ສະຖາບັນການສຶກສາພາກເອກະຊົນມອບເງິນຊຸກຍູ້ກອງປະຊຸມໃຫຍ່ແຂວງສະຫວັນນະເຂດ

ໃນຕອນເຊົ້າຂອງວັນທີ 10 ກັນຍາ 2015ນີ້, ທີ່ຫ້ອງວ່າການປົກຄອງແຂວງ, ສະຖາບັນການສຶກສາພາກເອກະຊົນແຂວງສະຫວັນນະເຂດ ນຳໂດຍທ່ານ ສຸກສະຫວັນ ໄຊສົມບັດ ປະທານສະມາຄົມສະຖາບັນການສຶກສາພາກເອກະຊົນ ທັງເປັນຜູ້ອຳນວຍການວິິທະຍາໄລໄຊສົມບັດເຕັກໂນໂລຊີ ພ້ອມຄະນະ ໄດ້ນຳເງິນຈຳນວນ 5 ລ້ານກີບໄປມອບໃຫ້ແກ່ແຂວງສະຫວັນນະເຂດ ເພື່ອປະກອບສ່ວນໃນການຊຸກຍູ້ກອງປະຊຸມໃຫຍ່ອົງຄະນະພັກແຂວງຄັ້ງທີ VIII ທີ່ຈະໄຂຂຶ້ນໃນມໍ່ນີ້. ພ້ອມນີ້ກໍ່ໄດ້ອວຍພອນໃຫ້ກອງປະຊຸມໃຫຍ່ອົງຄະນະພັກແຂວງ ຈົ່ງປະສົບຜົນສຳເລັດຢ່າງຈົບງາມ.
ເປັນກຽດຮັບເງິນປະກອບສ່ວນໃນຄັ້ງນີ້, ໂດຍທ່ານ ດຣ ຄຳເຜີຍ ຜັນທະຈອນ ຮອງເຈົ້າແຂວງໆສະຫວັນນະເຂດ ໂດຍມີຄະນະຫ້ອງວ່າການ ແລະ ພາກສ່ວນກ່ຽວຂ້ອງເຂົ້າຮ່ວມນຳ. ໂອກາດນີ້, ທ່ານຮອງເຈົ້າແຂວງກໍ່ໄດ້ກ່າວສະແດງຄວາມຂອບໃຈຕໍ່ການປະກອບສ່ວນໃນຄັ້ງນີ້, ພ້ອມດຽວກັນນີ້ ກໍ່ໄດ້ເນັ້ນໃຫ້ທາງຄະນະສະມາຄົມຈົ່ງສືບຕໍ່ຊີ້ນຳ-ນຳພາ ແລະ ຍົກລະດັບວຽກງານການສຶກສາພາກເອກະຊົນ ໃຫ້ມີການຂະຫຍາຍຕົວທັງໃນດ້ານປະລິມານ ແລະຄຸນະພາບທຽບເທົ່າກັບບັນດາປະເທດໃນອະນຸພາກພື້ນ, ໂດຍສະເພາະໃນຍຸກພັດທະນາ ທັງນີ້ກໍ່ ເພື່ອໃຫ້ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງປະເທດຊາດໃນປະຈຸບັນ.

ທີ່ມາ Savanhphuttana News