ສອງລໍ້ແບ່ງປັນນ້ຳໃຈ ຂຶ້ນເຫນືອຊ່ວຍເຫລືອ 200ກວ່າຄອບຄົວ

ໂຄງການສອງລໍ້ແບ່ງປັນນ້ຳໃຈ ຄັ້ງທີ2 ອີກໜຶ່ງໂຄງການຊ່ວຍເຫຼືອສັງຄົມຂອງຊາວໜຸ່ມລາວຈິດອາສາທີ່ໄດ້ຮິບໂຮມທຶນຮອນ ແລະສິ່ງຂອງເຄື່ອງໃຊ້ອັນຈຳເປັນເພື່ອນຳໄປຊ່ວຍເຫຼືອປະຊາຊົນໃນຂົງເຂດທຸກຍາກກວ່າ 200ຄອບຄົວໃນແຂວງໄຊຍະບູລີ ເຊິ່ງຈະເລີ່ມຂຶ້ນໃນວັນທີ 6-10 ກຸມພາ 2016ນີ້. ຫລາຍໆຄົນຄົງຈະເຄີຍເຫັນຂ່າວຄາວທາງໂຊຊຽວກ່ຽວກັບໂຄງການສອງລໍ້ທ່ຽວລາວ ທີ່ໄດ້ເດີນທາງ 8ແຂວງພາກເຫນືອເມື່ອກາງເດືອນພະຈິກ 2015 ເຊິ່ງນຳທິມໂດຍ ທ້າວ ອານຸພົນ ພົມຮັກສາ ເຈົ້າຂອງສວນພູຄູນສະຕໍເບີລີ ໃນການເດີນທາງພວກເຂົາເຈົ້າໄດ້ຊ່ວຍເຫລືອປະຊາຊົນ 100ກວ່າຄົນ ໃນນັ້ນລວມທັງແຈກຢາຍອຸປະກອນການສຶກສາໃຫ້ເດັກນ້ອຍໃນໂຮງຮຽນທີ່ຂາດເຂີນ ພິເສດກໍຄືໄດ້ຊ່ວຍເຫລືອ ສີ່ແມ່ລູກທີ່ປະເຊີນຄວາມລຳບາກກາງທາງແລະນຳມາສົ່ງເຖິງບ້ານເກີດພ້ອມທັງໄດ້ຊ່ວຍແລ່ນໄຟຟ້າເຂົ້າເຮືອນ, ຊື້ແບ້ໃຫ້ພວກເຂົາລ້ຽງເພື່ອສ້າງອາຊີບທີ່ໝັ້ນຄົງ ແລະມອບທຶນການສຶກສາໃຫ້ແກ່ເດັກທັງສາມຄົນໂດຍອາໄສເງິນທີໄດ້ຈາກການບໍລິຈາກຂອງຊາວໂຊຊຽວ ແລະໃນຄັ້ງນີ້ໂຄງການດັ່ງກ່າວກໍໄດ້ເລີ່ມຕົ້ນອີກຄັ້ງເພື່ອສ້າງຄວາມສຸກໃຫ້ແກ່ຊາວຊົນນະບົດ. ທ້າວ ອານຸພົນ ພົມຮັກສາໄດ້ໃຫ້ສຳພາດວ່າ: ເນື່ອງຈາກໃນການເດີນທາງຄັ້ງກ່ອນພວກເຮົາໄດ້ເຫັນສະພາບຄວາມຫຍຸ້ງຍາກຂອງປະຊາຊົນອີກຫຼາຍຄອບຄົວ ສະນັ້ນ, ຈຶ່ງໄດ້ມີການຈັດຕັ້ງກິດຈະກໍານີ້ຂຶ້ນອີກຄັ້ງຈຸດປະສົງກໍເພື່ອຊ່ວຍເຫຼືອປະຊາຊົນ 200ກວ່າຄອບຄົວ ໃນກຸ່ມບ້ານປາກເປັດ ລວມທັງຫມົດ 7ຫມູ່ບ້ານ ໃນເມືອງຊຽງຮ່ອມ ແຂວງໄຊຍະບູລີ ຫນຶ່ງໃນເມືອງທຸກຍາກໃນປະເທດລາວ. ການຊ່ວຍເຫລືອຄັ້ງນີ້ປະກອບມີ: ສ້າງເຮືອນຫລັງໃຫມ່ໃຫ້ຄອບຄົວປະຊາຊົນ; ແຈກຢາຍເຄື່ອງໃຊ້ທີ່ຈຳເປັນ: ເສື້ອຜ້າ, ຜ້າຫົ່ມ, ອຸປະກອນການສຶກສາ..... ການດຳເນີນກິດຈະກຳແມ່ນອີງຕາມການເຫັນດີເຫັນພ້ອມຈາກເຈົ້າເມືອງເມືອງຊຽງຮ່ອນ ແຂວງໄຊຍະບູລີ ໂດຍມີອົງການພັດທະນາຊົນນະບົດເມືອງຊຽງຮ່ອນເປັນຝ່າຍດູແລອຳນວຍຄວາມສະດວກໃນການການເຄື່ອນໄຫວຂອງທິມງານ. ອານຸພົນ ຍັງໄດ້ກ່າວຕື່ມອີກວ່າ: ການເດີນທາງຄັ້ງນີ້ຈະມີອາສາສະໝັກທັງໝົດ 7ຄົນ ເຊິ່ງພວກເຮົາໄດ້ທຸ້ມເທທັງແຮງຊັບ ແລະແຮງກາຍເພື່ອປະກອບສ່ວນຊ່ວຍເຫຼືອສັງຄົມຢ່າງຈິງໃຈ ແຕ່ກໍຍັງບໍ່ອາດປະຕິເສດເລື່ອງວັດຖຸປັດໄຈ ແລະທຶນຮອນທີ່ຍັງບໍ່ພຽງພໍເທົ່າທີ່ຄວນຖ້າທຽບກັບຄວາມຮຽກຮ້ອງຕ້ອງການຕົວຈິງ. ສະນັ້ນ, ຖ້າທ່ານໃດມີນ້ຳໃຈຢ່າງແບ່ງປັນຫຼືຊ່ວຍເຫຼືອການເດີນທາງ ແລະກິດຈະກຳຄັ້ງນີ້ ກໍສາມາດຕິດຕໍ່ມາໄດ້ທີ່ເບີໂທ 020 97888870 ຫຼືໂອນເງິນມາທີ່ ເລກບັນຊີ 010120000950750001 ຊື່ບັນຊີ ອານຸພົນ ພົມຮັກສາ ຫຼື Facebook: Anouphon phomhacsar