເປັນຕາຈົດຈື່!!ໂຊເຊ ມູຣິນໂຢ ອາດຈະຕ້ອງຟ້າວປັບປຸງຜົນງານແລ້ວ ຫຼັງຈາກທີ່ສະຖິຕິເຜີຍວ່ານຳຕົ້ນສັງກັດໃໝ່ເກັບແຕ້ມໃນລີກໄດ້ໜ້ອຍສຸດຫຼັງຈາກຜ່ານໄປ 8 ເກມນັບຕັ້ງແຕ່ສະໄໝຄຸມ ອູນຽວ ໄລເຣຍ ຫຼັງນຳ ແມນຢູ ເກັບໄດ້ພຽງ 14 ແຕ້ມເທົ່ານັ້ນ.

 

ໂຊເຊ ມູຣິນໂຢ ຜູ້ຈັດການທີມ ແມນເຊສເຕີ ຢູໄນເຕັດ ສ້າງສະຖິຕິນຳຕົ້ນສັງກັດໃໝ່ເກັບໄດ້ພຽງ 14 ຄະແນນຈາກ 8 ເກມທຳອິດເຊິ່ງຖືວ່າໜ້ອຍສຸດນັບຕັ້ງແຕ່ສະໄໝຄຸມ ອູນຽວ ໄລເຣຍ ສະໂມສອນໃນລີກປັອກຕຸຍການເກັບໄດ້ 10 ຄະແນນເມື່ອປີ 2001 ຈາກການເປີດເຜີຍຂໍ້ມູນຂອງ ເດິຊັນ ສື່ອັງກິດເມື່ອວັນອັງຄານທີ່ຜ່ານມາ.

 

ກຸນຊືຄົນປັອກຕຸຍການທີ່ຜ່ານງານຄຸມທັບມາແລ້ວ 6 ສະໂມສອນນຳ “ຜີສາດແດງ” ບຸກສະເໝີກັບ ລີເວີພູ 0-0 ເມື່ອວັນຈັນທີ່ຜ່ານມາສົ່ງຜົນໃຫ້ມີຄະແນນລວມ 14 ແຕ້ມໃນປັດຈຸບັນ ຂະນະທີ່ຕອນຍ້າຍໄປຄຸມ ເອຟຊີ ປໍໂຕ ໃນປີ 2002 ເຂົານຳທີມເສຍພຽງ 2 ເກມເທົ່ານັ້ນຕະຫຼອດທັງລະດູການໂດຍທີ່ 8 ເກມທຳອິດໄດ້ 18 ແຕ້ມສ່ວນຕອນຄຸມ ເຊວຊີ ຮອບທຳອິດນຳທີມເກັບໄດ້ 20 ຄະແນນຈາກ 8 ເກມທຳອິດໂດຍເສຍພຽງນັດດຽວຕະຫຼອດທັງລະດູການພ້ອມກັບຂຶ້ນເປັນແຊມ ພຣີເມຍລີກ ສຳເລັດໃນຕອນຈົບລະດູການນັ້ນ.

 

ຈາກນັ້ນ ມູຣິນໂຢ ຍ້າຍໄປຄຸມ ອິນເຕີ ມິລານ ໃນປີ 2008 ໂດຍນຳ “ງູໃຫຍ່” ເກັບໄດ້ 17 ຄະແນນຈາກ 8 ເກມທຳອິດ ແລະ ຈົບລະດູການໂດຍການເປັນແຊມລີກ ຊີຣີ ອາ ໂດຍຖິ້ມຫ່າງອັນດັບ 2 ເຖິງ 10 ແຕ້ມກ່ອນທີ່ຈະຍ້າຍໄປຄຸມ ເຣອັນ ມາດຣິດ ໃນປີ 2010 ແລະ ນຳ “ລາຊາຊຸດຂາວ” ເກັບໄດ້ 20 ແຕ້ມຈາກ 8 ເກມຈາກນັ້ນກໍກັບມາຄຸມ ເຊວຊີ ອີກຮອບໃນປີ 2013 ແລະ ນຳທີມເກັບໄດ້ 17 ແຕ້ມຈາກ 8 ນັດທຳອິດ.