ສະຖານທີ່ທ່ອງທ່ຽວໃນນະຄອນຊິດນີ

ໂຮງໂອເປຣາແຫ່ງນະຄອນຊິດນີ (Sydney Opera House).

   ແລນມາກສຳຄັນອັນດັບ 1 ຂອງປະເທດ ບ່ອນທ່ອງທ່ຽວອອສເຕຣເລຍຍອດນິຍົມ ແລະ ເປັນ 1 ​ໃນ 7 ສິ່ງມະຫັດສະຈັນສີມືມະນຸດສ້າງຂຶ້ນຂອງໂລກ ຕັ້ງຢູ່ແຄມອ່າວ ແລະ ທ່າເຮືອທີ່ສຳຄັນຂອງເມືອງ ເປັນສະຖານທີ່ຈັດການສະແດງສຳຄັນໆລະດັບປະເທດ ໃນຊ່ວງເວລາກາງຄືນຈະມີການເປີດໄຟປະດັບສວຍງາມ ຖ້າຢາກຈະຍ່າງເບິ່ງຊົມທິວທັດຄວາມງາມອະລັງການຂອງການອອກແບບຕົກແຕ່ງທາງໃນ ສາມາດຊື້ທົວພາທ່ຽວ-ພາເບິ່ງ ໄດ້ທຸກມື້.

ສວນພຶກສາຊາດ (Royal Botanic Garden).

   ສວນງາມຂະໜາດໃຫຍ່ແຄມອ່າວທີ່ຕັ້ງຢູ່ບໍ່ໄກຈາກໂຮງໂອເປຣາຊິດນີ ເປັນສວນສາທາລະນະເກົ່າແກ່ປະຈຳເມືອງຕັ້ງແຕ່ປີ 1816 ສວນແຫ່ງນີ້ມີການຈັດຕົກແຕ່ງດອກໄມ້ພັນຕ່າງໆ ຕາມລະດູການທີ່ປ່ຽນໄປ ໃນໄລຍະລະດູໃບໄມ້ປົ່ງຈະເປັນໄລຍະທີ່ມີການຈັດງານການສະແດງດອກໄມ້ສວຍງາມ ແລະ ໃນໄລຍະຮ້ອນຈະມີການງານການສາຍຮູບເງົາກາງແຈ້ງໃນຕອນແລງ ໂດຍທີ່ຈໍພາບຈະຕັ້ງຢູ່ກາງນ້ຳ ແລະ ຜູ້ຊົມສາມາດປູເສື່ອ ປູຜ້າ ຊົມວິວ ແລະ ຮູບເງົາກາງສວນສວຍງາມໄດ້ໃນເວລາດຽວກັນ.

ໄຊນາທາວ (China Town).

   

 

ໄຊນາທາວເມືອງນີ້ມີຂະໜາດໃຫຍ່ ແລະ ເປັນແຫຼ່ງການຄ້າທີ່ສຳຄັນກາງເມືອງ ເປັນແຫຼ່ງອາຫານນາໆຊາດຂັ້ນເລີດ ໂດຍສະເພາະອາຫານຈີນລົດຊາດດັ້ງເດີມທີ່ມີໃຫ້ບໍລິການຢູ່ທົ່ວໄປ ແລະ ມີຄວາມແຊບບໍ່ຕ່າງຈາກອາຫານຈີນທີ່ຮົງກົງເລີຍ ນອກຈາກນັ້ນ ຍັງເປັນແຫຼ່ງຮ້ານຄ້າຫຼວງຫຼາຍມາກມາຍ ໃນໄລຍະທ້າຍອາທິດຈະມີຕະຫຼາດນັດສິນຄ້າ ຕະຫຼາດນັດອາຫານສົດ ແພັດດີ້ ມາເກັດ (Paddy’s Market) ທີ່ນັກທ່ອງທ່ຽວບໍ່ຄວນພາດເພາະເປັນແຫຼ່ງລວມສິນຄ້າທີ່ລະນຶກລາຄາສາມາດຕໍ່ລອງໄດ້ ທີ່ສຳຄັນອີກຢ່າງໜຶ່ງຄື ຮ້ານຄ້າ ຮ້ານອາຫານໃນບ່ອນນີ້ມັກຈະເປີດໃຫ້ບໍລິການຂ້ອນຂ້າງເດິກ ບາງຮ້ານເປີດຮອດ 22:00 ໄປຈົນຮອດ 00:00 ກໍມີ.

ເດິ ຣອກ (The Rocks).

 

 ບ່ອນທ່ອງທ່ຽວຊິດນີຍອດນິຍົມອີກບ່ອນໜຶ່ງທີ່ຕັ້ງຢູ່ໃນເຂດດຽວກັນກັບໂຮງໂອເປຣາ ສາມາດຍ່າງເລາະແຄມອ່າວຮອດກັນໄດ້ ໃນບໍລິເວນນີ້ມີບ້ານຮູບຊົງແບບເກົ່າໆຕັ້ງຢູ່ຫຼວງຫຼາຍ ແລະ ຍັງເປັນແຫຼ່ງຮ້ານຄ້າ ຮ້ານກາເຟຊັ້ນດີ ໃນໄລຍະພັກອາທິດຈະມີຕະຫຼາດສິນຄ້າສີມື ແລະ ງານສິລະປະຊື່ດັງປະຈຳເມືອງ ຕະຫຼາດນັດ ເດິ ຣອກ (The Rocks Market) ໃຜທີ່ມັກສິນຄ້າທີ່ປະດິດດ້ວຍມື ແລະ ເຄື່ອງຕົກແຕ່ງບ້ານງານສິລະປະກໍບໍ່ຄວນພາດ.

ດາລິງ ຮາເບີ (Darling Harbour).

   

ສະຖານທີ່ທ່ອງທ່ຽວອັນເປັນທີ່ຮັກຂອງນັກກິນນັກດື່ມເມືອງນີ້ ເພາະເປັນແຫຼ່ງອາຫານ, ພັບ, ບາອັນລືຊື່ ແລະ ຍັງມີບ່ອນຊອບປິ້ງແຄມນ້ຳໃນຝັ່ງກົງກັນຂ້າມ ເອີ້ນວ່າເອົາໃຈນັກທ່ອງທ່ຽວຢ່າງເຕັມທີ່ ນອກຈາກນັ້ນໃນບໍລິເວນນີ້ຍັງເປັນທີ່ຕັ້ງຂອງອາຄານການວາງສະແດງປະຈຳເມືອງ (Sydney Convention and Exhibition Centre) ຖັດໄປອີກບໍ່ໄກກໍເປັນທີ່ຕັ້ງຂອງສວນຈີນສວຍງາມ (Chinese Garden) ອີກດ້ວຍ.

ພິພິຕະພັນສັດນ້ຳຊິດນີ (Sydney Aquarium).

 

 ຕັ້ງຢູ່ໃນເຂດດາລິງ ຮາເບີ ຈັດສະແດງສັດນ້ຳນາໆພັນ ມີທັງປາສະຫຼາມ ປາກະເບນລາຫູຍັກ ແລະ ໂດມໂລກພື້ນນ້ຳຂະໜາດໃຫຍ່ທີ່ມີການຈຳລອງແບບປະກາລັງເກຣດ ບາຣິເອີ (Great Barrier) ແນວປະກາລັງຊື່ດັງທີ່ມີຂະໜາດໃຫຍ່ທີ່ສຸດຂອງໂລກມາໃຫ້ໄດ້ເບິ່ງກັນແບບໃກ້ໆ ນອກຈາກນັ້ນ ຍັງການສະແດງຂອງແມວນ້ຳ ພິພິຕະພັນສັດນ້ຳແຫ່ງນີ້ຕິດອັນດັບພິພິຕະພັນສັດນ້ຳທີ່ດີທີ່ສຸດໃນອັນດັບຕົ້ນໆຂອງໂລກ.

ຫາດຊາຍບອນໄດ (Bondi Beach).

 

  ຫາດຊາຍຊື່ດັງທີ່ສຸດຂອງເມືອງ ໄດ້ຊື່ເລື່ອງນ້ຳທະເລສີຟ້າໃສ ແລະ ຫາດຊາຍສີຂາວທີ່ຍາວຂະໜານກັບຫົນທາງ ຫາດຊາຍແຫ່ງນີ້ຕັ້ງຢູ່ບໍ່ໄກຈາກໃຈກາງຂອງເມືອງ ເປັນທັງແຫຼ່ງທ່ອງທ່ຽວຍອດນິຍົມ ແຫຼ່ງຊອບປິ້ງແຄມຫາດ ແລະ ແຫຼ່ງຮ້ານອາຫານຍອດນິຍົມ ທຸກໆວັນອາທິດຈະມີຕະຫຼາດນັດຂາຍສິນຄ້າມືສອງ ແລະ ສິນຄ້າສີມືໃກ້ໆກັບຫາດຊາຍອີກດ້ວຍ.

ຕະຫຼາດປາຊິດນີ (Sydney Fish Market).

   

ແຫຼ່ງອາຫານທະເລສົດແຊບຂຶ້ນຊື່ຂອງເມືອງ ມີຮ້ານຂາຍປາ ແລະ ອາຫານທະເລຫຼວງຫຼາຍ ນັກທ່ອງທ່ຽວສາມາດເລືອກຊື້ອາຫານທະເລສົດປະເພດຕ່າງໆ ແລະ ສາມາດຂໍໃຫ້ທາງຮ້ານປຸງແຕ່ງໄດ້ອີກ ເຊິ່ງສ່ວນໃຫຍ່ຈະເປັນການຕົ້ມ ປິ້ງ ຕະຫຼາດປາແຫ່ງນີ້ສາມາດນັ່ງລົດລາງມາໄດ້ໂດຍສະດວກຈາກສະຖານີລົດລາງຈາກໄຊນາທາວ.

ຂົວຮາເບີ (Sydney Harbour Bridge).

   ຂົວຂ້າມອ່າວຊິດນີເຊື່ອມຕໍ່ເມືອງທັງ 2 ​ຝັ່ງເປັນບ່ອນຈັດພຸໄຟອັນຂຶ້ນຊື່ຂອງປະເທດ ຂົວແຫ່ງນີ້ມີການບໍລິການພາທົວເບິ່ງໂຄງສ້າງຂົວອັນຍິ່ງໃຫຍ່ ແລະ ພາໄຕ່ຂຶ້ນໄປຮອດຈຸດສູງສຸດຂອງຂົວໄດ້ອີກດ້ວຍ ເອີ້ນວ່າເປັນຈຸດຊົມວິວ 360 ອົງສາທີ່ງາມທີ່ສຸດ ແລະ ຫວາດສຽວທີ່ສຸດ ແຕ່ທັງນີ້ກໍຍັງມີຜູ້ກ້າໄປຮ່ວມໄຕ່ຂົວກັນໄດ້ທຸກມື້ ແລະ ຍັງເປັນບ່ອນຈັດງານແຕ່ງງານແບບພິສະດານຂອງຄູ່ຮັກທີ່ໃຈກ້າຫຼາຍຄູ່ອີກດ້ວຍ.